КУИМ ВЕВСЯ ПРАЗДНИК

Коми гижысьяслӧн тайӧ лунъясӧ куим вевся (куим пӧвста) праздник. Ӧти-кӧ, тыри кӧкъямыс во «Югыд туй» газетлы. Мӧд-кӧ, воссис медводдза обласьтувса съезд газетӧ сиктса гижысьяслӧн (селькоръяслӧн). Коймӧд-кӧ, коми гижысьяс ассоциациялӧн (КАПП) лои дзикӧдз котыртчӧм.

Тайӧ праздниксӧ колӧ лыддьыны став коми йӧзса праздникӧн. Став коми войтырлӧн югдӧдчан туйыс гижӧм помын. Не кӧ гижӧдыд, некор некутшӧм йӧз эз вермы водзӧ мунны. Босьтам газет. Сійӧ — олӧмлӧн рӧмпӧштан (зеркалӧ). Сытӧг он вермы тӧдны: кӧні мый вӧчсьӧ, кыдзи колӧ выль олӧмӧ кутчысьны, кутшӧм выль законъяс лӧсьӧдӧ Сӧвет власьт и с. в.

Босьтам сэсся мӧдтор — селькоръясӧс. Найӧ лыддьыссьӧны деревняясын Сӧвет власьтлы отсасьысьясӧн выль олӧм стрӧитігӧн. Быдӧн тӧдӧны, уналаын на уджыс мунӧ неладнӧ, уналаын на веськыд туйсьыс кежӧны. Селькоръясыд и отсалӧны веськӧдны став омӧльсьыс газетӧ гижӧм пыр. Сэсся найӧ жӧ петкӧдлӧны йӧзыслы, кӧні кутшӧма олӧмыс мунӧ — бура ли, лёка ли. Позьӧ шуны: селькоръяс — деревняса синъяс да пельяс Сӧвет власьтлӧн.

Ӧні сэсся босьтам КАПП. Тайӧ организуйтчис миянын сӧмын на куим тӧлысь сайын. Тайӧ лоӧ коми гижысьяслӧн ӧтувтчӧм. Быд асногса (ас сёрниа) йӧзлӧн колӧ лоны культура. Культура кыпӧдны ӧткӧн-ӧткӧн он вермы, колӧ ӧтвылысь. Роч культура эськӧ ёна нин вылын да, воддза культураыс вӧлі буржуазнӧй. Ӧні стрӧитсьӧ выльногса культура — пролетарскӧй, медым эз вӧв лёк вылӧ йӧзсӧ нуӧдана культура, мед вӧлі выль олӧмӧ велӧдана культура. Сы вӧсна быдлаын воссьӧны ассоциацияяс пролетарскӧй гижысьяслӧн. Культура серти тӧдчӧ, ёна-ӧ йӧзыс водзӧ мунӧны оласногнас. Миян обласьтын ӧнӧдз на гижавлісны кыдзсюрӧ, разі-пели, мукӧддырйиыс весиг сямтӧг. КАПП-ын коми гижысьяс кутасны велӧдчыны гижны ӧтик ногӧнджык, ӧтик сямӧнджык, пондасны гижны уджалысь йӧзлы колан гижӧд.

Став йывсьыс ӧнія съезд дырйи бура сёрнитасны да корсясны веськыдджык туйяс, кыдзи колӧ уджавны водзӧ вылӧ.

Сьӧлӧмсянь сиам коми сӧвет культура стрӧитысьяслы бура уджавны коми йӧзӧс кыпӧдӧм вылӧ, югдӧдӧм вылӧ!