ГАЗЕТӦ ГИЖЫСЬЯСЛӦН ЧУКӦРТЧӦМ

Воссис обласьтувса селькоръяслӧн съезд. Быд пемыд пельӧсысь, ылысса сиктъясысь воисны газетӧ гижысьяс. Зэв ыджыд удж налы ковмас вӧчны.

Медводзын колӧ индавны ас газетлысь нелючкиторъяссӧ, висьтавны — кыдзи бурмӧдны сійӧс, вӧчны шыльыда. Водзӧ вылӧ ковмас паськӧдны коми кывйӧн гижӧм. Миян крестьяна оз на ёна кутчысьны газетад. Селькоръяслы ковмас ёна отсавны разӧдны крестьяна пӧвстӧ «Югыд туй» да «Коми сикт».

Газетӧ гижысьяс миян абу на уна. Колян во вӧлі сӧмын 150 морт, ӧні соді 240 мортӧдз. Селькоръясыд вайӧны зэв ыджыд пӧльза. Найӧ отсалӧны кыпӧдны выль олӧм, ас гижӧднас вуштӧны мисьтӧмторъяссӧ, бырӧдӧны пемыдлун, вермасьӧны лёк войтыркӧд. Ми чайтам, тайӧ съезд бӧрти газетӧ гижысьясыд миян кутасны содны. Содӧмыс зэв колантор.

Селькоръяс оз на кужны бура гижны. Найӧ пыр на уджалӧны ӧтувтчытӧг, ӧткӧн-ӧткӧн. Мукӧдлаын эмӧсь эськӧ кружокъяс, да уджыс сэні омӧля ладмӧ. Сэсся селькоръяс мичаӧ оз тӧдны: мый йылысь колӧ ёнджыка гижны, кыдзи лӧсьӧдны стенӧ ӧшӧдан газетъяс. Съезд вылын ковмас та йылысь бура сёрнитны, корсьны веськыд туйяс.

Коми газетыд миян петӧ ӧтчыд вежонын. Быд лун ми огӧ на вермӧ лэдзны, гижысьыс этша. Селькоръяс омӧля на гижӧны комиӧн. Уна ми сёрнитам коми кыв вылӧ вуджӧм йылысь. Сӧмын отсӧг сетысьясыс абуӧсь. Неважӧн Сыктывдінкарын лои вӧчӧма гижысьяслысь чукӧр (шусьӧ «КАПП»). Гашкӧ, тайӧ чукӧрыд отсалас кыпӧдны коми газеттӧ. Селькоръяслы колӧ съезд вылын ёнджыка сёрнитны: кыдзи лӧсьӧдны коми ассьыным газет.