ЧОЛӦМБЫТТЬӦ

Кадыд дышунь моз оз куйлы —

Пыр ӧтарӧ водзӧ мунӧ,

Талун газет — «Югыд туй»-лы

Кӧкъямыс во тыран лун нин.

Сійӧ тӧдліс уна лёкъяс,

Сылӧн унатор эз судзсьыв,

Сӧмын колӧ шуны, вокъяс,

Сылӧн лун ни вой эз узьсьыв.

Лунысь лунӧ, воысь воӧ,

«Югыд туй» кӧкъямыс вонад

Коми мутӧ помысь помӧ

Гежмаліс нин бура ёна.

Медым вӧлі югыд войтыр,

Медым водзӧ олӧм вуджны —

Тіянлы ӧд, гижысь котыр,

Лоӧ вӧчны ыджыд удж на.

Пемыд сиктын сьӧкыд овны,

Эм на уна сэні лёкыс,

Унаысь на лоӧ повны

Няйт чышкигӧн бур удж бокысь;

Энӧ полӧй ті, селькоръяс,

Зільӧй водзӧ бур туй восьтны,

Сӧвет власьт тіянӧс доръяс —

Омӧль йӧзлы оз лэдз босьтны.

Ті выль олӧм лӧсьӧдігӧн,

Важ олӧмысь весасигӧн —

Сӧвет власьтлӧн пельяс-синъяс,

Сиктын медбур отсасьысьяс.

__„__

Талунсянь, ӧнісянь,

Ошка ме сьӧлӧмсянь

Тіянлысь чукӧртчӧм,

Ӧтувтчӧм-котыртчӧм!