ФИЗКУЛЬТУРА ПЫР ВЫЛЬ ОЛӦМЛАНЬ

Физкультура — сійӧ, мӧд ногӧн кӧ шуны, лоӧ дзоньвидзалун вӧсна тӧждысьӧм, ассьыд вын содтӧм. Физкультура зэв нин ёна паськалі каръясын. Сиктъясӧ физкультура омӧля на пырӧ, сійӧ уджас сиктъясса организацияяс омӧля на кутчысьӧны, оз на кыскыны сэтчӧ том йӧзсӧ. А сиктъясас физкультураыс карса мозыс жӧ колӧ, оз кӧ ёнджыка. Каръясын эмӧсь быдпӧлӧс йӧзӧс югдӧдан керкаяс, карса том йӧзлы позьӧ уналаын бура пӧльзаӧн кольны прӧст кадсӧ. Сиктъясын нинӧм абу. Том йӧзлы прӧст кадас некытчӧ пырны, некӧні кадсӧ колльыны. Найӧ сэсся заводитӧны юны, косясьны, кулиганитны.

Физкультура кӧ бура сувтӧдан, том йӧзлӧн лёкторъяс ставыс вермас бырны. Физкультура кружокъяс быдлаын позьӧ вӧчны. Быд сиктын сюрӧ ӧткымын велӧдчӧмджык либӧ мыйсюрӧ физкультура йылысь тӧдысь морт, шуам, футболӧн кӧть ворсны, либӧ мӧдтор. Футбол мач судзӧдӧм вылӧ ли, мӧдтор — сьӧм уна оз мун, позьӧ сійӧс артельӧн чукӧртны, а бурыс сэтысь вывті уна лоӧ том йӧзыслы дай став сиктса олысьясыслы. Бура физкультура нуӧдігӧн том йӧз кутасны зэв гажаа пӧльзаӧн коллявны прӧст кад. Найӧ сэки оз нин мунны юны да кулиганитны. Физкультураӧн медъёна позьӧ вермасьны сиктъясын кулиганитӧмкӧд. Сэсся бара пӧльза физкультураысь сійӧ, мый том йӧзлӧн содӧ вын-дзоньвидзалун. Налы кокньыдджык лоӧ дзоньвидзанас овнысӧ да уджавнысӧ. Коймӧд-кӧ, физкультура удж нуӧдігӧн том йӧз кутасны ылыстчыны важ лёк олӧмысь, матыстчыны выль олӧмлань, нуӧдны сиктъясын выль олӧмсӧ.

Тайӧ уджӧ, дерт, медъёна колӧ кутчысьны комсомол ячейкаяслы. Налы сиктъясын быдлаын колӧ зільны лӧсьӧдавны физкультура кружокъяс. Кружокъяссӧ колӧ лӧсьӧдавны комсомол ячейкаяс бердӧ, лыддьысян керкаяс бердӧ да мукӧдлаӧ. Физкультура удж мунӧ тшӧтш йӧзӧс югдӧдан уджкӧд, нинӧмӧн оз торъяв сыысь. Кружокъясас кӧ верман сувтӧдны уджсӧ, пырысьыд кружокад лоӧ — став сиктса том йӧзыс сэтчӧ пырасны.

Ӧні воӧ нин гожӧм. Оз ков кольны бара тайӧ кадсӧ. Ӧдйӧджык колӧ кутчысьны физкультура уджӧ. Гожӧмын позьӧ лӧсьӧдны том йӧзлы уна пӧлӧс пӧльзаӧн кад коллян ворсанторъяс — футболӧн ворсӧм, мачасьӧм, сяръясьӧм, купайтчӧм да мукӧдтор.

Кӧнсюрӧ сиктъясын тайӧ уджас кутчысьӧны нин. Сыктыв уездын уна вӧлӧсьтъясын нин лӧсьӧдалӧмаӧсь футболӧн ворсан командаяс, судзӧдӧмаӧсь командаса шленъяс сьӧм вылас футбол мачьяссӧ да футболнас ворсны велӧдчан нигаяс.

Тайӧ удж дінас оз ков ӧти комсомол ячейкаяслы кутчысьны. Тайӧ став сиктса организацияяслӧн удж.

Йӧзӧс югдӧдны, воӧдны выль олӧмӧ ёна вермас отсавны физкультура.

Н-Уль.