«КОМИ МУЛЫ» БУР ТУЙ
Пыдди пуктана лыддьысьысь!
Талун тэ босьтін киад «Коми му» газетлысь медводдза номер. Выль ним улас сійӧ кутас петны вӧвлӧм «Югыд туй» пыдди. Дерт, ӧти номер серти сьӧкыд на донъявны, кутшӧм лоӧ газетлӧн чужӧмбаныс, сылӧн пытшкӧсыс, кутшӧм туйвизьяс сійӧ мӧдас талявны. Лыддьысьысьяскӧд ӧтув миянлы ёна на ковмас бурмӧдны сійӧс, мыйкӧ вежны, мыйкӧ содтыны. Но ӧтитор позьӧ шуны стӧча — «Коми му» кутас водзӧ нуӧдны «Югыд туйлысь» традицияяссӧ, артыштас став бурсӧ, мый чӧжсис тайӧ газетас уна воӧн. Дерт, ӧткымын лыддьысьысь велаліс нин «Югыд туй» дорӧ да янсӧдчыны сыкӧд зэв пӧ жаль. Та йылысь найӧ веськыда гижӧны редакцияӧ. Гӧгӧрвоам сиктса войтырлысь дойсӧ, майшасьӧмсӧ. Абу кокни торйӧдчыны бур ёрткӧд, код дорӧ велалін, кодкӧд юклін, кыдз шуласны, бурсӧ и лёксӧ. Но вывті нин шогавны, тыдалӧ, оз ков. Бӧръя кадӧ миян редакцияӧ воис уна письмӧ, кӧні лыддьысьысьяс пасйӧны, мый важӧн нин пӧ коліс вежны газетлысь нимсӧ, ӧніяыс оз лӧсяв олӧмыслы. Вӧліны и вель скӧр гижӧдъяс, лыддьысьысьяс веськыда крапӧдісны — мыйӧдз нӧ пӧ вайӧдіс миянӧс югыд туй кузя мунӧмыс! И кӧні сійӧ югыд туйыс! Унджык гижӧдсӧ вӧлі йӧзӧдӧма газетын. Татшӧм сяма письмӧ мӧдӧдысьяскӧд позьӧ, дерт, и вензьыны. Ӧд олӧмыд олӧм и эм. Оз ков сэтысь быдтор гӧгӧрвоны да донъявны пырмунігмоз, тэрмасьӧмӧн. Но сэк жӧ ёсь письмӧ гижысьясыс асладорсяньныс и стӧчӧсь, кор юалӧны, кутшӧм олӧмӧдз ми воим и коді таысь мыжа. Тыдалӧ, тырмас миянлы лэбавны енэжас, кад нин му вылын олысьяс йылысь мӧвпыштлыны, не вӧтлысьны збыльмытӧм идеяяс бӧрся, а уджавны-гӧрны мыш кӧтасьмӧныд. Сӧмын сэки мыйкӧ вежсяс ас муын, сӧмын сэки лавка джаджъясыд тырасны сёян-юанӧн.
Талун «Коми мулӧн» чужан лун. Нимкодь, мый дыр вензьӧм бӧрын, сьӧкыда, но петіс жӧ тайӧ ним улас газетным. Ми, газет вӧчысь-лэдзысьяс, гӧгӧрвоам, мый оз ло кокни аддзыны журналистъяслы выль туйвизьяс, темаяс, гашкӧ, лыддьысьысь дӧзмылас на миян вылӧ, пинявлас аслас письмӧясын. Ми огӧ кутӧй ӧвтыштчыны сылӧн мӧвпъясысь, индӧдъясысь, сӧветъясысь. Артыштам найӧс асланым уджын, петкӧдам сылысь гижӧдъяссӧ газет лист бокӧ. Мед мукӧд тшӧтш донъялӧны, вензьӧны сыкӧд. И зільны кутам сылань, медым «Коми му» газетын сетны кыв медся торъялана видзӧдласа войтырлы — кӧть сійӧ коммунист, кӧть социал-демократ, кӧть анархист. Ӧд «Коми му» тавосянь — республикаса войтырлӧн газет. Сійӧ ӧні абу кодлӧнкӧ ӧти киын, кыдз вӧлі войдӧр.
Газетлӧн учредительясӧн лоисны Коми ССР-са Верховнӧй Сӧвет, Коми ССР-са Министръяслӧн Сӧвет, РСФСР-са КП-лӧн Коми реском, «Коми котыр» общество да миян газетлӧн коллектив. Лӧсьӧдӧма и учредительяслысь сӧвет, коді кутас донъявны, кыдзи уджалӧны журналистъяс, стӧчмӧдны «Коми мулысь» шӧр туйвизьяс, вынсьӧдны редакторӧс да с. в. Ӧти кывйӧн кӧ, миянӧс виччысьӧ ӧтувъя удж, кодӧс лоӧ веськӧдӧма газетлысь и чужӧмбансӧ, и пытшкӧссӧ бурмӧдӧм вылӧ.
Бур туй тэныд, «Коми му»!
☼ ☼ ☼
«Коми му» газетса уджалысьяс пӧся чолӧмалӧны лыддьысьысьясӧс Выль воӧн, сиӧны налы кузь нэм да бур шуд. И аттьӧалӧны ставнысӧ сыысь, мый гижсисны коми кыв вылын петысь выль нима газет вылӧ.
