МЕНӦ ВӦРЗЬӦДӦ СО МЫЙ...»

Выль во водзвылын миян корреспондентъяс шыӧдчылісны ӧткымын морт дінӧ да корисны вочавидзны, мый кажитчис налы тӧдчанаӧн 1990 воын странаса, Россияса, Коми республикаса да асланыс олӧмын да мый виччысьӧны локтан восяньыс.

Неыджыд воча кывъяссӧ лыддьӧй газетлӧн лист бокъясысь.

Вячеслав Иванович Худяев, Коми ССР-ысь Министръяс Сӧветса председатель:

Воыс, дерт, сьӧкыд, сійӧ, ме думысь, уна выльтор вайис и Россиялы, и Коми Республикалы, тшӧтш и меным. 1990 воас, шуам, Коми ССР-са правительство вӧчис медводдза воськовъяс рыноклань туй кузя. Бӧрйӧма шӧр туйвизьяс. Важ ногыд ӧнія кадӧ он нин вермы овны. И век жӧ сьӧлӧм вылын абу долыд. Республикаса народнӧй овмӧс уджаліс джӧмдалӧмӧн. Миян артыштӧм серти, кольӧм вонас эз ло мӧдӧдӧма 100 миллион шайт дон продукция. Верховнӧй Сӧветлӧн бӧръя сессия вылас, кӧні видлалӧма народнӧй овмӧс сӧвмӧдӧм кузя 1991 вося план, шуӧма чинтыштны промышленностьлысь ӧдъяссӧ. Дерт, талы уна помка эм. Но мӧдар боксянь кӧ видзӧдлыны, та вӧсна республикалӧн бюджетӧ оз во прибыль. А тайӧ миллион шайтъяс. Сэсся менӧ вӧрзьӧдӧ со мый. Огӧ на тӧдӧй, уна-ӧ тӧвар да сёян-юан воас республикаӧ выль воас. Орӧны страналӧн предприятиеяскӧд лӧсьӧдӧм йитӧдъяс. Ставыс тайӧ, ме думысь, кутас тӧдчыны миян олӧм вылӧ. Ӧні кадыс сьӧкыд, гудрасьысь. И ӧти республика некор оз вермы венны став сьӧкыдлунсӧ, кодъяс чужӧны быд лун. Колӧны ӧтувъя зільӧмъяс. Республикаса Верховнӧй Сӧвет да правительство унатор вӧчӧны, медым бурмӧдны республикаса войтырлысь олӧмсӧ. Аскиа лунӧ, 1991 воӧ ме видзӧда эскӧмпырысь. Дерт, миянлы колӧ ёна уджавны, медым петны ӧнія сьӧкыд олӧмысь.