ТУВСОВ АСЫВ

 

Лунсянь шоныд тӧвру пӧльтӧ —

Кольны кутіс тувсов вой;

Оз нин кынты тэнсьыд пельтӧ —

Сы вӧсна ӧні тэ збой.

 

Сиктын бура ставыс узьӧ —

Чӧскыд асъя узян ун.

Коми аньлӧн няньшом шузьӧ —

Оз тай небось сылӧн вун...

 

Вольпась вылын кысӧй кургӧ —

Небыд вольпась сылӧн бур.

Пӧльӧ лӧсьыда на сургӧ —

Сьӧкыд сылӧн пӧрысь юр.

 

Петук горзӧ «ки-ки-люль-лю» —

Коли пӧ нин тувсов вой!...

Зыбка дорын «баю лю-лю» —

Пӧчӧ лӧвтӧ ассьыс мойд.

 

Гӧгӧр кылӧ пӧтка дзользьӧм;

Ягын, кустын, гӧгӧр зык.

Сиктса челядьяслӧн гольгӧм —

Пӧтка сьылӧм оз на пык.

 

Пуяс вылысь тувсов корйӧс

Вӧрӧшитӧ небыд тӧв.

Зіля визувтӧны шоръяс...

Гидня пытшкын гӧрдлӧ вӧв.

 

Веж луг вылын уна дзоридз...

Асъя лысва уна войт

Турун вылын олӧ сёрӧдз,

Турунӧс сійӧ оз дойд.

 

Асъя кыа вылӧ кайис,

Воас регыд тувсов лун.

Мый нӧ вӧчсьӧ вӧртас саяс?!...

Тӧдас, гашкӧ, коми тун?

 

Оз тӧд, оз тӧд коми туныд,

Коми тунлы воис пом...

Вокӧ, сійӧ думтӧ вунӧд,

Мед оз шӧпӧд тэнад вом.

 

Регыд шонді вылӧ каяс,

Мулы сетас ыджыд вын.

Тувсов шонді югдӧм ваяс —

Юрысь бырас пемыд тшын.

 

Коми Мишӧ.