ВОССИС СЕЛЬКОРЪЯСЛӦН СЪЕЗД

Юнь 10 лунӧ воссис коми селькоръяслӧн первоя съезд. Съезд вылӧ чукӧртчис ӧнӧдз 56 селькор. Съезд восьтігӧн редактор Минин ёрт висьталіс: селькоръяслы ыджыд удж лоӧ нуны, селькоръяслӧн первоя съездыс индас Ленин шуӧмъяс серти туй бурджыка уджавны да ӧтувтас селькоръясӧс ӧти гырысь семьяӧ. Селькоръяс пиысь коми йӧз виччысьӧ коми гижысьясӧс, коми литература лӧсьӧдысьясӧс.

Президиумӧ бӧрйисны 7 мортӧс: Мининӧс, Выбороваӧс, Полещиковӧс, Булышевӧс, Мишаринӧс, Попов Прокопийӧс, Горчаковӧс.

Почётнӧй шленъясӧ бӧрйисны: Сталинӧс, Бухаринӧс, Ульяноваӧс, Демьян Беднӧйӧс, Сосновскӧйӧс да А. Безымянскӧйӧс.

Съезд мӧдӧдіс приветственнӧй телеграмма «Правда» газет редакциялы.

Сэсся чолӧмъяс висьталісны: Обкомсянь — Буткин ёрт, Обисполкомсянь — Мишарин, Обкомолсянь — Полещиков, КАПП-сянь — Надеев, Обпрофсоветсянь — Безсонов, Инспекциясянь — Трофимов.

Коми гижысьяс: Савин, Попов Яков, Старцев, Колегов Ёгор, Симаков лыддисны съезд вылӧ гижӧм стихъяс — чолӧмъяс.

Выборова ёрт селькоръяссянь шуис: съезд коммунист партия индӧм кузя нуӧдас ассьыс уджсӧ, съезд вылын висьталӧмъяссӧ, индалӧмъяссӧ селькоръяс оз вунӧдны.

Кулӧм селькоръясӧс казьтыштӧм кузя делегатъяс сувтлісны, оркестр ворсіс похороннӧй марш.

Сэсся съезд редакцияса повесткаас содтіс инспекциялысь доклад.

Заседанньӧ бӧрын воссис стенӧ ӧшӧдан газетъяслӧн выставка.