СТАВЫС КӦДЗИСНЫ АНЬКЫТШ

Айкатыла (Емдін у.) вӧлӧсьтын гӧрны-кӧдзны заводитісны май 24 лунсянь. Водзджыксӧ кӧдзалісны анькытш. Мукӧд сиктъясын анькытш таво эз на вӧдитлыны, а ӧні пӧшти быдӧн кӧдзис пудйӧдз да кыкӧдз. Ид кӧйдыс унджык крестьянинлӧн тырмис аслас. Удждысян тӧвариществоын, общественнӧй лавкаын да мӧда-мӧдлы отсасян комитетын ид кӧйдыс вӧлі 778 пуд, да ставсӧ крестьяна эз на и ньӧбны. Гӧльджык крестьяна дона ид кӧйдыстӧ ньӧбӧм бӧрын эз вермыны босьтны пуктас кӧйдысъяссӧ: ӧгурчи, турнепс, свеклӧ да мукӧд пӧлӧс.

Сю ӧзимъяс шӧркоддьӧмӧсь. Сӧмын ӧткымынлӧн тшыкалӧм вӧлі да, лои выльысь идйӧн кӧдзавны.

Максьӧ Вань.