ИЗ ШОМ ПЕРЙЫСЬ РАБОЧӦЙЯС ОЗ ДУГДЫНЫ БАСТУЙТӦМЫСЬ

Квайт вежон нин бастуйтӧны англияса из шом перйысь рабочӧйяс, водзсасьӧны капиталистъяскӧд, оз кӧсйыны лэдзны чинтыны ассьыныс уджалан донсӧ да содтыны уджалан лунсӧ. Став англияса рабочӧйясӧс дугӧдісны бастуйтӧмысь да, из шом перйысь рабочӧйяслы лои зэв сьӧкыд. Эз кӧ эськӧ англияса рабочӧйяслӧн нырщикъясыс дугӧдны забастовкасӧ, капиталистъясыслы эськӧ ӧдйӧджык лои сетчыны, сӧгласитчыны рабочӧй корӧмъяс вылӧ. Ӧні капиталистъяс оз кӧсйыны бурӧн сӧгласитчыны рабочӧйяс корӧмъяс вылӧ. Найӧ шуӧны: сӧмын пӧ уджалан дон чинтыны да уджалан лун содтыны кӧ сӧгласитчасны из шом перйысь рабочӧйяс, позяс пӧ накӧд сёрнитны. Из шом перйысь рабочӧйяс, дерт, та вылӧ оз кӧсйыны сӧгласитчыны некор. Найӧ кӧсйӧны помӧдз косясьны капиталистъяскӧд. Налы кыдз-мый вермӧны отсалӧны став мувывса рабочӧйяс, медсясӧ нин Сӧвет республикаса рабочӧйяс. Быд пельӧсын ӧні чукӧртӧны англияса из шом перйысь рабочӧйяслы отсӧг вылӧ сьӧм. Капиталист правительствояс да рабочӧйяслы паныд мунысь йӧз кӧнсюрӧ заводитчавлісны дугӧдавны рабочӧйяссӧ сьӧм чукӧртӧмысь, да эз вермыны: рабочӧйясыд кутісны ёна дӧзмыны да найӧс лои бӧр лэдзны сьӧмтӧ чукӧртны.

Ӧні ставмувывса горнорабочӧйяс ӧтувтчӧмлӧн исполкомыс (исполком федерации горнорабочих) заседанньӧ вылас (заседанньӧыс вӧлі Брюссель карын) шуис: ми пӧ кыдз-мый вермам кутам кутны из шом мукӧд государствоясысь Англияӧ пыртӧмысь, мед пӧ англияса рабочӧйяс ӧдйӧджык вермасны капиталистъяссӧ. Сэсся исполкомыс шуис ещӧ на ёна чорзьӧдны англияса из шом перйысь рабочӧйяслы отсӧг вылӧ сьӧм чукӧртӧм.

Англияса из шом перйысь рабочӧйяслӧн забастовкаыс зэв ёна торкис государствоса овмӧссӧ. Ӧні из шом пабрик-заводъяс вылын некӧн оз судзсьы. Сы вӧсна унджык пабрик-заводъясыс вылын уджсӧ лои ёна чинтыны, ыставны удж вылысь уна рабочӧйясӧс. Забастовка заводитчӧм бӧрын уна дас сюрс рабочӧйясӧс нин дугӧдісны уджалӧмысь дай вежоннас пабрик-заводъяс вылын джын уджалан час лыдсӧ нин уджалӧны.

Англияса капиталистъяс ёна лӧсьӧдчӧны рабочӧйяскӧд вермасьны. Найӧ нуӧдӧны сёрни мукӧд государствоса капиталистъяскӧд из шом Англияӧ вайӧм йылысь. Англияса правительствоыс быд ногӧн налы отсалӧ.

Сӧмын из шом перйысь рабочӧйяс бурӧн оз сетчыны капиталистъяслы. Налӧн юръясыс Кук да Смит сьӧлӧмсяньыс мунӧны рабочӧйяс дор, найӧ оз вузавны рабочӧйяссӧ Томасъяс да Макдональдъяс моз.

СССР-са уджалысь йӧз ёна нин отсалісны англияса из шом перйысь рабочӧйяслы, сӧмын миян отсалӧмысь оз на ков дугдыны. Сӧмын став уджалысь йӧзӧн отсалӧмӧн рабочӧйяс венасны капиталистъясӧс.

Н-Уль.