ВОЧА КОЗЬНАЛӦМ

Мывкыд сетан висьт

Бать вайӧдіс кык арӧса Варукӧс пӧч-пӧль дорӧ. Преник-кампет налы козьналіс. Пӧль аттьӧаліс сійӧс да сетіс ма доз:

— А со тіянлы водзасьӧм!

Дзоля гӧстя тайӧс пель сайӧ сюркняліс. Батьыс уджавны муніс, а Варук кольччис татчӧ. Пӧчӧ ыдждӧдлӧ нучкасӧ принцессаӧн. Пӧль думӧн шуӧ сійӧс аканьӧн. Выль платтьӧасьӧма, кудриа юрсисӧ кутыштӧма югыд пажукӧн. Нырсӧ лэпталӧмӧн ветлӧ, синъяссӧ лап-лапкерӧ. Оз на сёрнит, но шулас «мам», «да», «на», «вай». Тешкодя нимтӧ асьсӧ — «Нана». Сылы кӧ мыйкӧ колӧ, чуньӧн индӧ ас вылас: «Вай! Нана!». Регыд, тыдалӧ, пондас варгыны да быдтор юасьны.

Керка кутысь лунбыд ноксьӧ град йӧрын. Тані быдмӧны вотӧс ваян пуяс и кӧдза-пуктас. Эм мазі пасека, гулю чом, курӧг поз, кролик видзанін. Нучкакӧд гажаа кад коллялӧны. Ӧтвылысь то лэбачӧн нимкодясьӧны, то кролик видзӧдӧны, то кисьмӧм вотӧс видлӧны.

Пӧчлӧн наысь гажыс бырис. Пажнайтны корӧ, кылӧ. Дасьтӧма пӧтӧса пажын: яя шыд, йӧла рок да компот. Пӧль дӧвӧля шуис: «Шыд да рок — медбур вок!». Окотаысь сёйыштіс. А Варук сӧмын шыдсӧ паньыштіс. Сёйигъясас век нямлясьӧ. Пӧчыс ворсӧдчана шуис:

— Коді сёйӧ бура, сылы кӧвдум сюрӧ!

Пӧль компот юӧ да веж петан кӧвдум курччышталӧ. Варӧ мырдӧн корӧ:

— Вай! Нана!

А пӧчӧ паньӧдӧмӧн вердӧ сійӧс:

— Шаня пукав, бобӧ, сёйышт.

Лоӧ видлыны роксӧ, оз эськӧ ков да. Ак, кутшӧм чӧскыд! Нывка босьтіс киӧ пань. Роксӧ бырӧдіс, шыдсӧ кураліс. Пӧльыс банйӧм кӧвдум сылы мыччис:

— Тэ, Варӧ, молодеч!

Ас пӧжас быдӧн радейтӧ! Варук кӧвдумтӧ нюм-нямкерис — и абу. Долыдла пӧльлӧн гудӧк улӧ йӧктіс. Пӧч-пӧльсӧ гажӧдіс. Ӧд налы любӧ видзӧдны муса гӧганыв вылӧ.

Пӧльыс вӧчӧма кага пызан да ляпкыдик пу джек. Пӧч вурӧма дӧра акань. Варук аканьӧс новлӧдлӧ моздорын, ӧввӧӧдӧ. Сэсся пуксис выль пызан сайӧ. Дыркодь акварельӧн рисуйтчис, пластилинысь мыйкӧ лясӧдіс. Вӧлӧмкӧ, дасьтӧма козинтор. Пӧльлы сетіс пластилинысь вӧчӧм кӧлач, а пӧчлы — рисуйтӧмтор. Олӧма йӧзлысь сьӧлӧм вӧрзьӧдіс.

Козин любитӧ воча козьналӧм!