МИЧАИН

Шоныд керка, гажа йӧр,

енэж рӧма ю да вӧр,

парма шӧрын оланін –

тайӧ менам чужанін.

Матыс рӧдвуж, муса горт,

дона школа, уна ёрт,

коми йӧзлӧн быдманін –

тайӧ менам чужанін.

Тӧлыс кузь, а кӧдзыд яр,

сӧмын гожӧм, тулыс-ар

ловзьӧдӧны гажаин –

тайӧ менам чужанін.

Льӧм да пелысь, вадор видз,

ниа, пожӧм, ловпу, кыдз,

помтӧм нюр и козъяин –

тайӧ менам чужанін.

Вотам сэтӧр, чӧдлач, пув,

мырпом, оз да турипув,

гӧгӧр сымда тшакаин –

тайӧ менам чужанін.

Важ моз корӧсь кӧртавлӧм,

чери кыйӧм, вӧралӧм,

пӧльлӧн лэч туй, кыйсянін –

тайӧ менам чужанін.

Войвыв муӧй, оландыр,

гажлун, шуда челядьдыр,

мирын медся мичаин.

мирын медся мичаин.