КОМСОМОЛ, ЛӦСЬӦДЧЫ ПРИЗЫВ КЕЖЛӦ!

Куим тӧлысь бӧрын, сентябрын, 1904ʼ воын чужысь том йӧзлы лоӧ мунны Краснӧй армияӧ. Комсомоллы колӧ ӧнісянь нин лӧсьӧдчыны призыв кежлӧ.

Колян призыв дырйи комсомол эз вермы нуны лючки некутшӧм удж новобранечьяс пӧвстын. Новобранечьяс комсомолечьяс пиысь асьныс вӧлі оз тӧдны Краснӧй армияын олӧмсӧ да уджалӧмсӧ. Унджыкыс вӧлі думайтӧны, Краснӧй армия пӧ школа, сэн пӧ том йӧзӧс ёна велӧдӧны, сӧмын унаӧн оз тӧдны вӧлі Краснӧй армиялысь ыджыд уджсӧ — Сӧвет государство врагъясысь видзны.

Колян во призыв йылысь шоча да этша вӧлі гижӧны газетъясын. Уналаын на новобранечьяс важ рекрутъяс моз жӧ Краснӧй армияӧ мунігтырйи юӧны вӧлі да кулиганитӧны. Сідз кольны водзӧ оз позь, колӧ водзвыв лӧсьӧдчыны призыв кежлӧ.

Мыйяс ковмас вӧчны комсомоллы ӧні?

Первой-кӧ, колӧ новобранечьяслы бура висьтавлыны Краснӧй армия йылысь, колӧ висьтавны: красноармееч пӧ дорйӧ рабочӧйяслысь да крестьяналысь государство. Краснӧй армияын олӧм йылысь да велӧдчӧм йылысь колӧ бура да лючки висьтавны. Оз ков сӧмын шуны, Краснӧй армияын пӧ велӧдӧны том йӧзӧс бура уджавны, — колӧ, мед ставныс тӧдӧны, мый Краснӧй армияын велӧдӧны медъёна военнӧй делӧӧ, Краснӧй армияын эм военнӧй дисциплина.

Оз ков сӧмын новобранечьяс пӧвстын нуны тайӧ уджсӧ. Колӧ Краснӧй армия йылысь висьтавлыны став уджалысь йӧз костын.

Вӧлӧсьтъясын тайӧ уджсӧ лоӧ нуны лыддьысян керка пыр. Комсомоллы лоӧ избачлы отсӧг вылӧ сетны тӧдысьджык комсомолечьясӧс, мед найӧ пыр нуӧдісны тайӧ уджсӧ.

Сэсся ковмас вӧлӧсьтъясын нуӧдны новобранечьяс костын конференцияяс, колӧ лӧсьӧдавны кӧнсюрӧ спектакъяс, вечеръяс.

Ёна колӧ тӧждысьны, мед новобранечьяс важ рекрутъяс моз эз ветлӧдлыны сиктъяс кузя, мед найӧ эз юсьыны да эз кулиганитны.

Медъёна колӧ тӧждысьны, мед новобранечьяс комсомолечьяс пиысь асьныс сетісны ставныслы пример. Найӧ кӧ бура кутасны лӧсьӧдчыны Краснӧй армияын служитӧм вылӧ, сэк став том йӧзыс найӧ моз жӧ лӧсьӧдчасны призыв кежлӧ.