ЫВЛА ЙИРК

И вӧлі коркӧ пемыд арся ывла,

И керка вевт, и джуджыд енэж йир.

Ме, чуймӧм лола, помся дзорги вывлань

Да гӧгӧрвоны видлі ывла йирк.

Сӧдз ывла йиркас тіпкис уна кодзув:

Зэв ӧдйӧ кодкӧ, кодкӧ — вывті ньӧж.

И позис кӧ тадз видзӧдны и водзӧ,

То нимкодяси эськӧ олӧм чӧж.

Сэзь йиркыс вӧлі месянь сэтшӧм матын,

А сэсся ачым йиркнас лои топ.

Виж кодзувъясыс тёльскысисны меӧ...

И кыдзи сэки сьӧлӧмӧй эз пот?

Но сӧвмис сьӧлӧм, сӧвмис уна кӧсйӧм,

И кодзувъяссӧ судзӧдалі бӧр.

Ӧд натӧгъя нин туйӧй менам ӧзйӧ,

Ӧд натӧгъя нин аддза олӧм сьӧрт.

Да йиркыс абу — гольдіс ывла веркӧс

Ли помтӧмлунӧ пӧрис коркӧ кад,

Кӧть важ моз аслас инын бать-мам керка

И весьтас йӧгзьысь кодзувъяса лад