




ЖЕНЯ*
* Журнал вариант.
ПОВЕСЬТ
ӦНІЯ КАД
Кор Евлогий Дмитриевичлы вӧзйисны тшӧтш кайлыны юрсиктса ансамблькӧд Кушашор сиктӧ, сійӧ эз дыр и думайт. Ӧд пенсия вылӧ петӧм бӧрас Лыюров некытчӧ прамӧя эз ветлыв. Гожӧмсӧ да тӧвсӧ пыр гӧтырыскӧд кыкӧн гортас кургисны, а тулыс-ар вӧрті да ю бокъясті кок веськӧдігмоз гызмасьліс, кузь турунъяс пӧвстӧд лысва кӧвтіс. Дерт, бӧръя воясӧ вӧр лэдзысьяс чорыда босьтчисны топӧдны кыйсьысь войтырӧс, сідзи и жмитӧны, веськыда вӧтлӧны пармаысь. Кык во сайын ытшкисны-пӧрӧдісны куим ыджыд делянка, та вӧсна Евлоглы ковмис эновтны Парма Чуркйысь кык лэч туй да вӧр керкасӧ, кодӧс кызь во сайын дас квайт арӧса пиыскӧд кыкӧн кыпӧдлісны. Дерт, эськӧ бӧрдмӧн жаль, но некытчӧ он воштысь. Ӧні, мед сэні быдмас выль вӧр, колӧ виччысьны сё во. Матіникын Лыюровлӧн коли кык дженьыдик лэч туй, сэні арнад и бурмӧдӧ сьӧлӧмсӧ.
Уна ва нин визувтӧма сэсянь, кор сійӧ эновтіс велӧдны челядьӧс да вуджис, кыдзи сэк шуисны милиция уджын тайӧ нырвизьсӧ,
**
— Кытчӧ нӧ сюйсян?! Тэнад юрыд эм али абу?! Да ӧд милицияад став юысьыс да гуляйтысьыс и поздысьӧмаӧсь! Тэ сэні тшӧтш юсян, пӧдруга лӧсьӧдан, семьяыд киссяс, ассьыд морт сямтӧ воштан! Школаад тэ пыдди пуктана мортӧн вӧлін, а милицияад пыран, да быд паныдасьысь кутас тэныд бӧрвывсяньыд мышкад сьӧлавны!
Но эз кывзысь налысь Евлогий Дмитриевич, дыр кад уджаліс милицияын, кодлысь нимсӧ бӧрыннас «тӧлка юралысьяс» мыйлакӧ вежисны бур йӧзлы ньӧти кажитчытӧм полиция вылӧ. Ёна кытшлаліс районса сиктъясті, быдлаын ӧд судзсьӧны кывзысьтӧм челядьыд, кодъясӧс колӧ кутны тӧд вылын, мед дас кӧкъямыс арӧс тыртӧдз кыдзкӧ видзны найӧс тюрмаӧ веськӧдчӧмысь. А верстьӧ кадыс воас, да сэки мед асьныс бӧрйӧны олан визьсӧ, кодарӧ сынны.
Кушашорӧ Лыюров унаысь жӧ воліс. Сэки юрсиктсянь туйыс, позьӧ шуны, эз вӧв, пуксьыліс сӧмын тӧвнас, кор «генерал Мороз» пыдӧдз кынтыліс мусӧ. Сэк туйыс шогмис машинаясӧн журъявны, но сы пуд мукӧд пӧраас Веждінын дугдывтӧг уджаліс аэропорт, и шондіа мича лунъясӧ ветлысь-мунысь войтырсӧ мездлывліс кык борда Ан-2, кодӧс войтырыс радейтӧмпырысь нимтылісны Аннушкаӧн. Но Сӧветскӧй Союз киссьӧм бӧрын аэропорт тупкысис, посни самолётъясӧн лэбалӧмыд капитализм дырйиыд эз ло рентабельнӧй... Ӧні Веждінсянь Кушашорӧдзыс и водзӧ на вольсыштчӧма кӧнсюрӧ шыльыд, а мукӧдлатіыс жугласьӧм асфальт, да во гӧгӧр сэтчӧ-татчӧ жӧдзӧны автобусъяс.
Клубын концерт дырйи Лыюров веськаліс пукавны орччӧн школаса вӧвлӧм директор Михаил Прокопьевич Игнатовкӧд. Мортыс кольӧм каднад прамӧя пӧрысьмӧма, дзормӧма, чужӧмсӧ удитӧмаӧсь серлӧдлыны джуджыд чукыръяс. Но пыр на важкодьыс тэрыб восьласа, збодер.
— О-о, Евлогий Дмитриевич, сё петук! Эг куж весиг мӧвпыштлыны, мый волан на миян сиктӧ, — сійӧ топыда жмитліс Лыюровлысь кисӧ. — Зэв рад тэнӧ аддзывны, зэв рад!
— Вӧзйисны тай. Кӧсъян кӧ пӧ пӧрысь лысьӧмтӧ пыркӧдыштны, кайлам Кушашорӧдз, а ме эг вермы ӧткажитчыны.
Михаил Прокопьевич, меным зэв жӧ нимкодь, удайтчис паныдасьлыны тіянкӧд да! — воча нюмъяліс Евлогий Дмитриевич.
Лыюров чайтӧм серти, Игнатов сӧмын концертсӧ видзӧдны локтӧма, но кор мортыс кушашорса аньяскӧд тшӧтш кайис сцена вылӧ сьывны, гӧгӧрвоис, вӧлӧмкӧ, Михаил Прокопьевич пырӧдчӧ на и художественнӧй самодеятельносьтӧ.
Концерт помасис, да кыдзкӧ друг Евлогий Дмитриевичлы уси дум вылас:
— Михаил Прокопьевич, помнитанныд, кор ме ИДН-ын на уджалі, матысянь тӧдмасьлі тіян сиктса детинка Женя Павловкӧд? Уна и вир сійӧ менсьым некутшӧм закускатӧг юис! Со и кӧсъя юавны, верстяммис да кутшӧм морт сыысь артмис, кыдзи ӧні сійӧ олӧ?
* * *
ИДН кабинетын пызан вылас инас оз ӧшйы, быдсӧн доналӧма, чеччалӧ-триньгӧ телефон.
— Час локта, локта, недыр виччысьлыны он вермы! — Евлог пырис ӧдзӧсӧд да лэптіс трубкасӧ. — Кывза.
— Лыюров, кӧн нӧ шӧйтан?! Удж вылад, видзӧда да, он и пыравлы! — кыліс РОВД*-са дежурнӧйлӧн гӧлӧсыс. — Век тэнӧ корсьны колӧ!
* РОВД —
— Гежӧдика вола жӧ, то тай кыйин...
— Скачӧн дежуркаӧ! Тані тэнсьыд воспитанниктӧ кутісны, дзоляник, а зэв тэрыб, сідзи и чеччалӧ, дзик шлочкан гаг кодь, быттьӧ кытчӧкӧ бӧрладорас сылы пытш пырӧма!
— Но, час, диван вылӧ нюжӧдчыла, вугыртла, пӧсь тшай ырснитышта да локта, эн бӧрд. Видзӧдла, кутшӧм шлочкан гагйӧс тальыштінныд.
РОВД-са дежурнӧй юкӧнын бӧра улӧс вылын пукаліс турунвиж курткаа, школьнӧй пемыдлӧз костюма ар дас ӧтика детинка.
Туша-мыгӧрыс сартас кодь косіник, сэтшӧм жӧ вӧсньыдик чужӧм-рожаа, потӧм стеклӧа ӧчкиа. Кокас детинкалӧн важиник сьӧд «дутик». Аддзис Лыюровӧс да чатӧртчис, и нюмсорӧн видзӧдліс сы вылӧ, тані сійӧ ставыскӧд нин тӧдмасис, а пырысь милиционерыс вӧлі выль морт. Сылӧн видзӧдласысь Евлог ыджыд пыдди пуктӧм эз казяв.
— Гырысь шышъяссӧ кутавны удачаныс абу да поснияс вылӧ уськӧдчисны, но и сыщикъяс! — катлӧдлыштіс юрсӧ Евлогий Дмитриевич. — И абу жаль татшӧм дзоляникыс?
— Синва сорӧн тай вайӧдісны, бӧрдмӧн пӧ эськӧ жаль детинаыс да, но кытчӧ воштысян, быть пуксьӧд, — оз весиг нюмды дежурнӧй. — Гастрономӧ кыдзкӧ вентиляция трубаӧдыс кыссьӧма да ставсӧ сэні пузувтӧма, потмӧныс сёйӧма-юӧма да сэтчӧ и унмовсьӧма. Вузасьысьясыс пальӧдӧмаӧсь морттӧ, а сійӧ садьмӧма да консерв банкаясӧн найӧс лыйлыны заводитӧма, вот шошукӧдыс татчӧдз и кыскисны.
— Но и йӧз, сёяныд нин кагаыдлы жаль лоӧма! А мортыслӧн ӧд кынӧмыс сюмалӧ! Ачыд нӧ кытысь лоан, мыйкӧ тай Веждінысь тэнӧ эг на аддзыв? — бергӧдчис магазинса сёян радейтысь детинкалань Лыюров.
— Ме ылысь, тасянь оз тыдав, — гоньӧга кыпӧдіс юрсӧ ичӧт шыш.
— Тані гижалім нимсӧ и ставсӧ, — дежурнӧй вештыштіс Лыюровлань журнал.
— Ноко, видзӧдлам. Павлов Евгений Егорович, чужлӧма сюрс ӧкмыссё сизимдас кыкӧд воын Кушашор сиктын. Мамыд абу Мария Кирилловна?
— Мария Кирилловна, а тэ кысь тӧдан?
— Тӧдмасьлім коркӧ важӧн нин. Кыдзи нӧ ӧні сійӧ олӧ?
— Эн кывлы? Сійӧ ӧд кувліс, батьӧ ёна вӧлі нӧйтӧма да.
— Но-о! Кувліс, сідзкӧ, эг на и тӧдлы... А тэ тані мый вӧчан? Чужанінад ӧд овны колӧ, кытчӧдз он быдмы. Ыджыд мамыд, кӧнкӧ, бӧрдігтырйи корсьысьӧ, а тэ юрсиктын магазинъяс пыркӧдан да вузасьысьясӧс банкаясӧн лыйлан.
Детинка гораа кыскыштіс нырнас:
— Путешествуйта.
— Но, мунам менам кабинетӧ, путешественник, милицияад тэ кодь посни йылӧмтӧ дыр видзны оз позь, дуксьыны верманныд.
ИДН кабинетын Лыюров кӧсйис на сёрнитыштны Женякӧд, мед матысяньджык тӧдмасьны, но видзчысьтӧг локтіс орчча сиктса учительница, зэв активнӧй морт, кодкӧд вель дыр ковмис варовитны удж кузяыс. Детинка сюся кывзіс налысь сёрнисӧ, а мыйӧн ань эновтіс найӧс, то юаліс:
— Коді нӧ тайӧ бабаыс?
— Абу баба, а ань!
— Но, коді, сідзкӧ, тайӧ аньыс?
— Тайӧ аньыс зэв пыдди пуктана морт, милицияса внештатнӧй сотрудник, — вочавидзис Лыюров да содтіс: — И общественнӧй воспитатель!
— О-о! — Женя гӧгӧрвоана кыпӧдліс синъяссӧ йиркӧдзыс. — Зэв тай ыджыд йӧг вӧлӧма!
— Да, а кыдз тэ чайтін? Но, талун кежлӧ эштӧдам, мунам.
— Кытчӧ?
— Ме дорӧ гортӧ, узьны, оз ӧд, буракӧ, тэнӧ вит кодзула отельӧ вой кежлас овмӧдны.
Рытланьыс сэзьдӧма, енэжын югъялӧны кодзувъяс, пашляк лыйсьӧ, керкаяс костӧд шляйтчӧ кӧдзыд тӧв, но та вылӧ видзӧдтӧг пӧнара сюръя улын туй вылас детинкаяс чилзігтырйи чужъялӧны мач.
Мыйӧн Павлов матыстчис на дорӧ, пыр жӧ чорзьӧдіс гӧлӧссӧ да уськӧдчис найӧс видны:
— Ті мый тані чарзанныд? Бур йӧзыс сьӧкыд удж бӧрас гортаныс шойччыны кӧсйӧны, а ті шумитанныд, кулиганъяс!
Быттьӧ мачӧн ворсанныд, а асьныд сійӧ и видзӧданныд, мед мыйкӧ пазьнитны, а то и гусясьны кытчӧкӧ пыранныд!
— А тэ нӧ, шкет, коді сэтшӧмыс, мед миян вылӧ горзыны?! — челядь дугӧдчисны ворсӧмысь да чуймӧмӧн кытшалісны Женяӧс.
— Ме — милицияса внештатнӧй сотрудник, — да неыджыд кост вӧчӧм бӧрын содтіс: — И общественнӧй воспитатель!
— Кыськӧ! — некымынӧн серӧктісны. — Аддзылім ми татшӧм воспитательястӧ!
— Он эскӧй? То Евлогий Дмитриевичыслысь кӧть юалам! — индіс Павлов на дорӧ матыстчысь Лыюров вылӧ. — Но мый, лейтенант ёрт, мӧдім? Миян уна на уджыс. А ті тані энӧ нинӧм пакӧститӧй, а то ӧд асланыд юр вылӧ лёк ваянныд. Сэки эськӧ и гӧгӧрвоанныд, но сёр нин лоӧ! Мыйкӧ кӧ лёктор вӧчанныд, ми тіянӧс аддзам, менам паметьыд бур, сідз ӧд, Евлогий Дмитриевич?
— Сідзи, — сӧгласа довкнитіс юрнас Лыюров.
И Женя гоньӧга, юрсӧ вылӧ кыпӧдӧмӧн, ылыстчис Лыюровкӧд орччӧн челядь дорысь. Детинкаяс сідз паськӧдӧм вомъясӧн и колисны.
Варя ньӧти эз чуймы, кор аддзис, мый верӧсыс удж вывсьыс локтіс эз ӧтнасӧн, ичӧт нывкаясыс жӧ вежӧс сай ӧдзӧсӧд юрнысӧ боквыв пӧлыньтӧмӧн видзӧдісны тӧдтӧм детинка вылӧ.
— Тӧдмасьӧй, тайӧ Женя, тавой узяс миян дорын, а аски ме нуӧда сійӧс гортас. А тайӧ, Женя, менам гӧтыр — тётя Варя, и нывъяс: Наташа да Света.
— Пӧрччысьӧй жӧ, мужикъяс, да ужнайтамӧй ӧтлаын, кадыс абу нин водз, он и тӧдлы, кыдз водавны ковмас, — тэрмӧдлыштіс Варя.
Наташа да Света тшӧктытӧг гольӧдчыштісны мыссян доз дорын, мыссисны. На вылӧ видзӧдӧмӧн и Женя тшӧтш мода вылас кӧтӧдліс бура ёна нин няйтчӧм кияссӧ, пуксис пызан сайӧ да зэв горша уськӧдчис сёян вылӧ — прамӧя мортыс тшыгъялӧма ыджыд мамыс дорысь пышйӧм бӧрад, йӧзыд ӧд некод оз ӧдӧбты сійӧс чӧскыда вердны. Варя пукаліс да быттьӧ эз и казяв, кутшӧм зіля Женялӧн уджалӧ пань кутысь киыс. Сійӧ некор эз юасьлы вайӧдӧм челядьлысь, кутшӧм сиктысь сійӧ, эмӧсь али абуӧсь сылӧн бать да мам, кыдзи веськаліс юрсиктас и мыйла тані сылӧн узяніныс абу. Мӧд лунас ас костаныс гозъя та йылысь сёрнитасны, Варя ставсӧ юасяс, сылы ӧд ставсӧ жӧ тӧдны колӧ.
Асывнас пемыд на вӧлі, кор Лыюров да Женя пуксисны кӧдзыд важ автобусӧ, кытӧн ӧдзӧс гӧгӧрса костъясӧдыс шутьлялӧмӧн тӧлыс кыдз пырӧ, сідзи и петӧ, Евлог пыр и кыліс, кыдзи кӧдзыдыс ньӧти яндысьтӧг сюйсьӧ паськӧм улас. Бур, мый лымйӧн шыльӧдӧм туй кузя некутшӧм мытшӧдтӧг воисны Кушашорӧ. Сиктса керкаяслӧн югыд ӧшиньясыс сюся дзоргисны туй вылӧ, зілисны тӧдмавны, кодъяс нин асывсяньыс татчӧ воисны автобуснас. Ветлысьяс эз вӧвны, сӧмын скӧр тӧлыс шутьляліс сюръяяс вылӧ ӧшлӧм проводъясын.
— Ті ӧд, Евлогий Дмитриевич, онӧ тӧдӧй, кӧні ыджыд мамӧлӧн керкаыс?
Лыюров казявтӧг эз ов, кыдзи Павлов мыйлакӧ вежис ассьыс сёрнитанногсӧ, кутіс сійӧс ыдждӧдлыны.
— Ог, дерт, кысь меным быд мортлысь оланінсӧ тӧдны.
— Локтӧй, петкӧдла.
Сиктсӧветсянь абу и ылын вӧлӧма кык вежӧса неыджыд важиник керка, кӧні Женя олӧ ыджыд мамыскӧд. Кайисны кильчӧ вылас, видзӧдлісны: ӧдзӧсыс томана.
— Но! Кытчӧкӧ удитӧма нин уйкнитны, бара тшук школаӧ, некыдзи оз вермы торйӧдчыны, быттьӧ сытӧг оз справитчыны, — детинка нюжӧдчыліс ӧдзӧс юрйылас, судзӧдіс сэтысь гӧрд кӧвъя ключ да восьтіс томансӧ.
— Пырӧй, шонтысьыштӧй, кӧдзыд автобусад пукалігад, кӧнкӧ, ме моз жӧ дзикӧдз изӧймитінныд.
— Кынмыштӧма и лои, — эз соссьы Лыюров.
— Воськовтӧй водзӧ, личӧдчӧй. То татчӧ тувъяс пасьтӧ да шапкатӧ ӧшӧдӧй.
«Мыйкӧ вывті нин шаньӧн да культурнӧйӧн детинкаыс лои, дзикӧдз вежсис мортыс, — мӧвпыштсис Лыюровлӧн, — мый бара водзӧ лоӧ-а?» Евлог пӧрччысис да пуксис пызандорса ас вӧчӧм пу диван вылӧ. Керка пытшкӧсыс дзик сэтшӧм, кутшӧм сылӧн Дёмаса чужаніныс. Жырйыслысь нёльӧд пайсӧ босьтӧ ыджыд пач, сыкӧд орччӧн гӧбӧч выв, пӧлать, йирк бердті нюжӧдчӧм сёръяс вылын тыдалӧны лук тыра ящикъяс. Керкаӧ писькӧдчӧм шонді югӧръясын йӧктӧны бус чиръяс.
Женя пыр жӧ ва пельсаысь кӧшӧн кисьтіс электрочайникӧ ва да чуткис вилкасӧ розеткаӧ, ваяліс пызан вылӧ кутшӧмсюрӧ сёян, кампет-печенньӧ, варенньӧ.
— Час сэсся чай юыштам, ті пока пукыштӧй тані, шойччыштӧй, ме ӧдйӧ.
Ачыс Женя пӧрччысьлытӧг сідзи и педзӧ ӧтарӧ-мӧдарӧ, нинӧм он шу: кӧзяин воис гортас. Котӧрӧн петаліс ывлаӧ, бӧр пырис, бара петіс. Регыд чайникын ваыс пузис, Лыюров кыскис вилкасӧ розеткаысь, гонькнитліс ӧтарӧ-мӧдарӧ: кӧн нӧ детинкаыс? Пукалыштіс, чеччис да видзӧдалыштіс стенса ыджыд рамаысь фотокарточкаяссӧ.
Кытчӧ нӧ Женяыс вошис? Коли дас минут, кызь. Евлогий Дмитриевич чеччис да петіс посводзӧ, сулыштіс, чукӧстіс:
— Женя!
Некод эз вочавидз. Кӧсйис петавны кильчӧ вылӧ, кутчысис ӧдзӧс вугйӧ, нетшыштіс асланьыс, но ӧдзӧсыс эз воссьы, ывласяньыс томана, Женяыд игналӧма сійӧс! Вот каналльӧ тошыд! Но и Женя! А дивӧ тай! Мый вӧчны?
Дёмаын Евлогъяслӧн важ керкаас эм паськыд сарай ӧдзӧс, кыті мӧс видзысь войтырыс пырӧны сарайӧдз турун доддьӧн, сэті позьӧ петны ывлаӧ, тані ӧд тшук сэтшӧм модаа жӧ. Лыюров петіс сарайӧ да ӧзтіс пӧнарик, командировкаад мунігад пыр сійӧс сьӧрсьыс босьтлӧ, он ӧд и тӧдлы, кор ковмас. Збыль, сарай ӧдзӧсыд эм. Босьтіс тассӧ, восьтіс ӧдзӧссӧ да петіс ывлаӧ. Кытшовтіс керка гӧгӧрыс, кайис кильчӧ вылӧ, малыштіс ӧдзӧс юрйывсӧ, ки улас сюри ключ, восьтіс томансӧ. Бара пырис сарайӧ, сиптіс паськыд ӧдзӧссӧ да тасаліс потшнас, мед нин ставыс лючки-ладнӧ кольӧ. Пыраліс керкаӧ, пасьтасис, петіс, томналіс кильчӧ ӧдзӧссӧ да ключсӧ ӧдзӧс юрйылас бӧр сюйыштіс.
— Женя! — выльысь на мода вылас нин горӧдіс, но детинка некӧн эз тыдав. Ковмас ветлыны участкӧвӧй кабинетӧдз. Мый тон вӧчан? Гортсьыс пышйӧм детинасӧ кутісны Веждінын, Лыюров узьтӧдіс сійӧс гортас да талун катӧдіс Кушашорӧ, мед сэсся ыджыд мамыслӧн син водзын лӧсьыда нин олас, а оз шӧйт район пасьтала да гусясь ӧтилаысь да мӧдлаысь. А тані Женюкыд, шег ыджда детинаыд, йӧйтӧдліс сюра-тошка мужикӧс, ыджыд мам керкаас колис чайник дӧзьӧритны, а ачыс бара кытчӧкӧ вуштыштіс. Ӧні сэсся сійӧс и корсь!
А кутшӧмкӧ неминуча кӧ детинкаыскӧд лоӧ, машина улӧ сюрас, либӧ ещӧ мыйкӧ? Сэки мыжанас петас ИДН-са инспектор Лыюров!
Татшӧм шуштӧм мӧвпъясӧн Евлогий Дмитриевич пырис участкӧвӧй дорӧ и сэні нюммунӧмсьыс сылӧн муртса черлыыс эз пот: участкӧвӧй Прошкин гӧрд юрсӧ гыжъялігтыр пукалӧ пызан саяс да ворсӧ шахматӧн Женя Павловкӧд!
— Привет, челядь милиция! — чолӧмасьӧм могысь Прошкин нюжӧдіс кисӧ. — Вот туй вежысь куті брӧдягатӧ, юрсиктӧ мунысь машинаяс нин вӧлі сувтӧдалӧ, оз овсьы сылы Кушашорад, лолавнысӧ пӧ сьӧкыд, паськыдінӧ кыскӧ.
А Женя кыпӧдіс Лыюров вылӧ сералысь синъяссӧ да вель дыр видзӧдаліс сійӧс, быттьӧ кутшӧмкӧ гутӧс, коді кыдзкӧ веськалӧма тайӧ кабинетас.
— Фу-у! — кокньӧдыштіс сьӧлӧм вылас «челядь милициялӧн». — А ме нин повзьылі, гашкӧ, мися, мыйкӧ мортыскӧд лои...
— Такӧд, бара-й, некор нинӧм оз ло. Ачыс кӧть дзоляник, пыста кодь и эм, а сюсь! Кык син костсьыд ныртӧ гусялас да висьталас, тадзи пӧ чужӧмсяньыс и вӧлі. То тай, он и тӧдлы, регыд мат меным пуктас. Вай, Евлогий Дмитриевич, кутшӧмкӧ тӧлка сӧвет меным сет, а то ӧд позор, сиктӧ петны да бур йӧзыслы синмас видзӧдны яндзим лоас. Кутасны шуны: «Эк тэ, мужик, джекпом судта детиналы сетчин!» Збыль, шахмат пӧв вылын Прошкинлӧн делӧясыс вӧліны эз ёна бурӧсь, Павлов жмитӧма участкӧвӧйлысь корольсӧ пельӧсӧ да сідзи и зырӧдӧ, азартнӧя шах бӧрся шах пукталӧ, ӧдвакӧ сьӧд величестволы сэні сюрас кутшӧмкӧ петан туй.
— Тані тэныд коли сӧмын кыкнан китӧ вывлань лэптыны, а корольтӧ пӧрӧдны, — пыр и сюрис Лыюровлы бур сӧветыд.
— Аттьӧ, другӧ, ёна тай отсалін, — дзикӧдз рушмӧм чужӧма Прошкин пӧрӧдіс корольсӧ, чеччис пызан сайысь да тэрыба уськӧдчис мерайтны кабинетсӧ паськыд воськовъясӧн пельӧсысь пельӧсӧ. — Став нервӧс тшыкӧдіс тайӧ ӧчкарикыс! Сиктса главнӧй милиционерыслысь вирсӧ кушӧдз ырскис! Мый жӧ вӧлі петкӧдлыны, быттьӧкӧ ворссис, и аслыс эз вӧв забеднӧ, и меным, олӧма мортлы, сьӧлӧм вылын долыдджык. Ог прӧстит, ог! Вай выль партия видлам!
Но и выль сконас участкӧвӧйлы удачаыс эз нюммун, бара Женя «пӧрысь мортӧс» матуйтіс.
— То ӧд, тӧлка, юра детина! И мыйла сылы лӧсьыда оз овсьы? Школаад вермис эськӧ кузяла отличникӧн лоны, зарни медаля аттестатӧн петны, но оз кӧсйы велӧдчыны, и ставыс, сӧмын пакӧститны да гортсьыс пышъявны и видзӧдчӧ! — чуймаліс Прошкин. — Ӧти кадӧ школаас дугдӧма ветлӧдлыны. Ёртъясыслы тшӧктас юӧртны учительыслы, быттьӧ висьӧ. Асывнас гортас ыджыд мамыслы шуӧ, школаӧ пӧ муна, а ачыс кӧнкӧ конюшняын да, мый да шландайтас лунтыр. Книга да тетрадь тыра сумканас пуксяс кытчӧкӧ да урокъяс учебникъяс сертиыс велӧдӧ, гортас локтас да зэв делӧвитӧя рытнас гортса уджъяс вӧчалӧ, кодӧс быттьӧ школаын сетісны, ыджыд мамыс ӧд ставсӧ прӧвериталӧ. Кутшӧмкӧ кад кольӧм бӧрын сылысь став сюсялӧмсӧ эрдӧдасны да казяласны, мый аслас класса велӧдчысьясыс Павловысь кольӧмаӧсь, ылӧ водзӧ детинаыд кырссьӧма-мунӧма! О! Кодкӧ таркӧдчӧ! Тшук ыджыд мамыд тэла локтіс, — Прошкин видзӧдліс Павлов вылӧ. — Пырӧй, абу игана!
Ӧдзӧс воссис, да кабинетӧ тювкнитіс банйӧм чужӧма, видзӧдӧмпырысь ар квайтымын вита тоин кодь косньӧдіник ань. Лӧсьыда пасьтасьӧма, абу выль, но зэв на скодитана лӧз пальтоа, пухӧвӧй чышъяна, кокас кӧр сюръяса серпаса пими.
— Вот, Елена Васильевна, Евлогий Дмитриевич Веждінсянь вайӧдіс гортӧдзыд Женяӧс, а сійӧ аттьӧалӧм пыдди морттӧ игналӧма керкаас ӧтнассӧ, ачыс жӧ туйвежӧ вуштыштӧма да сэні машинаяс сувтӧдалӧ, мед бӧр юрсиктӧ, а колӧкӧ, и карӧдз уйкнитны. Бур, мый ме сэтчӧ веськалі да куті сійӧс... Гырысь йӧзӧс ньӧти пыдди оз пукты, тіянӧс виччысигкості менӧ кыкысь матуйтіс. Тадзи ӧмӧй позьӧ?! Босьтӧй ассьыныд внуктӧ да нуӧдӧй гортаныд! Женя, гортад ӧд ыджыд мамыд ордын лӧсьыдджык жӧ овнытӧ: вевт улын, шоныд, кынӧмыд пыр пӧт. Оз нин ков кыськӧ гусясьны, мед пӧткӧдчыны! Сідзи абу?
— Сідзи, — гогнитіс юрнас Женя, быттьӧ ньылыдаліс участкӧвӧйлы, а мый сійӧ збыль вылас думайтӧ, некод эз тӧд.
— Но, мунам жӧ, инад ӧшйытӧм мортӧй, — Елена Васильевна тапкис внукыслы мышкас. — Извинитӧй, пӧжалуйста, мый тіянӧс тшӧтш Женя дӧсадитӧ. Мый бара-й тэысь артмас-а, кор быдман?
Прошкин колльӧдіс синъяснас ыджыд мама-внукаӧс да бергӧдчис Евлоглань:
— Тайӧ миян том криминальнӧй поколенньӧ. А Елена Васильевна менӧ велӧдліс на посни классъясын. Коркӧ посёлокас мунігӧн аддзыси сыкӧд, и корис, мед ме пырала ныв дорас да видзӧдла налысь оласногсӧ. Кад торйӧді да пыралі. Керкаыс эз вӧв игана. Надзӧникӧн восьлала да кыла, кыдзи кадысь кадӧ зэв гажаа серӧктывлӧ кага. Видзӧда да, мыськавлытӧм няйт джоджас пач пельӧсас пукалӧ ар нёля детинка. Дӧрӧм кежысь, гачтӧм. Ме вылӧ эз и видзӧдлы. Стена-джоджа костас вель ыджыд гӧгрӧс розь. И вот пукалӧ Женя, сы водзын джоджас нянь корка куйлӧ. И друг розьсьыс зэв ӧдйӧ чепӧсйӧ ыджыд крыса, курччӧ няньсӧ да пышйӧдӧ розьӧдзыс, но няньыс розяс оз тӧр. Крыса дзебсьӧ, а Женя вак-вакӧн серӧктӧ да бӧр кыскыштӧ няньсӧ асланьыс. Бара лӧньӧмӧн виччысьӧ. Недыр мысти крыса выльысь уськӧдчӧ, мед гусявны няньсӧ, и кагаыдлӧн бара серамыс петӧ. Тадзи, вӧлӧм, и ворсӧны ас костас!
— А водзӧ мый лои?
— Водзӧ? Локтісны батьыс да мамыс, менӧ бон-бус пинялісны, мыйла йӧз оланінӧ кӧзяинъястӧгыс пыри, законсӧ торки! Некымын во на тадзи кыссис, кытчӧдз судыд эз мырддьы Павлов гозъялысь писӧ. То ыджыд мамсӧ жалитыштасны, то бать-мамыс кӧсйысьласны юӧмысь дугдыны... А сэсся то тай кутшӧм юрвундысь быдмис сійӧ зырымбедьсьыс...
Кор КпДН* кабинетӧ учительницаыскӧд тшӧтш пырис ичӧтик тушаа косіник детинка, комиссияса членъяс весиг чуймыштісны:
* КпДН —
«Этатшӧм дзоляниксӧ нин мыйла татчӧ колӧ вӧлі кыскынысӧ?
Кутшӧм бара-й грекъяс детина вылас ӧшӧдісны? Талы ӧд чунь петкӧдлыны сӧмын и колӧ, мед сійӧ лоӧ шӧвк тупыль кодь шаньӧн!» Збыль, видзӧдлан детинка вылас да он шу, мый сійӧ кулиган.
Ӧчкиа, кӧть ӧтар стеклӧыс потӧма, петкӧдчӧ велӧдчысьӧн, кодлӧн дневникас сӧмын «пятёркаяс» — дзик быттьӧ «
Комиссияса председатель — роноса** заведующӧй Кутькин шыӧдчис велӧдысь дорӧ:
** Роно —
— Любовь Матвеевна, тӧдмӧдӧй, пӧжалуйста, миянӧс том молодечыскӧд, коді тайӧ сэтшӧмыс да кутшӧм ыджыд «подвигъясысь» комиссия водзӧ ичӧтик мортсӧ вайӧдінныд?
Любовь Матвеевна пельпомӧдыс кокньыдика вештыштіс зонкаӧс неуна водзӧджык, мед быдӧн вермис лӧсьыда видзӧдлыны мортыс вылӧ. Детинка та вылӧ пыркнитчис да скӧрысь шыбитіс пельпом вывсьыс учительницалысь кисӧ.
— Тіян водзын квайтӧд класса велӧдчысь Женя Павлов. Школаын Женя медводдза лунсяньыс петкӧдліс асьсӧ зэв кывзысьтӧмӧн, челядь пӧвстын асьсӧ кутны оз куж, пыр зільӧ нывкаясӧс да ичӧтджык детинкаясӧс дзерӧдны, нӧйтны, мырддялӧ налысь сьӧм. Кодкӧ кӧ сылы оз кажитчы, пыр чужӧмас и вартас, кузяла кулаксӧ дзабыртӧмӧн да вомсӧ векыштӧмӧн и ветлӧдлӧ. Гырысьяс пиысь некодӧс пыдди оз пукты, велӧдысьяскӧд сёрнитӧ скӧрысь, сӧмын бричкӧ, кӧинпи моз и бугжылясьӧ, куритчӧ, мисьтӧма матькӧ, гусясьӧ. Женя дисциплина йылысь быттьӧ некор абу кывлӧма, дежуритны классын мырдӧн колӧ тшӧктыны. Дӧсадитчӧ, урок лӧсьыда нуӧдны оз сет, ӧлӧдан кӧ, пыр и горзыны мӧдас, весиг вермас ручканас лыйны велӧдысьыдлы. Кӧть ачыс и дзӧляник на, но вот татшӧм миян Женюкыд и эм. Ог тӧд, кутшӧм морт сыысь артмас, кор быдмас.
— Да-а, — нюжӧдыштіс Кутькин. — Ӧнісянь кӧ велӧдысьяс оз тӧдны, мый тэкӧд вӧчны, кутшӧм кыв вылын сэсся тэкӧд сёрнитны? Тадзи овны оз позь, збыль сьӧкыд весиг мӧвпыштны, мый лоӧ, кор тэ быдман, кутшӧм морт тэысь петас? Он кӧ веж оласногтӧ, водзӧ аслыд жӧ овны лоӧ зэв сьӧкыд, тэ абу вӧрын ӧтнадӧн дзебсясьысь, а уна йӧз пӧвстын, кӧні быдӧнӧс колӧ пыдди пуктыны. Сэки и тэ дорӧ йӧзыслӧн видзӧдласыс лоӧ бур. Оз ӧд прӧстӧ шуны: беддьыд пӧ кык пома, ӧтар помнас кӧ кодлыкӧ вартан, мӧдар помыс вермас лӧсыштны аслыд. Велӧдысьяслысь он кывзысь, посниясӧс ӧбижайтан, тайӧ ставыс збыль? А ыджыд мамыдлысь кывзысян?
Кутькинлӧн сёрнитігӧн Павлов веськодя сулаліс да очсаліс, быттьӧ оз сы йылысь сёрниыс мун, а кутшӧмкӧ дзик бокӧвӧй морт йылысь, кодӧс сійӧ весиг оз тӧд. Женя медводз видзӧдаліс гӧгӧрбок, быттьӧ кӧсйис зэв бура тӧдмавны, кутшӧм кабинетӧ сійӧ веськаліс, мый пуктӧма пызан вылӧ, кутшӧм дзоридзьяс быдмӧны стенӧ ӧшлӧм дозъясын, сэсся видзӧдлассӧ нуӧдіс комиссияса членъяслӧн чужӧмъяс вывті, неуна дырджык синъясыс сувтлісны Евлогий Дмитриевичлӧн милицейскӧй форма вылӧ. Дерт, сійӧс тӧдтӧг эз ов. Мыйӧн тайӧ уджыс мортыслӧн эштіс, видзӧдліс аслас кияс вылас да кутчысис гыж йирӧмӧ, шлочкас-курччас гыжсӧ да сьӧлыштас джоджӧ, курччас да сьӧлыштас.
— Женя, ме жӧ тэкӧд сёрнита: ыджыд мамыдлысь кывзысян?
Детинка сьӧласьӧмсьыс эновтчытӧг синкым увтіыс кӧбовтіс Кутькинӧс да пычиктіс:
— Ыхы.
— А мыйла он кывзысь велӧдысьясыдлысь? Найӧ ӧд тэныд юрад коланаторъяс да буртор сюйӧны, кодъяс тэныд водзӧ вылӧ олӧмад зэв ёна отсаласны, зільӧны, мед тэ тӧлка мортӧн лоан!
Детинка эновтчис гыж «тшӧтшӧдӧмысь» да кутчысис нырсӧ гудйӧмӧ: сюйлас чуньсӧ ныр розяс, ноксьыштас сэні, кыскас, видзӧдлас чунь пом вылас, чышкыштас гачас да выльысь сюяс.
— Женя, тэкӧд ӧд гырысь йӧз сёрнитӧны! — дӧзмискодь Кутькин. — Тэ чайтан, миянлы дзик нин нинӧм вӧчны, некутшӧм удж абу да, сы понда татчӧ чукӧртчим, мед любуйтчыны тэнад нырад гудйысьӧм вылад? А кыдзи тэ велӧдчан, кутшӧм отметкаяс пӧлучайтан?
— То тая тӧдӧ, — Павлов тшӧканас индіс велӧдысь вылӧ.
— Лёкиника велӧдчӧ, сы кузя тшӧтш ошкыны нинӧмысь, — ӧвтыштчис Любовь Матвеевна. — «Трияс» да «дваяс» вылӧ.
— Видзӧда да, тайӧ детинкаыскӧд сӧмын прӧстӧ каднымӧс воштам, — шыасис Евлогий Дмитриевич. — Сійӧ, кыдз брӧдяга, милицияын учёт вылын нин сулалӧ, и водзӧ мӧдам кутны сылысь оласногсӧ чорыд контроль улын да вочасӧн заводитам чукӧртны материал спецучилищеӧ. Ӧні Женялы дас куим арӧс, спецшколаӧ сылы сёр нин, пока ӧттор да мӧдтор, сэні и дас нёльыс тырас, да позяс спецучилищеӧ мӧдӧдны.
— Спецучилищеӧ мед веськӧдны, колӧ кыз папка тыр документсӧ чӧжны, — шыасис районса прокурор Морозов. — Но Женялӧн татшӧм оласногнад материалыд ӧдйӧ ӧкмас, сӧмын училищеас босьтӧны дзик дзоньвидза йӧзӧс, мед мортыслӧн лётчиклӧн моз некыті эз вись. Кутшӧм Павлов ёртыслӧн дзоньвидзалуныс? Мыйӧнкӧ нёрпалӧ али оз? — видзӧдліс Морозов класснӧй руководитель вылӧ.
— Сідзсӧ детинкаыслы став колана прививкасӧ вӧчалӧма, некутшӧм висьӧмӧн абу висьлӧма, некор эз элясьлы дзоньвидзалун вылас, — вочавидзис Любовь Матвеевна. — Женя кӧть видзӧднысӧ косіник, но ён, збыль, буракӧ, лётчик кодьӧн чужлӧма.
— Колана документыс кӧ тырмымӧн, и дзоньвидзалуныс космонавтлӧн кодь, тайӧ абу лёк, но путёвкасӧ спецучилищеад зэв на сьӧкыда сетӧны. Сэтчӧ медся шогмытӧмъясыс сӧмын веськалӧны. Но кутам надейтчыны, мый Женя вылӧ персональнӧй путёвка корсясны, — содтіс Коренева, комиссияса секретар. — Велӧдысьяс то пикӧ воӧмаӧсь, ӧтнас дзонь школа пузувтӧ.
— Мый шуӧ медицина? — Кутькин бергӧдчыліс больницаса врач Костенко вылӧ.
— Оз кӧ вежсьы миян талунъя сёрни бӧрын Павловлӧн сямыс, позьӧ мӧдӧдлыны сійӧс тӧлысь-мӧд кежлӧ бурдӧдчыны психбольничаӧ, мед неуна лӧньӧдны сылысь булькйӧн пуысь вир-яйсӧ. Гашкӧ, сы бӧрын оласногыс бурланьӧ вежсьыштас.
— Гӧгӧрвоин, Женя, кутшӧм олӧм тэнӧ виччысьӧ, он кӧ веж ас вылад да тэ гӧгӧрса йӧз вылас видзӧдластӧ? — тӧдчӧдіс Кутькин. — Тайӧ кабинетсьыс петан да пыр жӧ заводит выльнога овны, бура велӧдчы, кывзысь ыджыд мамыдлысь, велӧдысьясыдлысь, дугды тышкасьны, гусясьны, вот сэки пыр жӧ казялан, кыдзи тэ дорын бергалысь йӧзыс здукӧн вежсясны, тэнӧ тшӧтш кутасны пыдди пуктыны да радейтны. И эн видзӧд ме вылӧ тадзи, меным паныдасьлісны и тэысь на гырысьджык лилипутъяс! Кылін?
— Кылі, — дышпырысь, быттьӧ кокувса джоджыслы вочавидзис детинка, мед сӧмын мынны тайӧ кабинетас чукӧртчӧм йӧзсьыс.
— Талун ми, Женя, прӧстӧ ӧлӧдам тэнӧ, мый овны сідзи, кыдзи тэ ӧнӧдз овлін, оз позь, некыдзи на огӧ накажитӧй, но бурланьӧ кӧ ассьыд оласногтӧ он веж, сэки миян вылӧ эн ӧбижайтчы! Ачыд лоан мыжа, ми тэкӧд кутам мӧд ногӧн сёрнитны, — гӧгрӧстіс Павловкӧд сёрнисӧ Кутькин. — Верманныд мунны.
И Любовь Матвеевналы содтіс:
— Висьталӧй, пӧжалуйста, сэні, мед пырасны, кодлӧн ӧчередыс, посводзас ӧд унаӧн на виччысьӧны...
Слӧймис медбӧрын Лыюров волыны Кушашорӧ, кӧні некымын детинка сулалісны ИДН-ын учёт вылын. Медводз веськӧдчис, дерт, школаӧ, аддзӧдчыліс директорыскӧд, Михаил Прокопьевичкӧд, велӧдысьяскӧд, но и, дерт жӧ, «аслас» сямтӧм челядьыскӧд. Юаліс Любовь Матвеевналысь:
— Кыдзи нин ӧні миян Женя Павловыс олӧ? Вежсис эз сылӧн сямыс комиссиявывса сёрни бӧрас?
Учительница сӧмын кинас ӧвтыштчис:
— Некутшӧм вежсьӧм оз тӧдчы! Кутшӧмӧн вӧлі, сэтшӧмӧн и коли, кымын водзӧ, сымын ӧтарӧ тшыкӧ. Быд лун кутшӧмкӧ да кутшӧмкӧ пакӧсьт вӧчӧ. Войдӧрлун на Саша Касевлы перемена дырйиыс нырас вартӧма, вир да коль детинкаыд урок вылӧ пырис. Ыджыд мамсӧ школаӧ корлім, Женяӧс видім, янӧдім, а сылы дзик веськодь, быттьӧ оз сыкӧд сёрнитны, аддзылінныд ӧд асьныд комиссия вылад. Некодысь оз пов, тӧдӧ: кӧть мый вӧчас, кӧть мортӧс виас, сылы нинӧм оз ло. Ни киӧн вӧрзьӧдны, ни уголовнӧй делӧ панны оз позь, некод сійӧс оз пуксьӧд, дас нёль арӧсыс абу на.
— Да-а, — нюжӧдыштіс Евлогий Дмитриевич. — Но кияс ӧшӧдӧмӧн виччысьны, кор сылы тырас дас нёль арӧсыс, миянлы оз жӧ позь. Водзӧ чукӧртам материал тайӧ детина вылас, куш висьталӧмтӧ делӧад он вурышт. Ме тайӧ Саша Касевсӧ нӧйтӧм кузяыс нуӧда дознание, лӧсьӧда ӧтказнӧй материал да постановлениесӧ КпДН-ӧ мӧдӧда, корлам ыджыд мамыскӧд локтан заседание вылӧ. Верманныд кӧ, ті тшӧтш матыстчылӧй.
— Дерт, эськӧ волам Веждінад комиссия вылад, но сэні ӧд нинӧм жӧ сыкӧд вӧчны онӧ вермӧй, а куш сёрнисьыд сылы пӧсь ни кӧдзыд. Весиг ыджыд мамсӧ штрапуйтны оз позь, кытчӧ нин дзоляник пенсиясьыд сылы штрапъяс мынтыны! Асланым жӧ сӧвесьтным пыксяс: ті нӧ пӧ мый вӧчанныд, тадзи ӧмӧй позьӧ пӧрысь мортсӧ ӧбижайтны?!
— Сійӧтӧ сідз... Но ті асьныд ӧд аддзылінныд, кыдзи воддза заседание дырйиыд прокурорыд петкӧдліс, мый кыза делӧ колӧ чӧжны, мед спецучилищеӧ мортсӧ йӧршитлыны. Вот и кутам надзӧникӧн Женялӧн персональнӧй папкаӧ лист бӧрся лист содтавны. Тадзи ми Павлов вылас отрицательнӧй досье лӧсьӧдам, мед арлыд тыригкежлас мӧдӧдны сійӧс кытчӧкӧ ылӧджык перевоспитание вылӧ, а друг сійӧ верстяммыштӧм мыстиыс вежӧрсялас, вежас ассьыс оласногсӧ, сямыс лоас дзик мӧд пӧлӧс, прамӧй мортлӧн кодь? Но ӧд Женя вежсяс кӧ, сійӧ лоӧ зэв бур! Сідзкӧ, миян да тіян сыкӧд мырсьӧмным эз ло весьшӧрӧ, вермам кӧ детинасӧ няйт туй вывсьыс кежӧдны шыльыд асфальт вылӧ! Коді сэки сійӧс, сэтшӧм шань мортсӧ спецучилищеӧ йӧршитас? А оз кӧ вежсьы, то документсӧ лоӧ чукӧртӧма судзсяна мында, весиг вывті, сэки некод оз шу, быттьӧ ми кыккирудз пукалім и нинӧм эг вӧчӧй, мед кагаыслысь вежӧрсӧ бурланьӧ веськӧдны.
Лыюров сёрнитіс Саша Касевкӧд, кодӧс войдӧрлун нӧйтӧма Павлов, велӧдысьяскӧд, ставныслысь босьталіс объяснениеяс, кырымӧдаліс, кытчӧ колӧ.
— Но мый? — видзӧдліс Евлогий Дмитриевич велӧдысь вылӧ. — Корлам ӧні правонарушительсӧ. Видзӧдлам, сёрнитас сійӧ миянкӧд али оз.
Женя пырис директор кабинетӧ, кытшовтӧдіс синнас Лыюровӧс, Любовь Матвеевнаӧс, Михаил Прокопьевичӧс да дышиника, быттьӧ сылы аттӧ сьӧкыд кокъяссӧ вештавны, кияссӧ зепъясас сюйӧмӧн матыстчис пызан дорӧдз да сувтіс.
— Видза олан, Женя! — чолӧмаліс зонкаӧс Евлогий Дмитриевич. — Кор кытчӧкӧ пыран, колӧ шапкатӧ пӧрччыны да чолӧмасьны, тэнӧ таӧ эз велӧдлыны?
Павлов пӧрччис юрсьыс шапкасӧ да улӧдз копыртчылӧмӧн, кыдзи мушкетёръяс король водзын, новлӧдлыштіс шапканас джодж бердӧд, быттьӧ чышкаліс кок увсьыс буссӧ:
— Видза оланныд!
Директор Любовь Матвеевна да Лыюров сӧмын шогпырысь нюмдісны.
— Вот локті Кушашорӧдз, мед тӧдмавны, кыдзи нин тэ олан, вежсис али эз бурланьӧ тэнад сямыд бӧръя аддзысьлӧмсяньыс? — водзӧ нуӧдіс Евлогий Дмитриевич. — И мый жӧ меным юӧртісны? Тэ пӧ некутшӧма абу вежсьӧмыд! Кутшӧмӧн вӧлін, сэтшӧмӧн и кольӧмыд. Войдӧрлун на ассьыд дзоляджык да слабджык детинкаӧс нӧйтӧмыд, мортыс вирӧн ойдӧм чужӧмӧн перемена вылысь классас пырӧма. Женя, тадзи ӧмӧй позьӧ? Вай жӧ висьтавлы, мыйла тэ сідзи вӧчин? Мыйла ичӧт мортсӧ ӧбӧдитін?
Женя сулаліс да чӧв оліс, сӧмын орӧдчывлытӧг юрсӧ то шуйгавылӧ, то веськыдвылӧ катовтлӧмӧн видзӧдаліс йирк бердын ӧшалан мича люстрасӧ.
— Но, Женя, висьтав, кыдзи вӧлі делӧыс?
Но детинка чӧв оліс, сӧмын ӧні люстра вылысь видзӧдлассӧ веськӧдіс ӧшинь пырыс тыдалан школа йӧрын быдмысь пожӧм пуяслань.
— Но, мый сэсся ланьтін? Али эн тэ Сашасӧ нӧйт, а кодкӧ мӧд? А тэнӧ прӧстӧсьыс лякӧны? Но, висьтась, тэ сылы вартін ныр-вомас? Кужин тышӧ пырны, куж и вочавидзны! Али тэ трус? Полан?
Та бӧрын вӧлисти Павлов видзӧдліс Евлогий Дмитриевичлы синмас.
— Но, тэ вартін Касевыслы?
— Да.
— А мыйысь?
— Мед ёна нырсӧ оз лэптав дай!
— Сідзкӧ, тадзи и гижам, нӧйтін Саша Касевӧс сы вӧсна, мый сійӧ ёна нырсӧ лэпталӧ. И унаысь вартін?
— Ӧтчыд.
— Сэсся мый лои?
— Мый? Нырсьыс вир чепӧсйис, да дзоля кага моз нирӧстіс-бӧрддзис.
— И тэныд Сашаыс эз ло жаль?
— Мыйысь сійӧс жалитнысӧ?!
— Кыдзи мыйысь?! Ӧд тэ сійӧс дойдін! Чужӧмыс мортыслӧн вирӧн ойдӧма, сідзи и классас пырӧма!
— Ыджыдтор тай! Вирыд недыр люзьгыштас дай дугдас!
— То ӧд тэ кутшӧм! А тэнӧ кӧ кодкӧ гырысьджык класса тадзи нырад швачкӧбтас? Мый сэки кутан сьывны?
— Мед кодкӧ видлас!
Евлогий Дмитриевич помаліс гижны объяснениесӧ, гораа лыддис Павловлы, вештіс сыланьӧ да индіс чуньнас:
— На, то татчӧ кырымась!
Зонка босьтіс ручка, лӧсьӧдчис, мед кырымасьны, бумагаыс сылӧн ки улын эз кутчысь пызан бердас, ӧтарӧ вешйис боквыв, но Женя кыдз шуйга кисӧ зептас сюйӧмӧн сулаліс, сідзи эз и убӧлит прӧстмӧдны, мед кӧть нин кутыштны объяснение бланоксӧ, тайӧн петкӧдліс, быттьӧ сылы тані и милиционерыс, и директорыс, и класснӧй руководительыс дзик веськодьӧсь. Мисьтӧминика кыдзкӧ парсаліс да шыбитіс ручкасӧ.
— Но, мун классад да лӧсьыда велӧдчы, и некор сэсся эн тышкась! — татшӧм кывъясӧн Лыюров колльӧдіс Павловӧс.
Мӧдыс кыв ни джын шутӧг петіс.
— Принципиальнӧя зепсьыс кисӧ эз кыскы, петкӧдліс, ме пӧ тіянӧс морт туйӧ ог пукты, веськодь, кӧть ті мый меным эн мойдӧй, кыдз кӧсъя, сідзи и ола! — ышловзис Любовь Матвеевна.
— Да, и оз ӧд гӧгӧрво, мый ачыс аслыс лёк вӧчӧ! Вермас лоны, бӧрыннас, коркӧ дыр мысти нин юрас воас — воас кӧ! — колӧма пӧ мӧд ногӧн овны. Но сэки сёр нин лоӧ...
— Талӧн тшук вежӧрыс юрас некор оз и пырав, мыйта ми сыкӧд лойсим, кутшӧм сӧмын кывъясӧн эг велӧдӧй, нинӧм эз отсав. Миян висьталӧмыд-велӧдӧмыд сылы тшаква, потансяньыс нин юрас сюйӧма, быттьӧ сійӧ медся сюсьыс, медся бурыс, мый кӧсъяс, сійӧ и вӧчас, и нинӧм сылы таысь оз ло.
— Да, тайӧ сідзи и эм. Кымын татшӧм «сьӧкыд детинкаыс» менам ки пыр муніс, а кызвыныс ичӧтсяньыс бӧрйӧмаӧсь аслыныс лёк, шогмытӧм туйвизь и некытчӧ бокӧ кежтӧг веськыда сэті собӧны, а бӧрыннас кӧть и кӧсъясны вежны олан туйсӧ, но оз нин вермыны! Арлыдыс тырас — пуксьӧдасны, срокыс коляс — воласны недыр кежлӧ, бара пуксясны, и нэм чӧжыс тадзи и олӧны... Кыдз киноад: «
Зилькнитіс урок вылысь звӧнок, школаса коридоръяс тырисны челядьлӧн ёсь гӧлӧсъясӧн.
— Менам ӧні урок лоӧ, — извиняйтчана кыпӧдчис улӧс вывсьыс Любовь Матвеевна.
— А ме ветла Женялӧн ыджыд мам ордӧ, сыкӧд тшӧтш колӧ аддзӧдчывны, — шынелясис Лыюров. — Аддзысьлытӧдз!
Ывлавылын сулаліс зэв мича тӧвся лун. Яръюгыд шондіыс дзирдаліс кельыдлӧз енэжас да жалиттӧг койис югӧръяссӧ еджыд лымйӧн шыльӧдӧм му вылӧ. Синтӧ весиг восьтыны он вермы, сэтшӧм югыд! Лоӧ читкыртчыштӧмӧн восьлавны бульдозерӧн ныръялӧм туй кузя. Абу на вунӧма Елена Васильевналӧн важиник керкаыс, эз дыр ковмы корсьны, ӧдйӧ и аддзис. Пыркӧдыштіс лымсӧ унтыяс вывсьыс, кайис кильчӧ посъяс кузя, пырис восьса посводзӧ да таркнитіс керка ӧдзӧсӧ.
Кыліс «Пырӧй» шуӧм да воськовтіс пытшкас. Олӧма ань пукаліс пызан сайын, кытчӧ коркӧ чайтӧ юны пуксьӧдліс сійӧс Женя, да мыйкӧ кыис ыж гӧн шӧртысь. Киясыс кысянтор вылас видзӧдлытӧг и легӧдісны емъяссӧ, а шӧрт тупыльыс куйліс ичӧтик гӧгрӧс кудйын кокъяс дорас да надзӧникӧн бергаліс.
— Видза оланныд, Елена Васильевна!
— Видза, видза, Евлогий Дмитриевич!
— О-о! Ті весиг помнитанныд, кыдзи менӧ шуӧны!
— Паметь вылӧ ог на элясь! Кутшӧм мог нин ме дорӧ, пӧрысь катша дорас, суӧма милициясӧ? Важӧн нин некодӧс эг нӧйтлы, гусясьны кыдзкӧ эг жӧ велавлы. Та вӧсна весиг чуймылі, кор ӧшинь пыр аддзи миянланьӧ кежӧмтӧ. Бара, тшук, Женя кузя та ылнаас кыссинныд?
— Тӧдінныд... Но ме, Елена Васильевна, ті кӧ онӧ дивитӧй, пӧрччысьла, а то подӧн татчӧдз локтігад дзикӧдз пӧсялі.
— Пӧрччысьӧй бара-й, кутшӧм нин дивитӧм!
Евлогий Дмитриевич пӧрччис да ӧшӧдіс тув вылӧ шынельсӧ, шапкасӧ да шарпсӧ. Матыстчис пызан дорӧ да лэдзчысис ас вӧчӧм диван вылӧ.
— Кыдз ті тӧданныд нин, уджала ме тыр арлыдтӧмаяслӧн делӧяс кузя инспекторӧн, веськыда кӧ шуны — челядькӧд нокся.
— Тӧда, дерт, кыдз нӧ ог тӧд, — кайтыштіс олӧма ань.
Елена Васильевналы чужӧм сертиыс кӧ видзӧдлыны, позис сетны кыдз ветымын, сідз и квайтымын арӧс, туша статьыс косньӧдіник, абу кызъяс рӧдысь.
— Ме пыри сёрнитыштны тіянкӧд, Елена Васильевна, внук йывсьыныд. Вывті ёна элясьӧны сы вылӧ велӧдысьяс, ньӧти пӧ оз кывзысь, матькӧ, куритчӧ, посни челядьӧс ӧбижайтӧ. Та вӧсна ковмис детинатӧ сувтӧдны милицияӧ учёт вылӧ. А кыдзи Женя гортаныд олӧ?
— Первойсяньыс Машуклы шулі, мися, эн мун Илля Ёгор саяс! Сійӧ ӧд зэв омӧль, шогмытӧм рӧдысь! Батьыс и дядьясыс Ёгорыслӧн оравлытӧг стӧкаритісны, тюрмаысь эз и петавлыны, гортас сӧмын гежӧдика тыдовтчылісны. Батьыс вӧлі тулыснас воас гортас, картупель пуктыны удитас, а кернысӧ йӧзӧс медавны ковмыліс, бара нин кутшӧмкӧ лёктор вӧчӧма, да бытшкасьысь сутуга сайӧ иналӧмаӧсь. Вот и Ёгорыс сэтшӧмӧн жӧ лои. Ме велӧдлі на сійӧс начальнӧй классъясас да аттӧ бура сылысь сямсӧ тӧді. Но вот эз кывзысь Машук мамыслысь, ӧтарӧ долис: «Тэ пӧрысь, нинӧм он гӧгӧрво, а ме радейта Ёгорӧс, сытӧг овны ог вермы, ӧтлаасям да, воспитайта мортсӧ, дугӧда юӧмсьыс, зэв лӧсьыда кутам кургыны-овны». Вот и воспитайтіс, кувмӧн нӧйтӧма менсьым шӧктугтӧ, кызь вит арӧн кын му улӧ сюйис яндысьтӧм синмыд...
— Аддзылі ме коркӧ Машатӧ... Пиньтӧм да лӧз чужӧма... Ковмис отсавны ӧти делӧын...
— Сійӧ йывсьыд висьтавліс... Эн ӧд бур олӧмысь тадзитӧ вӧч... Абу кӧ сетӧма Енмыс быдтысян шудсӧ... Мӧдтор йылысь кӧ могыс да шогыс вӧлӧма... Вина йылысь...
Евлоглӧн син водзас сувтіс томдырся ӧти лун.
— О-о! Мария Кирилловна Павлова кыськӧ миянӧдз убӧлитӧма воны! — ыджыд радлун петкӧдлан чужӧмӧн Лыюров чолӧмаліс милицияса дежурнӧй юкӧнса «нулёвкаысь» петкӧдӧм лёзь юрсиа коддзӧм аньӧс. — Кодкӧ удитӧма нин тіянӧс гӧститӧдны, ёна жӧ пыдди пуктӧны кушашорса аньястӧ миян Веждінын!
— Гӧститӧдасны! Виччысь! Аслад кӧ нинӧм абу, бокисьыд некысь на оз усь! — пинь пырыс скӧрысь сӧдзӧдіс Павлова. — Рушкуа бабаӧс муртса чуньлыс мында ырснитӧмысь чижовкаӧ пуксьӧдісны да и радлӧны!
— Рушкуа?!
Тайӧ Евлогий Дмитриевичлы вӧлі дзик виччысьтӧмтор. Ӧд неважӧн на оравлытӧг юысь Павлов гозъялысь судӧн мырддисны Женя писӧ да сетісны ыджыд мамыслы, мед сійӧ вердас-удас, велӧдас внуксӧ лӧсьыда овны. Сы мында документ ковмис чукӧртны да судӧ мӧдӧдны! А ӧні то ачыс висьталӧ, бара на пӧ рушкуа. Мый сэсся, кор ваяс, выльысь ковмас документъяс чукӧртны, мед пузчужӧм кагасӧ налысь мырддьыны, кытчӧдз палявлытӧм гозъяыд эз вины ичӧтик мортсӧ?
— Андрей Андреевич, тайӧ нывбабасӧ кутыштӧй на, виччысьлӧй менсьым воӧм, — Евлог ӧдӧбтіс дежуркаысь ортсӧ да котӧртіс юрсиктса больничалань.
Гожӧм шӧр, доналӧм ыргӧн латка кодь шондіыс енэжсяньыс жалиттӧг пӧжӧ потласьмӧн косьмӧм мусӧ. Клуб дорын вуджӧр сайӧ дзебсьӧм шоныд пася понъяс муӧдзыс ӧшӧдӧмаӧсь гӧрдов кывъяссӧ да сӧмын сьӧкыда упкӧны, ловныс оз шед, весиг некод вылӧ оз увтыштлыны. А райбольнича пытшкын ыркыд, кӧть сэні позьӧ шойччыштны, но Евлоглӧн та вылӧ кадыс абу.
Брӧд пӧсялӧма, дӧрӧмыс киняувъясӧдыс и мышкыс дзик ва, ныр йывтіыс ньылӧмыс визувтӧ, став больничасӧ кытшовтіс, кытчӧдз эз аддзы врач Никифоровӧс, кодкӧд вӧліны матысса тӧдсаясӧн.
— Сергей Васильевич, уф-ф, кыдзкӧ верми жӧ медбӧрын тэнӧ аддзыны!.. Колӧ ӧти абу ёна бур аньлы отсавны, кытчӧдз эг на сёрмӧй.
— Гӧтырыдлы али мый? — муртса кежлӧ мыччыліс нюмсӧ гӧгрӧс чужӧм вылас гинеколог.
— Кутшӧм гӧтыр! Тані кушашорса код юра аньӧс кутӧмаӧсь, милицияын пукалӧ, шуӧ, рушкуа пӧ. А неважӧн на сылысь судӧн мам нимсӧ мырддим. А бара кӧ кага чужтас, выльысь ковмас ставсӧ помсянь помӧдз гартны, бара судӧн мырддьыны кагасӧ, кытчӧдз эз вины сійӧс тайӧ алкашъясыс!
— Коді нӧ сэтшӧмыс?
— Павлова.
— А-а, Павлова талун приём вылын вӧлі, збыль рушкуа аньыс. Юысь бабаясыд оз и тӧдлыны, кыдзи рушкуасьӧны.
— Ужас! — ышловзис Лыюров. — Мый сэсся вӧчны?
— Кыдзи мый? Спираль позьӧ пуктыны бӧрас.
— А спиральыс тэнад тані эм?
— Кыськӧ! Сійӧс аптекаысь колӧ ньӧбны. Ачыд ньӧб, милицияад ӧд он вӧсниа куль, сьӧмыд зеп тырыд! — вомтырнас серӧктіс Никифоров. — Удитан кӧ вайӧдны сійӧ мича аньсӧ ме дорӧ уджалан кад помасьтӧдз, то блат кузя ставсӧ чики-пуки вӧча.
—
Прилавок сайын сулалысь томиник ныв чуймӧмӧн видзӧдліс милиционер вылӧ да мыччис ён весьт кузя кӧрӧбка. Евлоглы жӧ некор вӧлі мӧжгынысӧ, да сійӧ котӧртіс водзӧ.
— Андрей Андреевич, тэныд тайӧ мича аньыс оз ков? — юаліс дежурнӧйлысь милицияса дежуркаӧ пырӧмӧн тшӧтш.
— Меным бара-й татшӧм бубуляыд оз ков, тэнад кӧ вежыд петіс, аслыд и босьт!
— Ме сыла и локті, — и бергӧдчис Павловалань: — Чеччӧй жӧ, пыдди пуктана Мария Кирилловна, да ветлам мекӧд, мед тіянлысь олӧмтӧ кокньӧдыштны!
— Кытчӧ нин, Евлогий Дмитриевич, менӧ кысканныд? — милициялӧн отделысь петігмоз юаліс Павлова.
— Ог жӧ кыскы, асьныд лӧсьыда ас кокнаныд тапканныд да.
Кильчӧ вылын нывбаба сувтыштіс, киӧдыс кутіс инспекторӧс да гӧлӧссӧ чинтӧмӧн, шӧпкӧдігмоз висьталіс:
— Кор менӧ милицияад том йӧзыд вайисны, сэтшӧма полі, сэтшӧма полі...
— Мыйысь нӧ полінныд? — Евлог неуна ылыстыштіс Павлова дорысь чужӧмсӧ, мед эз сэтшӧма пӧдты вина дукнас.
— Кысь нӧ он пов! Босьталӧмныд милицияад школьникъяссӧ да... Вот и полі, мися, тайӧ том йӧзыд вермасны на и мырдӧнавны! Мый нӧ налы! Быдторйысь ӧд ӧнія кадӧ лоӧ видзчысьны!
— Сідзи, сідзи, Мария Кирилловна, таті чой паныдсӧ каям.
Сойбордӧдыс кутӧмӧн шӧр туйсянь Евлог нуӧдіс нывбабаӧс кирпич кочегарка дорті вывлань. Кӧсйыссис, эськӧ, ӧдйӧджык мунны, но Павловалы воськовъясыс шедісны сьӧкыда. Кор жӧ воисны вылыс туй бокын сулалысь во-мӧд сайын ӧзйылӧм керка дорӧдз, кодлӧн йирк вылас вежӧдісны вӧсньыдик кыдз пуяс, ань дзикӧдз сувтіс.
— Мый нӧ сувтінныд?
— Мудзи, Евлогий Дмитриевич, мудзи, — Павлова кашмӧма, сьӧкыда лолалӧ, сідзи и упкӧ. — Жар, да дзикӧдз пӧсялі.
— Жарнад тай жар, турун пуктан поводдя сулалӧ. Шойччыштам, сідзкӧ. Но, висьтыштӧй, кыдзи нин оланныд?
— Кутшӧм нин олӧм?! Сьӧдас!
— Верӧсыд ӧд тіянӧс зэв ёна радейтӧ, да ӧні кыкнад сӧмын каньяс моз курганныд.
— Да, радейтӧ. Кыдз шуласны, ӧтчыд лун вердӧ да куимысь лун нӧйтӧ, став пиньӧс нин то кисьтіс, — петкӧдліс Евлоглы пиньтӧм вомсӧ.
— Аддзылі, — ӧвтыштчис Лыюров.
— Кывзы, Евлогий Дмитриевич, ме кӧ тэнад гӧтырӧн вӧлі, ёна эськӧ тэнӧ и радейті. Мекӧд кӧ олін, шог эн тӧдлы, вот! — и видзчысьтӧг вӧзйис: — Вай гӧтрась ме вылӧ!
Евлог здук кежлӧ падмыліс, а сэсся мортыдлӧн серамыс петіс:
— Кыдз нӧ ме тэ вылӧ гӧтрася? Тэ верӧс сайын, ме гӧтыра.
— А ме юкся Ёгоркӧд, тэ — аслад гӧтырыдкӧд, мый сэн думайтнысӧ? И кыкнанным прӧстӧсь лоам.
— Ме ассьым гӧтырӧс аминь ёна радейта да юксьыны ог кут! Но менам эм зэв бур друг, аттӧ прамӧй морт сійӧ, гӧтыртӧм, ме тіянӧс тӧдмӧда, тэ юксьы Ёгорыдкӧд. Сэсся ӧтлаасьӧй да лӧсьыда овмӧдчанныд. Юнытӧ дугданныд, пиньястӧ пукталанныд, судӧ шыӧдчӧм сетанныд, бӧр мам нимтӧ бергӧдасны. Вот олӧмыс воссяс!
— Другыд меным оз ков, меным тэ колан! — ырӧстіс-бӧрддзис нывбаба. — Меным тэ важӧн нин сьӧлӧм вылӧ воин! Вай кӧть ӧтчыд окышта, — Евлог эз удит весиг вешйыштны, кыдз Марья видзчысьтӧг судзӧдчыліс да чупнитіс сійӧс кытчӧкӧ тшӧка дорас.
— Но, вай тані йӧз водзас огӧ нин кутӧй окасьны, ӧдйӧджык мунам.
— А кытчӧ тэ менӧ нуӧдан?
— Больничаӧ.
— Ме сэтӧн талун вӧлі нин да...
— Шулі жӧ, мися, другкӧд тӧдмӧда, а сійӧ, колӧкӧ, йӧз кагатӧ оз кут радейтны, мун да и тӧд, кутшӧм сылӧн сямыс лоӧ тэкӧд ӧтлаасьӧм бӧрад. Ачыд думышт.
Ӧта-мӧд бердас топыда кутчысьӧмӧн «
— Врачыд талун помаліс нин уджсӧ, аски волӧй!
— Ме Никифоровыдкӧд сёрнитчи, кӧсйис примитны.
— Но, сідзкӧ, виччысьлӧй. А тэ, — бергӧдчис Павловалань, — волы татчӧ, — и восьтіс кутшӧмкӧ ӧдзӧс.
Аньяслӧн пырӧм мысти Лыюров неуна коста ӧдзӧс пыр кыліс санитаркалысь броткӧдчӧм:
— Тазъяс шоныд васӧ кисьт да мыссьы, а то Никифоровтӧ бара восӧдас!
Со коридор помын мыччысис и ачыс главнӧй гинекологыс:
— Кӧні нӧ тэнад мича аньыд, пышйис?
— Тані мыссьӧ, — индіс сиптӧм ӧдзӧс вылӧ Евлог да мыччис аптекаысь ньӧбӧм кӧрӧбкасӧ.
Эз дыр кежлӧ и пыравлы Павлова гинекологлӧн кабинетӧ, то петіс нин, пуксьыліс коридорса улӧс вылӧ, шойччыштіс, шог синъясӧн видзӧдліс инспектор вылӧ:
— Мыйкӧ ещӧ месянь колӧ?
— Оз, верманныд кайны Кушашорад. Но юӧмсьыд орӧдчӧй, а то ӧд лёка помаланныд!
Рытнас Варя, Евлоглӧн гӧтырыс, удж вылысь воӧм мысти дыркодь видзӧдаліс верӧсыслысь чужӧмсӧ да юаліс:
— Тэ нӧ талун кодкӧд окасин?
— Некодкӧд эг! — быдсӧн бӧбмис Лыюров.
— Аддзылӧмаӧсь ӧд! Кутчысьӧмӧн пӧ кутшӧмкӧ бабакӧд гуляйтӧны туй кузя, кыкнанныс садьтӧм кодӧсь, ӧдва кок вылас ӧшйӧны. Мунасны-мунасны, сувтласны, окыштчасны да бара водзӧ мӧдӧны... Кытчӧкӧ пӧ сэсся больнича дорӧ саялісны.
— Да аддзысьлі важ пӧдругакӧд, но и мый?
— Нинӧм, гортӧ тай садь юрӧн локтін-а.
— Ёгорыс ачыс сэсся кӧнкӧ колонияас олӧм помсӧ аддзӧма, — водзӧ висьтасис Елена Васильевна, — гортас тай шойсӧ вайисны жӧ-а, Машуккӧд орччӧн дзебисны. Мый корсис, сійӧ и сюрис. Тадзи Женюк батьтӧг-мамтӧг коли да, он жӧ эновт ичӧтик мортсӧ! Аслам ӧд виртусьыс, ордам босьті, да вот и видза кыдз верма... Гортын сійӧ сідзсӧ зэв шань, кывзысьӧ, лёк кыв эг на кывлы сысянь, аттӧ мелі. Мый тшӧкта, сійӧ и вӧчӧ, кузяла отсасьӧ меным, пестӧ пыртӧ, ватӧ ваялӧ. Эз кӧ гортгӧгӧрса уджтӧ вӧч, ог тӧд, кыдзи эськӧ ме ӧтнамнад и олі?
— А кӧні ті уджалінныд пенсия вылӧ петтӧдзыд? — юаліс Евлог, быттьӧ оз тӧд, мед водзӧ нуӧдны сёрнисӧ.
— Школаын! Комын во посни челядьӧс велӧді начальнӧй школаын!
— Да-а! Но, сідзкӧ тай, Женя ӧні топыд киясын, кутам надейтчыны, мый лунысь-лун сылӧн олан сямыс кутас вежсьыны бурланьӧ. А вот Саша Касевӧс нӧйтӧм кузя век жӧ ковмас тіян вылӧ протокол гижыштны, а бӧрыннас корлыны Женяыдкӧд Веждінӧ комиссия вылӧ, бур сьӧлӧмӧн сёрнитыштны сыкӧд, видыштны. Мӧд ног некыдз. Посниясӧс ӧбижайтны оз позь!
Евлогий Дмитриевич судзӧдіс дипломатсьыс колана бланок да гижасьыштіс, бӧрас сетліс лыддьыны пасъялӧмторсӧ Елена Васильевналы да кырымӧдіс. Идраліс бумагасӧ бӧр дипломатас да чеччис.
— Но, Елена Васильевна, извинитӧй дӧсадитчӧмысь, мӧдӧдча водзӧ.
— Евлогий Дмитриевич, гашкӧ, чай юыштанныд?
— Аттьӧ, оз на ков. Став бурсӧ тіянлы, кутам надейтчыны, мый век жӧ Женяӧс ӧтувъя вынъясӧн вермам веськӧдны «зумыд асфальт вылӧ». Мед эськӧ эз жӧ восьлав батьыслӧн кок туйӧдыс. Аддзысьлытӧдз, Елена Васильевна! Став бурсӧ тіянлы!
Олӧма ань плавгис пельпом вылас шаль да колльӧдіс Лыюровӧс кильчӧ вылӧдз.
— Кынманныд, эз нин ков менӧ колльӧдны, туйсӧ ӧд тӧда, ог вош. Пырӧй керкаад. Нӧшта ӧтчыд аддзысьлытӧдз!
— Зэв тай гажа талун ывлаыс, то кутшӧма шондісяньыс лыньгӧ, стен вывсьыд лымсӧ нин сывдыштӧ, — ань босьтіс рос да чышкыштіс керъяс вылӧ ӧшйӧм лымсӧ, — мед тӧлалыштас.
Евлогий Дмитриевич мӧдӧдчис водзӧ аслас могъяс кузя.
Комиссия вылын Женякӧд сёрнитӧмыс, кыдзи и чайтіс Лыюров, бара лои весьшӧрӧ — зонкалӧн сямыс бурланьӧ эз вежсьы, мӧдарӧ на, пыр водзӧ лёкмис. Кор Павлов мырддис ичӧтик Вова Пашнинлысь шапкасӧ, кудзаліс сэтчӧ да шапкаӧдіс детинкасӧ, тувсовъя комиссия вылын шуисны водтӧдлыны тайӧ дзоля кулигансӧ Эжваса психиатрическӧй больничаӧ.
Веждінӧдз Павловӧс автобусӧн вайӧдіс Кушашорса школаысь физрук — Иван Владимирович. Карӧдз автобусъяс эз ветлыны, Кӧрткерӧс дорті Эжва вомӧн поссӧ кӧть нюжӧдӧны, но кор сійӧ эштылас, некод на оз тӧд. Та вӧсна коліс лэбны самолётӧн, час чӧж «пилитны» вос дука Ан-2-ын. Кӧть эськӧ ывлаас весиг оз зэр, но метеослужба енэжсӧ ставнас тупкӧма, а кор восьтас, Енмыс весиг оз тӧд. Аэропортын залыс тырӧма поводдя бурмӧм виччысьысь пассажиръясӧн. Кодкӧд он куж думайтны, сыкӧд и позьӧ тані паныдасьны. Майбыр, пукав да варгы, некод тэнӧ оз вӧтлы. Посни котыр ӧтарӧ-мӧдарӧ сяркъялӧны, та дырйи зэв гажаа чилзӧны-горзӧны, усьласны-чеччасны и бара водзӧ. Налы мый, мамъяс танӧсь жӧ, челядь бӧрсяыс видзӧдӧны. «
Тані тэрмась кӧть эн, кад вотӧдз некытчӧ он лэб. Дас кык часын воссис аэропортса столӧвӧй, лэбны кӧсйысьяс люзьгисны сэтчӧ, пукалігкостіыд кынӧмъяс нин удитӧмаӧсь сюмавны. Евлогий Дмитриевич, Иван Владимирович да Павлов на бӧрся вӧтчисны, сёянсӧ босьтісны и Женялы тшӧтш, сійӧ ӧд сэтшӧм жӧ морт, мед тяпкӧдчыштас. Кӧть ӧд кӧинпи моз видзӧдӧ сыкӧд орччӧн пукалысьяс вылӧ, но кынӧм вылад этша ыдждалан. Колӧ шуны, пусьысьяс ассьыныс уджсӧ став сьӧлӧмсяньыс вӧчӧны: и шыдыс, и нырӧм картупельыс да яя котлетыс зэв чӧскыдӧсь вӧліны, да и кӧдзыд компотыс тшӧтш.
Ывлаас гуляйтыштісны и бӧр пырисны самолёт виччысян залӧ. И со кассир аслас кабинкасянь гораа юӧртіс:
— Заводитам вузавлыны билетъяс! — сідзкӧ, метеорологъяс поводдя сетӧмаӧсь.
Йӧз гызисны, ӧдӧбтісны касса дорӧ, быдӧн йӧзысь-мортысь водзджык ичӧтик ӧшиняс нырсӧ зільӧ сюйны, но шӧр арлыда кызіник ань-кассир зэв стрӧг: кыдзи списокас гижӧма, сы серти сӧмын билетъястӧ сеталӧ, некодӧс оз лэдз торкны ӧчередсӧ. Скӧрысь эргысь мотора самолётъяс здукӧн ловзялісны: ӧти пуксьӧ, мӧд кыпӧдчӧ, ӧти ӧтарӧ лэбӧ, мӧд — мӧдарӧ, залыд син водзын кушмӧ.
Иван Владимирович босьтіс документъяс да муніс билетъяс ньӧбны. Недыр мысти локтіс, мыччис кык билет, Евлогий Дмитриевичлы да Женялы.
— А аслыд нӧ?
— Меным эз сюр, самолётыс пӧ гадь моз оз пӧльтчы.
То ӧд, сюсьясыд быдлаын эмӧсь, кужис мынтӧдчыны карад лэбӧмсьыд!
— Ёна жӧ тэ скромнӧй морт вӧлӧмыд, он бара-й ас йывсьыд думайт, ставсӧ йӧзлы! — нюммуныштіс Лыюров да бергӧдчис Женялань: — Но, шань пи, лок жӧ петам. Самолёт вылад лэбавлін нин?
— Эг на.
— Но, талун тӧдмасян, зэв ӧд лӧсьыд, быттьӧ качай вылын лайкйӧдлӧ. Час, пуксям, да сэк аддзылан.
Самолётыс вӧлӧма грузӧвӧй варианта, пуклӧсъясыс кык визьӧн бортъяс пӧлӧныс нюжӧдчӧмаӧсь. Лыюров пуксьӧдіс Женяӧс, тасмаӧн домаліс усьӧмсьыс, а сы бӧрын и ачыс орччӧн сибӧдчис.
Мыччис детинкалы пакет:
— На, босьт, гашкӧ, восӧдны кутас.
— Оз жӧ восӧд! — Женя скӧрысь вештыштіс пакетсӧ, кедзовтана видзӧдліс Лыюров вылӧ.
— Но, ачыд тӧдан, менам ӧлӧдӧма.
Бут-бут-бут — заводитчис Ан-2-лӧн двигательыс, самолёт вӧрзис да рулитіс ВПП* помӧдз, сэні бергӧдчис, сувтіс тӧв паныд, газуйтіс став сьӧлӧмсяньыс и мӧдӧдчис кыпӧдчӧмлань, пыр ӧддзис и ӧддзис. Со торйӧдчыліс мусьыс, но недыр кежлӧ грыпкысьліс шассилӧн кӧлесаяс вылӧ, кыпӧдчис выльысь и ӧшйис сынӧдӧ.
* ВПП — взлётно-посадочнӧй полоса.
Улӧ бӧрӧ колины аэропортлӧн стрӧйбаяс, ВПП мӧдар бокас кыддза раскыс, и со нин Эжва юыс, кокниа лэбыштісны Носим весьтӧд да кыпӧдчисны пыр вылӧджык и вылӧджык. И тані скӧр тӧлыс кыдз тай босьтчис шыблавны ичӧтик самолёттӧ вылӧ-улӧ-бокӧ! Нывбабаяс матыстісны вом дораныс пакетъяс, дружнӧя босьтчисны ылькйыны. Женяӧс тшӧтш шогӧдіс, сійӧ тэрыба нетшыштіс Лыюров киысь пакетсӧ, паськӧдіс сылысь вомсӧ, и чӧскыд шыдыс, и пюреа котлетыс компот сорыс, ставыс, мый пӧттӧдзыс ньылавліс аэропортса столӧвӧйын, ӧдӧбтӧмӧн чепӧсйисны ортсӧ. Кельдӧдӧм чужӧма, коньӧр кодь детинка пукаліс да сьӧкыда упкис. Матӧ час чӧж кокньыдик лайнертӧ ён тӧлыс шыблаліс ӧтарӧ-мӧдарӧ, но медбӧрын воисны жӧ карад, «Аннушка» грыпкысис-пуксис бетонка вылӧ да рулитіс аэровокзаллань. Шатлалігтырйи, шой кодьӧсь петалісны ывлавылӧ пассажиръяс, кодъяс лэбигчӧжыс мучитчисны кельыдлӧз енэжсӧ поткӧдысь перкаль бордъяса сынӧдса карабад. На лыдын вӧлі, дерт, и Женя Павлов. Ӧні сійӧ эз нин ёна нырсӧ лэптав, самолётӧ пуксигас моз.
— Сёйыштны он кӧсйы? — видзӧдліс детинка вылӧ Лыюров. — Колӧ кӧ, пыравлам буфетас, нуръясьыштан.
— Оз ков! — ыджыд лӧглунӧн тырӧм синъясӧн Павлов кӧсӧйтчыліс Евлогий Дмитриевич вылӧ. — Ещӧ-й сьмекайтчӧ сэні!
Лыюров некор эз волыв психиатрическӧй больничаад да эз и тӧд, кытӧнджык сійӧ. Висьталісны сӧмын, колӧ пӧ мунны Эжваӧ. Но нинӧм, корсяс. Пуксисны Эжваӧ нуӧдан автобусӧ кык «бур ёрт» — Лыюров да Павлов, и тані Женяӧс бара на шогӧдіс:
— Евлогий Дмитриевич, менӧ восӧдӧ!
Тайӧ нин вӧлі видзчысьтӧмтор, и Лыюров гораа шыӧдчис сыкӧд тшӧтш мунысь пассажиръяс дорӧ:
— Ёртъяс, некодлӧн абу полиэтилен пакет, детинкасӧ то восӧдӧ!
— Колӧ водзвыв аслыныд пакеттӧ лӧсьӧдны, тӧданныд ӧд, мый сійӧс автобусад восӧдны бергӧдлӧ, — нырсӧ лэптыштліс ӧти нывбаба.
— Аслам кӧ вӧлі, эськӧ, дерт, сідзи, но йӧзыдлысь кысь тӧдан?!
— Танӧ менам эм, — шыӧдчис мӧд ань, судзӧдіс сумкасьыс пакет да мыччис Евлогий Дмитриевичлы.
— Аттьӧ тіянлы! — Лыюров босьтіс мыччӧмторсӧ, паськӧдіс да сетіс Женялы, коді бӧръя вынъяснас нин ки лапанас вомсӧ тупкӧмӧн кутчысис да пыр жӧ и ыкнитіс пакетас, но куш сӧмын виж ва кынӧмсьыс петыштіс.
Пырисны Эжваӧ, и Лыюров шыӧдчис кондуктор дорӧ:
— Висьталӧй, пӧжалуйста, психбольнича дорас кӧні колӧ чеччыны?
— Сэтчӧ сувтланіныс коли нин! — жаляддза видзӧдліс аньыс Лыюров вылӧ, но мыйкӧ мӧвпыштіс да матыстчис водительыслӧн ӧшинь дорӧ:
— Татчӧ сувтыштлы, мед чеччасны, психбольничаӧ детинасӧ мортыс нуӧдӧ да туйсӧ вӧлӧм оз тӧд.
Водитель довкнитіс юрнас да сибӧдчис туй бокӧ, кӧть сэні эз вӧв автобус сувтланіныс.
— То таті векньыдик трӧпаӧдыс мунӧй да больничаас и люкасянныд, — индіс мунанінсӧ кондукторыс.
— Зэв ыджыд аттьӧ тіянлы! — пӧся аттьӧаліс сійӧс Лыюров.
Збыль, эз дыр и ковмы мунны, воисны дзик параднӧй кильчӧ дорӧдзыс.
— Но, пырам жӧ, Женюк.
Павлов, кор лыддис учреждениеыслысь нимсӧ, повзьӧмӧн горӧдіс:
— Татчӧ бара-й ог пыр!
— Но кыдз он пыр? Ковмас пырны!
Лыюров кутіс Женяӧс киӧдыс да кӧсйис кыскыны кильчӧлань. Но детинка нетшыштчис да кыкнан кинас шашаритчис сэні быдмысь роч лежнӧг кустӧ:
— Ог пыр!
Садӧвӧй розаыдлӧн ӧд емъясыс загреки кузьӧсь да ёсьӧсь, а Женя быттьӧ эз и кыв доймӧмсӧ. Евлогий Дмитриевич видліс торйӧдны куст бердысь детинкалысь кияссӧ, но нинӧм сылӧн эз артмы. Весиг некутшӧм дойдана приём оз вермы нуӧдны, вывті дженьыдӧсь Женялӧн киясыс, а Лыюровлӧн кузьӧсь. Тушаӧдыс кватитны да вынӧн нетшыштны куст бердсьыс оз шогмы, ки пыдӧсъясыс пыдӧдз чашнитчасны. Документъяс тыра дипломатсӧ ковмис бокӧджык сувтӧдлыны да босьтны детинкаӧс сідз шусяна «милицейскӧй захват» вылӧ, вӧлисти сэки Павлов горӧдіс доймӧмсьыс да лэдзчысис лежнӧгысь, и лӧсьыда нин пырис Лыюровкӧд больничаӧ.
— Мый нӧ тайӧ мичаник детинкаыс бӧрдӧ? — документъяссӧ видзӧдалігмоз юаліс стеклӧа ляпкыдик стен сайын пукалысь еджыд халата ань. — Эн бӧрд, тані ӧд миян гажа, гӧгӧр дзоридзьяс, и тэ коддьӧмыд унаӧн, и зонкаяс, и нывкаяс, зэв на и мичаӧсь, тӧдмасян да, бӧрти гортад бӧр весиг оз кут кыскыны.
— Евлогий Дмитриевич, на, часіӧс босьтӧй, — Женя пӧрччис кисьыс часісӧ да мыччис Лыюровлы. — Ыджыд мамӧлӧн козиныс мед тіян ордын овлас, ладнӧ?
Дерт, кӧнкӧ, мортыд полӧ, а друг сылысь гусяласны, либӧ висьысьясыс мырддясны, быдсямаыс ӧд тані, тшук, паныдасьлӧны.
— Ладнӧ, кор бурдӧдчӧм мыстиыд воан, сэки пыралан ме дорӧ, да бӧр сета, — Евлогий Дмитриевич пысаліс часісӧ аслыс киас. — Но, аддзысьлытӧдз, Женя! Надейтча, мый татысь петан дзик мӧд мортӧн.
Еджыд халата паськыд чужӧма ён айлов нуӧдіс детинкасӧ коридор кузя.
Тӧлысь кольӧм бӧрын Лыюров бара на веськаліс Кушашорӧ, дерт, и школаӧ пыраліс. Кыдз нӧ сытӧг! Аддзысьліс школьникъяскӧд и педагогъяскӧд: директор Михаил Прокопьевичкӧд и классрук Любовь Матвеевнакӧд.
— Видза оланныд, Евлогий Дмитриевич! — важ тӧдсаяс моз нин нюмъялісны сылы велӧдысьяс.
— Бур лун, выль поколение быдтысьяс да велӧдысьяс! Мый тіян выльыс? Мыйкӧ вежсис али эз менам воддза волӧмсянь?
— Кыдз нӧ эз?! Вежсис, кутшӧм ёна на вежсис! Ӧні школаын режимыс дзик мӧд! Павловтӧ нуӧм бӧрын миян ставыс лӧнис! Женя ӧд кыдзи кӧсйӧ, сідзи и олӧ. Окотитас кӧ, урок вылад локтас, кӧсъяс кӧ — оз, пырас кӧ, то уроктӧ нуӧдны оз сет, гораа сёрнитӧ, сералӧ, мукӧд велӧдчысьяссӧ дӧсадитӧ. Вермас урок шӧрас классысь петны да мӧдас коридор кузя довъявны, мукӧд классысь ӧдзӧсъяс восьтавны. Он ӧд куш сы бӧрся вӧтлысь, велӧдысьлы колӧ урок нуӧдны, классын Павлов кындзи кызь саяс школьник на! Мукӧд вильыш детинаясыд сы вылысь лёк примертӧ босьтӧны, аддзӧны ӧд, кыдзи асьсӧ школаын кутӧ Павлов, и нинӧм сыкӧд некод оз вермы вӧчны: ни велӧдысьяс, ни директор, ни милиция, ни сельсӧвет. Вот и вельмӧны тшӧтш мукӧдыс. А ӧні, кор казялісны, мый Женяӧс психбольничаӧ гири-люки гурӧдісны, сійӧ некӧн оз тыдав, то пыр жӧ лӧнисны. И велӧдысьяслы некодӧн дӧсадиттӧг позьӧ урокъяс нуӧдны, а то ӧд быттьӧкӧ школаын Павловкӧд ланьтлытӧм война мунӧ, ставным нин вывті нервнӧйӧсь лоим. Гортӧ локтам да асланым челядь вылӧ, верӧс вылӧ эралам, быттьӧ найӧ мыжаӧсь, став чукӧрмӧм лёкнымӧс на вылӧ лэдзам, школаад ӧд мый вермам — кутчысям-а, — мӧда-мӧд вежмӧныс юксисны велӧдысьяс асланыс шогъясӧн да могъясӧн.
— Гӧгӧрвоа, — довкнитіс юрнас Лыюров. — Но, сідзкӧ, Женяӧс недыр кежлӧ тіян дорысь янсӧдлім, да век жӧ школааныд атмосфераыс бурланьӧ вежсис? Тайӧ, дерт, абу лёк. Но психбольничаад дыр видзны оз кутны. Регыд, надейнӧ, лэдзасны бӧр.
— Вот сы вӧсна водзвыв нин шогсям, лэдзасны сэтысь да, колӧкӧ, зьвер кодь локтас, ставнымӧс пурас!
— Пурны эськӧ, тшук, оз жӧ уськӧдчы да, — нюмдіс Евлогий Дмитриевич. — Но сэсся ӧд бара на ме дорӧ шыӧдчанныд, да мыйӧн верма отсала. Кӧть менам Женя коддьӧмъястӧ лӧньӧдӧм вылӧ воропъясыс дженьыдикӧсь жӧ. Аддзысьлытӧдз, став бурсӧ тіянлы!
Кыдзи и чайтіс Евлогий Дмитриевич, больничаысь петӧм бӧрын Павловлӧн бурланьӧ вежсьӧмъяс эз тыдовтчыны. Сямыс сылӧн ӧтарӧ лёкмис.
Павлов Женя кындзи Лыюровлӧн уна на юр вундысь кодь зонкаясыд вӧліны. Тайӧ воас юрсиктын помалісны кыпӧдны выль школа, и сэтчӧ сӧльнитісны Кывтыдса шӧр школаысь да Катыдса кӧкъямыс класса школаысь велӧдчысьясӧс. Катыдса детинкаяс выльлаад вуджисны, да найӧ дзик бандитъяс кодьӧсь вӧлӧмаӧсь. Дерт, кывтыдсаяс пиын вӧліны жӧ лёк сямаясыс, кодъясӧс кӧртвомавтӧг кутны он вермы. А Катыдса школа прӧстмис, да сэтчӧ восьтісны вспомогательнӧй школа-интернат, кытчӧ чукӧртісны став посниуловсӧ, кодъяс таӧдз олісны да велӧдчисны республикаса мукӧд районса вспомогательнӧй школа-интернатъясын. Тайӧ вӧліны юысь бать-мамъяслӧн мырддялӧм челядь, кодъяс бур сямӧн эз жӧ вермыны ошйысьны. Найӧ ӧдйӧ тӧдмасялісны ас костаныс, ёртасисны, и артмис тыр арлыдтӧмаяслӧн дзонь банда. Тайӧ ичӧт арлыдаяслӧн котырыс крутӧя кыпӧдіс юрсиктысь преступносьтсӧ. Тӧвся пемыд войясӧ найӧ нинӧмысь повтӧг грӧмитісны складъяс, киоскъяс, пышйӧдлісны совхозса конюшняысь вӧвъясӧс да скачьялісны узьысь сикт кузя. Дерт, уголовнӧй розыскын мырсьысьяс ӧдйӧ тайӧ мыж вӧчысьяссӧ эрдӧдалісны, а посни шышъясыд эз и дзебсясьны, мӧдарӧ на, ошйысьӧмӧн висьтасьлісны асланыс «подвигъяс» йылысь, но кыдзкӧ накажитны дзоля преступникъяссӧ вӧлі зэв сьӧкыд, ӧд арлыдыс налӧн эз на судзсьы, мед пуксьӧдавны суд лабич вылӧ.
Ковмис кодсюрӧ вывті ёна ышмысь детинаяссӧ тӧлысь кежлӧ нуӧдлывлыны тыр арлыдтӧмаяслӧн приёмник-распределительӧ шойччӧдыштны. Та могӧн вель унаысь ковмис Лыюровлы лэччывлыны карӧ: ӧтиӧс нуӧдӧ приёмникӧ, мӧдӧс бӧр вайӧдӧ... Векджык некутшӧм приключениеястӧг тайӧ ветлӧм-мунӧмыс кольлывліс, аслыныс зонкаяслы тшӧтш кӧсйысис ветлыны сьӧм вештытӧг карӧдз да видзӧдлыны, кутшӧм-сэтшӧм приёмник-распределительӧн век повзьӧдлӧны найӧс. Воис ӧчередыс ветлыны сэтчӧ и Женя Павловлӧн. Психбольничатӧ ӧд аддзыліс нин...
...Триньӧбтіс телефон.
—
— О-о! Кутшӧм тэ важнӧй лоӧмыд, Евлогий Дмитриевич, коми кывтӧ весиг вунӧдӧмыд, рочасян! А ме вайӧді тэныд зэв шань детинкаӧс, дежуркаын ӧні пукалӧ, а водзӧсӧ сэсся ачыд приёмникӧдзыс лэччӧд, — серӧктіс, кылӧ, Прошкин, кушашорса участкӧвӧй, — да мед дырджык сэні видзасны, а то Кушашорын некодлы овны оз сет. Сиктсӧветса пред эз нин ӧтчыд шулы, он кӧ пӧ вермы нинӧм сыкӧд вӧчны, то босьт пи пыдди да быдты. А ме киӧн и кокӧн пыкся, меным, мися, татшӧм пиыд маті берегӧ оз ков, аслам кыкӧн быдмӧны, ог тӧд, кыдзи на накӧд матайтчыны кута, удж вылӧ муна — найӧ узьӧны на, гортӧ локта — найӧ узьӧны нин, ог и аддзывлы. А йӧзыс шуӧны: воспитывайтны пӧ колӧ! Кор нӧ воспитывайтнысӧ?
— Эн ошйысь, менам сідз жӧ. Но, час, эн бӧрд, локта, — вочавидзис Лыюров, пасьтасис да тэрмасьӧмӧн лэччис милиция отделӧ.
А сэні Женя нырсӧ вылӧ лэптӧмӧн гоньӧга пукалӧ дежурнӧй юкӧнын, шуйга коксӧ веськыд пидзӧс вылас шыбитӧма, лабич мыш вылас валитчӧма, кияссӧ лэптӧма да рака бордъяс моз паськӧдӧма, быттьӧ сійӧ и эм.
— О-о, Женюк воӧма, гажыд быри карсьыд?
Павлов нинӧм эз вочавидз, сӧмын юрсӧ бергӧдлытӧг кӧсӧйтчыліс Лыюровлань.
— Андрей Андреевич, — шыӧдчис дежурнӧй дорӧ Евлогий Дмитриевич. — Тайӧ ӧдйӧ быдмысь бандитсӧ пукӧдышт на, син увсьыныд эн лэдзлӧй. Зэв ӧд сюсь асланьыс! Мед оз пышйы, а ме жӧ гортӧдз сяркнитла, вежся и котӧрӧн бӧр локта.
— Кытчӧ нӧ сійӧ воштысяс, — ӧвтыштчис дежурнӧй. — Эстчӧ пыді жыръяс пыртам, да мед пукалӧ.
— Но, кыдз кӧсъянныд, сідзи и видзӧй! Мыйкӧ кӧ лоӧ, ме тіянӧс ӧлӧдлі!
Ывлавылын поводдяыс шогмытӧм. Кодкӧ грексьыс сикт весьтӧ ӧшйӧма сьӧда-сьӧд кымӧр шмак. Вой тӧлыс пурсьысь пон моз скӧрысь уськӧдчис Евлог вылӧ, нетшыштіс шынель пӧлаяссӧ, посни лым чиръясыс лёкысь швачкӧдісны чужӧмас: синтӧ восьтыны он лысьт, юртӧ увлань лэдзӧмӧн лоӧ писькӧдны мунан туй. Лыюров вичкодорса автобус кассаӧдз воис, пырис да кокниа лолыштіс:
— Уф-ф! Недыр кӧть тайӧ турӧбсьыс шойччышта.
Билет вузавлысь ань сӧмын довкйӧдлыштіс юрнас:
— Да-а, керкаысь петавлытӧм поводдя...
Евлог ньӧбис карӧдз кык билет, петіс ывлаӧ, бара суныштіс шогмытӧм ывла руас, муртса кежлӧ пыраліс гортас, пасьталіс гражданскӧй паськӧм, босьтіс сьӧм, колана документъяс. Тайӧ каднас пемыд кунӧрсӧ тӧлыс вӧтлӧма нин Кушашорлань. Но мед сэні бушуйтыштас, а Веждін весьтса енэжын дзирдалӧ яръюгыд шонді. То ӧд, кутшӧм ӧдйӧ ывлавылыд вежсьыны вермӧ!
Воис дежуркаӧ:
— Но, кӧні нӧ менам Женюкыс? — сюйліс юрсӧ пыді жыръяс, но сійӧ вӧлі куш, зато юрйыв ӧшиньыс гурйыв восьса.
— Вот тадзи и дежуританныд! Ичӧтик детина весиг кужӧма тіянӧс йӧйтӧдлыны! Вай жӧ, Володя, — шопер дорӧ шыасис Лыюров, — кытшовтам туйяс кузяыс, Женя кӧнкӧ сиктас бергалӧ, эз на ӧд тшук Кушашорӧдз удит лыйыштны!
Шӧр туй кузя шурӧдісны Катыдлань, кежисны Вылыс туйӧ и раймаг дорӧ матыстчигӧн аддзисны пышъялысьтӧ: лым сюръя! Туйястӧ Веждінысь оз тӧдав да кыткӧ, буракӧ, дыр келалӧма, петӧма бур туй вылад да мудзпырысь Кывтыдлань довгӧ. Пановтісны Павловӧс, сувтісны, Евлогий Дмитриевич петіс сылы воча да меліа нюмъялігтырйи паськӧдіс сывсӧ. Детинка мыйӧн сӧмын аддзис Лыюровӧс, крута бергӧдчис да уськӧдчис пышйыны Катыдлань, мӧдыс сы бӧрся, регыдӧн и суӧдіс:
— Ме «Динамоысь», а тэ «Спартакысь»? Финишӧдзыс ылын на? Омӧлик жӧ спринтер тэ вӧлӧмыд, ӧдйӧ дудін! Шпуткан, тшук, ёна?
— Куритча, — плеш кузяыс визувтысь пӧсьсӧ чышкыштіс Женя.
— Со и кашмӧмыд нин.
— Эг кӧ эськӧ паськыд туй вылас пет, этша на кутінныд менӧ да.
— Молодеч, гӧгӧрвоан, юрыд уджалыштӧ на.
Володя машинанас бӧрыньтчис на дорӧ, петіс ортсӧ да шпыннялігтырйи видзӧдліс Павлов вылӧ:
— Пышъявсис? Эк тэ, супермен! Пуксьы жӧ, — да паськыда восьтіс уазиклысь ӧдзӧссӧ.
Пырисны дежуркаӧ, автобус дорӧ петны кадыс вӧлі водзджык на, ковмас виччысьыштлыны.
— Евлогий Дмитриевич, — юрсӧ на дорӧ сюйис уголовнӧй розыскса опер Липин, — вайлы меным Павловтӧ, дзик ӧні сёрнитыштны колӧ, катӧдла кабинетӧдз.
Липинлӧн чужӧм вылас видзӧдлан, да кӧть ӧні пуксьӧд. Вом пельӧсас век чигарка ӧшйӧма, да абу сигарет, а папирос. Кысь сійӧ папироссӧ корсьӧ, некод оз тӧд, магазинъясас ӧд быдлаын сӧмын сигарет. И юрас сылӧн век эмышт. Кымынысь морттӧ товарищескӧй суд вылын гогнавлісны, грӧзитчисны вӧтлыны удж вывсьыс, но бара на кольлісны. А кысь вӧтлан? Мыжъяс эрдӧдӧмын сыысь бурджык сыщикыс абу. Вот и кутӧны.
— А кӧні нӧ водзджыксӧ вӧлін? Асывсяньыс нин тані мортыс дӧсадитчӧ да...
— Некор вӧлі, а ӧні буретш прӧстми.
— Катӧдлы, сідзкӧ, но миянлы ӧд регыд нин автобус вылӧ петны ковмас.
— Ме удита.
Минут кызь мысти вомас чигарка курччӧмӧн Липин вашъялігтырйи пырис дежуркаӧ. Лыюров чуймӧмӧн луп-лапкерис синнас:
— А кӧн нӧ Женяыд?
— Некытчӧ оз воштысь, ме сійӧс кабинетӧ игналі, — веськодя ӧвтыштчис опер.
— Да тэ нӧ мый?! Мӧд судтаад ӧд ӧшиньясыс решёткатӧмӧсь!
Евлогий Дмитриевич чепӧсйис кильчӧ вылӧ, чатӧртчис Липинлӧн кабинет ӧшиньлань, и тайӧ кадас сылы веськыда чужӧмас мыйӧнкӧ колскисны. Чуймӧмӧн крута бергӧдчис, бӧрас ни водзас некод абу, сӧмын уна кокӧн южмӧдӧм лым вылын туплясьӧ ыджыд сьӧд дутик. Евлоглӧн нырыс дзолядырсяньыс вӧлі рыж, муртса мыйкӧ лоӧма — сэтысь пыр жӧ чепӧсйис вир. Ӧдйӧ судзӧдіс зепсьыс ныр чышкӧд да вайӧдіс чужӧм бердас. Вӧлисти бара видзӧдліс вывлань. А сэні, восьса ӧшинь пӧдушкаӧ кутчысьӧмӧн, стенлань чужӧмӧн кияс вылас ӧшалӧ Павлов, кодлӧн ӧтар кокыс дутика, а мӧдыс носки кежысь. Но со киясыс зонкалӧн мынісны, и сійӧ чикыш моз тювкнитіс увлань.
Лыюров удитіс кутыштны детинкаӧс киняувтіыс, мед кӧть коксӧ оз чег:
— Эн доймы?
— Э-эг...
— Но, сідзкӧ, кӧмась, мед кокыд оз кынмы, и автобус дорад тапкам.
Некутшӧм приключениеястӧг гурӧдісны карӧдз. Кӧрткерӧс дорті Эжва вомӧн пос стрӧитны помалӧмаӧсь нин, автобусъяс журъялӧны ӧтарӧ и мӧдарӧ: майбыр, ӧні оз нин ков аэропортын лун-лун шняпвидзны да кымӧр разалӧм виччысьны.
Быдмысь войтырлы приёмник-распределитель сулаліс кар бокас моз. Тайӧ кирпичысь тэчӧм кык судтаа керкаыс зымвидзӧ топыд кӧрт тасъяса потшӧс сайын, ӧшиньясас мича узоръяса решёткаяс. Женя сідзи и бергӧдліс юрсӧ, чатрасис сыӧн волывлытӧм на стрӧйба вылас. Евлогий Дмитриевич личкыштіс звӧнок кнопкаӧ. Воссис ӧдзӧс, да кильчӧ вылӧ петіс милицияса сержант:
— Видза оланныд! Мый звӧнитчанныд? Петкӧдлӧй документъястӧ!
Лыюров судзӧдіс удостоверенньӧсӧ.
—
— Да, со тай том бандюгансӧ вайӧді тіян отельын шойччыштны, ыджыд мамыскӧд гӧлиника тшыг нисьӧ пӧт олігад дзоньвидзалунсӧ дзикӧдз воштіс мортыд. Кынӧм сюмалігад пемыд войнад то «Сельпо» столӧвӧйӧ пыралас нуръясьыштны, то магазинӧ. Ӧти лача коли тіян курорт вылӧ, тані ӧд «
— Ми гортад дорысь, дерт, чӧскыдджыка вердам, да мукӧд воспитанникъясыс тшӧгыштӧны весиг. Тані ыджыд мамъясыд абуӧсь, а воспитательясыс зэв «шаньӧсь», на водзын этша чеччалан! Лечитчан курссӧ прӧйдитӧм бӧрын лэдзам, да кодсюрӧ весиг недыр мысти выльысь миянӧ вӧзйысьӧны, кажитчӧма, буракӧ, татчӧс олӧмыс. А мукӧдыс вельмасны да оз и петавлыны! Тайӧ сырчик вылас документъясыс эмӧсь?
— А кыдз нӧ! Натӧг оз позь.
Евлогий Дмитриевич судзӧдіс дипломатсьыс Женя вылӧ бумагаяссӧ, сержант пасъяліс журналӧ детинкалысь ов-ним-вичсӧ, оланінсӧ, вайӧдӧм кадсӧ и коді сійӧс вайӧдіс. Матыстчис мӧд милиционер, тшӧтш сержант погонъяса:
— Миян преступносьт, видзӧда да, ӧтарӧ томмӧ, бара выль воспитанник воис? Видзӧд жӧ, видзӧд, весиг ӧчкиа! Тӧдчӧ, мый интеллигент! Татшӧмтӧ туй вылысь кӧ аддзан, то нинӧм вылӧ он чайт правонарушительӧн!
Женя жӧ пукаліс дежурнӧйлы паныдӧн улӧс вылын кокъяссӧ блонкйӧдлігтырйи да веськодя видзӧдаліс приёмник ӧдзӧс бердӧ лӧсьӧдӧм дежуританінсӧ, ӧшиньяссӧ, коридорсӧ, шпыннялігтырйи лыддяліс стенысь плакатъяс:
— Лок жӧ, Павлов ёрт, петкӧдла тэнсьыд узьланінтӧ, — и сержант нуӧдіс правонарушительӧс аскӧдыс...
...Тринькнитіс телефон.
— Да.
— Евлогий Дмитриевич, бур лун! — трубкаын кыліс КпДН-са секретар Кореневалӧн челядьлӧн кодь вӧсньыдик гӧлӧсыс. — Звӧнитлісны карса приёмник-распределительсянь, Павлов Женя вылӧ пӧ воӧма путёвка спецучилищеӧ, колӧ матысса кадӧ карӧ лэччӧдны детинасӧ.
— О-о! Зэв тай бур! Ковмас участкӧвӧйлы юӧртны, мед вайӧдас Веждінӧдз, а тасянь ме карас лэччӧда нин.
Но кык лун мысти бара звӧнитіс Коренева:
— Евлогий Дмитриевич, Кушашорысь локтӧма Павлов Женялӧн ыджыд мамыс, корӧ чукӧртлыны комиссия, мед ми ӧткажитчам мӧдӧдны внуксӧ спецучилищеас.
Лыюровлӧн видзчысьтӧмысла вомыс паськаліс, и кыв-ворыс вошліс:
— Да коді сійӧ сэтшӧмыс, мед ми ставӧн йӧктім сылӧн гудӧкасьӧм улӧ?
— Ме кори нин комиссияса членъяссӧ, волӧй и ті. Збыль вылас и меным тшӧтш зэв оз кажитчы тадзи чукӧртчӧмыс... Но, мед, виччысям тіянӧс.
— Вола, дерт, кык керка костыд абу ылын.
Кор Лыюров пырис КпДН кабинетӧ, сэні Коренева кындзи пукалісны нин комиссияса председатель Кутькин, районса прокурор Морозов, райбольничаса врач Костенко, военкоматысь офицер Правдин, комсомоллӧн райкомса секретар Колесова.
Вот тайӧ да! Но и Елена Васильевна! Чуньнас ӧтчыд шлочнитӧмӧн сяммӧма чукӧртны та мында йӧзӧс!
Комиссияса членъяс пукалісны кузь пызан гӧгӧр, налы паныдӧн стенбердса улӧс вылын — Елена Васильевна.
— Но мый? Ставным чукӧртчим, позьӧ заводитны, — юӧртіс Коренева. — Комиссиялӧн заседание вылын ӧти юалӧм: миян дорӧ шыӧдчис Женя Павловлӧн ыджыд мамыс — Елена Васильевна. Сійӧ корӧ, мед ми ӧткажитчам спецучилищеӧ путёвкаысь. Нинӧмла пӧ мӧдӧдны детинасӧ кытчӧкӧ ылӧ, кор позьӧ справитчыны сыкӧд лӧсьыда сёрнитӧмӧн, ӧні мортыс быдмыштіс, сӧвмыштіс, бур кывтӧ гӧгӧрвоӧ... Коді мый шуанныд та вылӧ?
— Ме думысь, первой сетлам кывсӧ Елена Васильевналы, сылӧн корӧм кузя ӧд ми татчӧ чукӧртчим, — вӧзйис Кутькин.
— Пӧжалуйста, Елена Васильевна.
Елена Васильевна сувтіс, лӧсьӧдыштіс юрсисӧ да заводитіс:
— Бӧръя кадас менам внуклӧн сямыс ёна вежсис, и вежсис бурланьӧ. Женя быдмыштіс, сӧвмыштіс, сюсьмыштіс, кутіс гӧгӧрвоныджык олӧмсӧ, дугдіс вильшасьны, тышкасьны ёртъясыскӧд. Ме кори совхозса директорӧс, да сійӧ босьтіс Женяӧс удж вылӧ. Луннас сійӧ уджалӧ, рытнас гортӧ локтӧ, мудзӧма, ужнайтӧ да водӧ узьны. И ме думысь, сійӧс дзик нинӧмла мӧдӧдны кытчӧкӧ спецучилищеӧ, кӧні детинасӧ дзикӧдз тшыкӧдасны, да сійӧ бӧрти веськалас тюрмаӧ. Вот татшӧм менам корӧм.
— Елена Васильевна, Женя ӧд велӧдчӧ на. Сійӧс школаысь эз вӧтлыны. И кыдзи сійӧс удж вылӧ босьтісны комиссияӧн разрешиттӧг? — юаліс Кутькин.
— Школасьыс сылы пышйыны ковмис да! Велӧдысьясыс да директорыс детинасӧ сёйӧмӧн сёйисны! Кутшӧм нин велӧдчӧм!
— Мый шуас инспекция? Евлогий Дмитриевич, кыдзи ті думайтанныд? — шыӧдчис Коренева.
— Женя вылӧ воис спецучилищеӧ путёвка. Колӧ пасйыны: татшӧм путёвкаястӧ миянлы зэв гежӧда вичмӧдлӧны, спецучилищеясыс Сӧветскӧй Союз пасьтала этша, а том вильышпозыс уна. Ӧні кӧ ӧткажитчам мӧдӧдны Женяӧс спецучилищеӧ, то миянлы и дзикӧдз дугӧдчасны путёвкаяссӧ сетӧмысь. Шуасны, пидзӧсчанясьӧмӧн дзайганныд-коранныд места спецучилищеӧ, а мыйӧн дыр виччысяна путёвкаыс воас, то асьныд жӧ ӧткажитчанныд! Миянӧс Республика оз гӧгӧрво.
— Коді мый кӧсйӧ содтыны? — гӧгӧртіс видзӧдласнас комиссияса членъясӧс Коренева.
Кыв босьтіс Кутькин:
— Час, ме кыв-мӧд висьтала. Елена Васильевна, вот ті шуинныд, мый Женя ӧні дзикӧдз вежсис, но тадзисӧ оз овлы. Тӧрыт вӧлі оболтусӧн, талун пай-мальчик! Тӧрыт школасӧ дзоньнас пузувтіс, велӧдысьяс и челядь караул горзісны сылӧн сямтӧм олӧмсьыс, а ӧні сійӧ школаын абу, да ставыс ладмис: учительяс кокньыда лолыштісны, велӧдчысьяслӧн тӧдӧмлунъясӧн юръясыс тырӧны... Ме неважӧн вӧлі Кушашорын, сёрнитлі школаса директорыскӧд да бура ставсӧ тӧда. Женя вылӧ видзӧдӧмӧн мукӧд посниуловыс вельмӧны. То пӧ, кутшӧм ичӧт арлыда преступник, мый кӧсйӧ, сійӧ и вӧчӧ, меным пӧ тшӧтш, сідзкӧ, позяс сы моз жӧ ачымӧс кутны. А мӧдӧдам кӧ сійӧс спецучилищеас, то посни вильыш детинкаясыд пыр жӧ лӧнясны. Мый вылӧ, сідзкӧ, ми тані пукалам, огӧ кӧ вермӧй справитчыны кутшӧмкӧ зырымбедькӧд?!
Елена Васильевна, коді таӧдз пукаліс лӧня да кывзіс мунысь сёрнисӧ, звиркнитіс-чеччис, синъясыс югзисны. Сійӧ воськовтіс водзлань да кыдз тай камнитіс кулакнас пызанӧ:
— А тіянлы абу яндзим?! Чукӧртчӧмныд татчӧ та мында дась нянь сёйысь да мырдӧн тойланныд менсьым дзоля внуксӧ кутшӧмкӧ спецучилищеӧ! Некод весиг ни ӧтчыд эн сёрнитлӧй сыкӧд лӧсьыда, он тӧдӧй, мый вӧчсьӧ сылӧн ичӧтик сьӧлӧмас! — бара лэптіс кулаксӧ, ӧні нин Костенко вылӧ, коді пукаліс сысянь медся матын. Врач чеччыштіс улӧс вылысь, вешйис боклань, ӧд тайӧ ярмӧм нывбабаыд и збыль вермас чужӧмбантӧ тшыкӧдны. Морозов лэптіс телефон трубкасӧ да звӧнитіс милицияӧ. Лыюров, а сійӧ тані ӧтнасӧн формаа морт, тэрыба матыстчис Елена Васильевна бердӧдз да бӧрсяньыс топыда кутіс сійӧс, мед лӧньӧдны пузьӧм вира аньсӧ. А мӧдыс пескыльтчис да кӧсйис гыжъяснас чашнитны Евлогий Дмитриевичлысь чужӧмсӧ, но эз сяммы судзӧдчыны, ӧд кияссӧ сылысь бура топӧдӧма туша бердас. Нетшкысьыштіс на, мед мынтӧдчыны, но бара эз вермы да лёкысь бӧрддзис, зэлавлӧм сӧнъясыс личалісны. Лыюров тайӧс бура кыліс и надзӧникӧн лэдзис нывбабасӧ ас бердсьыс, виччысьыштіс, мый сійӧ кутас вӧчны, лӧняс али сетлас на вӧлясӧ лёклуныслы. Но Елена Васильевналӧн, буракӧ, эбӧсыс бырӧма нин, сійӧ чышкалыштіс синвасӧ да петіс коридорӧ.
— М-мда, — ышловзис Кутькин. — Быдсяма йӧзыс жӧ паныдасьласны... Та вылын, гашкӧ, заседаниенымӧс и помалам? Кодкӧ паныд?
Некод нинӧм эз шу, чӧв олігтыр разӧдчисны.
— Лӧсьыда кӧ сёрнитіс да содтӧд бӧрдыштіс, синвасӧ кисьтыштіс, нормӧдыштіс ловнымӧс, висьталіс, мый внукыс сылы жаль, колӧкӧ, и миян сьӧлӧмъясным небзьыштісны, да воддза шуӧмсӧ вежим на, а ӧні... — кывкӧрталіс Коренева.
— Женя, дерт, бурланьӧ ньӧти эз вежсьы, ме таӧ ог эскы, прӧстӧ лӧньліс, кӧсйис мудеритны, мед мынтӧдчыны спецучилищеӧ мӧдӧдӧмысь. Мыйдыра сьмекайтчис бур йӧз вылас, посни челядь вылас! Мед ветлас, сэні тшук тайӧ зырымбедьсӧ велӧдасны дорын узьлыны! — ӧдзӧс дорсянь нин чӧвтіс Лыюров.
Аслас кабинетас мунігӧн автобус сувтланінысь сійӧ казяліс Елена Васильевнаӧс, коді сулаліс бокынджык, йӧзсьыс мышкӧн бергӧдчӧмӧн да гусьӧн бӧрдіс.
...Зилькнитіс телефон, Евлогий Дмитриевич кыпӧдіс трубкасӧ да, кыдзи и век, збодера вочавидзис:
—
— Старшӧй инспектор ёрт, — трубкаысь кыліс участкӧвӧй Прошкинлӧн кыз гӧлӧсыс. — Тэ мый сэтшӧм лёка уджалан?
— Кыдзи лёка?! Начальник тай нӧ ошкӧ, неважӧн на премия бура служитӧмысь пайдыштіс! — эз шӧйӧвош Лыюров. Сійӧ важӧн нин велаліс райотделса сотрудникъяслӧн шмонитӧмӧ да ачыс сьӧлӧмсяньыс воча шмонитіс.
— Кодкӧлун на ошйысин, Павлов вылӧ пӧ путёвка воис спецучилищеӧ, а детинаыс век на сиктын! Быд лун код юра довъялӧ, ог тӧд, кысь сійӧ и юӧ?.. То ӧтикӧс ичӧтджыкъяс пӧвстсьыд нӧйтас, то мӧдӧс... Кор нӧ карас нуӧдан?
— А тэ кытчӧ видзӧдан? Тэ ӧд Кушашорад царыс и енмыс, и милицияса начальникыс... Профилактическӧй уджсьыс, сідзкӧ, дзикӧдз лэдзчысьӧмыд! Кӧть нин чуньнад мед грӧзитыштін, шошукӧдыс лэптыштлін да! Нӧйтнытӧ оз позь-а, асьтӧ пуксьӧдасны...
— Ме вот буретш профилактиканад и нокся, то ӧні кабинет шӧрын Женя Павловыс сулалӧ, а ме сылӧн чужӧм водзас пистолетӧн сэтчӧ-татчӧ новлӧдла.
— Но и мый, повзис?
— Кысь нӧ эз?! Чужӧмыс еджыд бумага кодь кельыд, кокъясыс тіралӧны, гачыс кӧтасис...
Трубкасьыс кыліс Павловлӧн гораа серӧктӧм.
— Но, Женя, Евлогий Дмитриевичыдлы привет тэсянь висьтала? Тэ лӧсьыда сулав! И джоджас эн сьӧлав, а то дзоньнас кабинетсӧ мыськавны ковмас! — кыліс трубкаысь участкӧвӧйӧн тыр арлыдтӧм Павловкӧд «профилактическӧй мероприятиеяс» нуӧдӧм.
— Урадник ёрт, тэ кык лун мысти локтан Веждінӧ сӧвещанньӧ вылӧ, вот сэки и вайӧд дона Женюксӧ, а ме сійӧс водзӧ карас лэччӧда. Сёрнитчим? Да аслыс водзвыв эн висьтав, а то сійӧ ӧд руч кодь мудер, вермас лэччӧдан луннас кытчӧкӧ уйкнитны, сэсся бӧрас и корсь.
— Но, бур, сёрнитчим, сідзкӧ! Кылін, Женя, Евлогий Дмитриевичыд шуис, мӧд вежоннас пӧ сійӧ волас да гурӧдас тэнӧ приёмник-распределителяд, а сэтысянь этап кузя мукӧдъяс нин водзӧ нуӧдасны? Ӧти кывйӧн кӧ, виччысьӧ тэнӧ кузь туй да казённӧй керкаын тыр-бур гажа олӧм. Аддзысьлытӧдз, Евлогий Дмитриевич!
Кыдзи сёрнитчылісны, сідзи и вӧчисны. Кык лун мысти участкӧвӧйлӧн конвой улын Женя Павлов юрсӧ вылӧ кыпӧдӧмӧн, гоньӧга, быттьӧ сійӧ и эм, воис Веждінӧ. Видзӧдӧй пӧ, юрсиктса йӧзӧй, кутшӧм ыджыд мортӧдз ме вои, милиция видзӧ, мед сӧмын нинӧм мекӧд эз ло, мед некытчӧ видзчысьтӧг эг крукась да доймымӧн усь.
И бара кык ёрт, ыджыд да дзоля, орччӧн пукалӧны, карлань тюрӧны, сё кӧкъямысдас километра туйсӧ каттьӧны... Чӧв олыштісны, но медбӧрын Лыюров, мед гажаджык лоӧ пукавнысӧ, кокньыдика гырддзанас зӧргыштіс Павловлы:
— Вай ошйысьышт аслад олӧмнад, мый нин матысса каднас вӧчлін?
— Да нинӧм быттьӧ и казьтывнысӧ, — нюжӧдыштіс детинка. — Да, пӧлинӧ, магазин петкӧді.
— Кутшӧм магазин?
— Сельполысь.
— А кыдзи нӧ сэтчӧ пырин?
— Зэв прӧстӧя. Палича пос кузя кайи керка вевт вылас, пач трубаас чужйи, сійӧ гиля-голя киссис, кирпичьясыс лёка нин кутчысьӧны вӧлӧм ӧта-мӧд бердас, кокниа торъялісны. Воссьӧм розьӧдыс лӧскас лэччи, водзӧ трубасӧ рази да магазин пытшкас вои. Куш мешӧкӧ сӧвті вина дозъяс, куритчан да мыйсюрӧ чӧскыдторъяс: шоколад плиткаяс, кампет-преник, и петкӧді. Ставсӧ дзеби гусяинӧ, кодӧс сӧмын ме тӧда, да быд лун номсаси!
— Пӧръясян! Нинӧм вылӧ ог эскы! Магазинъяс петкӧдысьӧдзыс тэ эн на удит быдмыны, сэні ставсӧ водзвыв думайтӧмӧн лоӧ вӧчны, а та вылӧ колӧ сюсь юр! Тэ кӧ сэтчӧ пыралін, дзоляник кок туйяс кузяыд эськӧ пыр и гӧгӧрвоисны, тайӧ пӧ тай Женя Павловлӧн уджыс!
— О-о! Ме ӧд абу сэтшӧм йӧй, эг аслам сапӧгӧн сэні уджав! Сарайын зэв ыджыд размера кирзӧвӧй сапӧг гоз вӧлі туплясьӧ, сійӧс босьті, куим пӧвста нямӧд кокӧ гарті да сідзи нокси. Ыджыд сапӧгӧн да перчаткиӧн пыралі. Тіян нинӧм гӧгӧрвотӧм сыщикъясыд юысь мужикъясӧс ӧти бӧрся мӧдӧс дыр кыскалісны, а ме бокисянь видзӧді да сералі на вылын!
— Сэсся мый? Ӧтнадӧн ставсӧ и ырскин?
— Мыйла ӧтнам?! Абу ӧд ме алкоголик! Другъяскӧд!
— И весиг другъясыд нинӧм эз гӧгӧрвоны?
— Ме ӧд висьтавлі, мися, ыджыд мамӧлысь гусявла, сійӧ выжывалӧ нин — ньӧбалӧ магазинсьыд, а кымын доз сылӧн гӧбӧчас, оз помнит! А ёртъясӧй сӧмын вежалӧны меным, миян пӧ, коньӧръяслӧн, татшӧм ыджыд мамыд абу!
Женя пукаліс пельпомъяс паськӧдӧмӧн, пуклӧс бӧр вылӧ став тушанас лэдзчысьӧмӧн, а чужӧм вылас пӧт каньлӧн моз ворсіс нюм. Нӧшта неуна, и радпырысь кургыны заводитас.
Но эз дыр тадзи чӧв ов, кыпӧдчыштіс, кисӧ сюйис зептас, гудйысьыштіс сэні, кыскис сигарет пачка да истӧг кӧрӧб. Лыюров сюся видзӧдіс сы бӧрся да мӧвпаліс, кутшӧм мӧвп Женялы юрас пырис. А зонка кыскаліс пачкасьыс сигаретсӧ да надзӧникӧн заводитіс найӧс сёйны.
«Да сійӧ жӧ ставсӧ, мый зептас эм, ньылалас, та бӧрын сійӧс сьӧктӧдас, заводитас восӧдны, меным бара ковмас ноксьыны сыкӧд, нуӧдны больничаӧ, а друг да водтӧдасны сэтчӧ, а водзӧ мый?»
— Ноко, дугды сёйны быдсяма страмсӧ! Вай татчӧ сигареттӧ да истӧгтӧ! — нюжӧдіс кисӧ Евлогий Дмитриевич.
— Вешйы сэтысь, лӧкань! — ӧвтыштчис Павлов да сюйис вомас выль сигарет.
— Дугды, колӧкӧ, а то ӧд киястӧ кӧртавла!
— Ха-ха! А кӧні нӧ наручникыд?
— Ме и наручниктӧг на тэнӧ верма зэв топыда домавны!
Лыюров пӧрччис гачсьыс тасмасӧ, вӧчис пекля, кыдзи коркӧ велӧдлісны милиция школаын, сюйис Женялысь кияссӧ сэтчӧ да зэлӧдіс.
— Вот тадз! Ӧні кӧть мыйта нетшкысь! Эн кӧ куж лӧсьыда карӧдз лэччыны, ӧні пукав домалӧмӧн!
— Ук тэ, помӧй гу, киссьӧм сарай пос! Ноко, разь бӧр киясӧс!
— Нинӧм вылӧ ог! — и Евлогий Дмитриевич бергӧдчис мӧдарӧ.
И кузяла, кытчӧдз карӧдз эз воны, Павлов эз и пуксьыв, сулаліс орччӧн да дугдывлытӧг матькис-ёрччис, быдсяма лёк кывнас нимтіс Евлогий Дмитриевичӧс. А мӧдыс веськодя пукаліс, быттьӧ нинӧм эз и кыв...
Колис Павловӧс приёмникӧ да кокниа лолыштіс: «Но вот, Ен отсӧгӧн Женяӧс иналӧма, мед сэсся сэні ылі муас велӧдчӧ, специальносьт пӧлучитас да, колӧкӧ, мортӧн на лоас. А ме мынла сыысь во кык кежлӧ...»
Но и... Во кык кежлӧ?! Кык тӧлысь мысти Кушашорса участкӧвӧй Прошкин звӧнитіс:
— Ыджыд праздникӧн тэнӧ, Евлогий Дмитриевич!
— Быттьӧ тай нӧ матысса кадӧ праздникъяс календар вылын оз тыдавны?..
— Календарыд ичӧт, оз став праздникыс сэтчӧ тӧр... Но, ог кут тэнӧ дыр кутны тӧдтӧмӧн: Кушашорӧ воӧма Женя Павлов! — быттьӧ ылӧ лыйлан артиллерия грымӧбтіс телефон трубкаысь.
— Но-о! Мыйкӧ, мися, тавой зэв лёка узьсис!.. Вот, вӧлӧмкӧ, мый понда сьӧлӧмӧй дугдывлытӧг чорыда нетшкысис... Училищесьыс пышйӧма?
— Сідзи. Сэні ӧд эз тӧдны, кутшӧм морт миян Женюкыд, да эз вывті стрӧгӧя сы бӧрся и кыйӧдны... Чайтісны, коми деревняса пӧ, да тшук кукань кодь рам, кӧнкӧ. А тайӧ ӧд миян аттӧ писькӧс! Некытчӧ оз йӧрмы! О! Видзӧд жӧ, видзӧд! То туй мӧдар бокӧдыс Павловыд кытчӧкӧ лашкӧ. Оз тэрмась, быттьӧ кӧзяин гортас воӧма кузь командировка бӧрын. Час ме сійӧс кута. Евлогий Дмитриевич, тэ телефон дорсьыд бокӧ эн вешйы, менам тані грандиознӧй план юрӧ пырис...
Интереснӧ, кутшӧм сэтшӧм грандиознӧй план Прошкиныслы тыртӧм юрас пырис?
— Но, виччысьла нин.
Телефон дыр кежлӧ лӧнис. Матӧ час ковмис виччысьны, но медбӧрын ловзис жӧ, триньӧбтіс:
— Алло! Евлогий Дмитриевич, ме Женятӧ мӧдӧді Веждінӧ самолётӧн, ӧні буретш кыпӧдчис, бордъяснас то швачӧдчӧ, кылан? Тэ кай аэропортад да гӧрд ковровӧй джодждӧра вольсав самолётӧдзыс, мед детинаыс кыськӧ гусялӧм мича берцысӧ оз лякӧсьт...
Лыюров шыбитіс трубкасӧ. Но и Прошкин! Ӧні колӧ кык километр котӧртны аэропортӧдз да лӧсьӧдчыны Павловлӧн петігкежлӧ самолёт дорас, мед оз удит кытчӧкӧ сывны. Чепӧсйис ывлаӧ, китель кизьяссӧ ывлаын нин кизяліс. Бур, мый самолёт воигкежлӧ сикт шӧрсянь аэропортӧ кайӧ автобус, то, вӧрзьӧдчӧ нин. Евлог котӧртігмозыс ӧвтыштіс кинас шоперыслы, мортыс казяліс да сувтӧдыштліс пазиксӧ. Лыюров чеччыштіс пос тшупӧд вылас да кокниа лолыштіс. Довкнитліс нюмъялысь шоперыслы юрнас, аттьӧаліс. Аэропортӧ воигас самолётыс буретш пуксис, рулитыштіс да сувтіс дзик потшӧс дзиръя весьтас.
Женя лэччис борт бокас ӧшалан пос кузя, жугласьӧм ӧчки пырыс аддзис Лыюровӧс да ассьыс донсӧ тӧдысь морт моз тэрмасьтӧг матыстчис сы дорӧ.
—
— Эз ёна шыблав эськӧ да... Сӧлӧдіс Прошкиныд самолётас, а ме кӧсйи рулитігас чеччыштны, ӧдзӧссӧ восьті весиг, но падми.
Участкӧвӧйыд вӧлӧм, гадыд, мотоциклетнас самолёт бӧрсяыс вӧтчӧ! А бӧрвывсянь мӧд пилотыс матыстчис, кыскыштіс менӧ пытшланьыс, ӧдзӧссӧ сиптіс да каличаліс, а менӧ сійӧ жӧ ӧдзӧсас и санӧдіс. Сэки ӧчкисьыд веськыдладор стеклӧыс и потіс.
— Вот, другӧ, кутшӧм йӧз! Ӧти мотоциклӧн вӧтлысьӧ, мӧд нырнад санӧдӧ, ӧчкитӧ жуглӧ... Кытчӧ сӧмын милицияыс видзӧдӧ?
— Сійӧ и эм. Самолётӧн лэччӧдан али автобусӧн?
— Самолётад карӧдзыд оз босьтны, паспортыд абу, ковмас автобусӧн кыссьыны. Кушашорад тэнӧ бура тӧдӧны да сідзи лэбӧдӧмаӧсь-а...
Лэччӧдіс Евлогий Дмитриевич карӧдз Женяӧс. Сизимӧд номера автобусӧн вӧрзисны приёмниклань. Пуксисны орччӧн, но недыр мысти Павлов шыасис:
— Евлогий Дмитриевич, шогӧдны кутіс, ме ӧдзӧс бокас сулышта, сэні кӧть сынӧдыс сӧстӧм, абу бензин дука.
— Но, лолалышт нин сэні, шогӧдӧ кӧ.
Женя сувтіс пыран ӧдзӧс бокӧ, мун да и тӧд, колӧкӧ, збыль мортсӧ бара на восӧдны бергӧдлӧ? Но Лыюров тӧдіс, мый тайӧ мудер ручыс быдтор вылӧ вермас мунны. Колӧ лоны дасьӧн!
Автобус надзӧникӧн дзуртігтыр тюрис пыр водзӧ, бӧрӧ коли ӧти сувтланін, мӧд. Со и коймӧд воис. Женя сулалӧ ӧдзӧс бердын, оз вӧрзьы, дзоргӧ кытчӧкӧ бокӧ, аслас мӧвпъясӧ вӧйтчӧма, мый йылысь кӧ думайтӧ. Автобусысь чеччысьяс петісны, пырысьяс пырисны. Со и ӧтар-мӧдар боксяньыс векньыдик ӧдзӧсъясыс вӧрзисны пӧдласьӧмлань. И сэки детинка ловзис, тэрыба тювкнитіс ӧдзӧсъяс костӧдыс ывлаӧ. Но и Лыюров эз узь. Павловысь на зільджыка ӧдӧбтіс сы бӧрся, гырддзаяснас кутыштіс пӧдласьысь ӧдзӧсъяссӧ, чеччыштіс ортсӧ да веськыд кинас шошукӧдыс тшапнитіс пышйысьӧс. Дипломата шуйга кинас ӧвтыштіс шоперыслы, мед сійӧ сувтӧдлас вӧрзьӧдчӧм нин автобуссӧ. Водитель гӧгӧрвоис сійӧс, автобус джӧмдіс, ӧдзӧсъяс бӧр воссисны. Пырисны салон пытшкас, Лыюров ӧні пуксьӧдіс Павловӧс аскӧдыс орччӧн.
— Женя, кытчӧ нӧ тэрмасян? Эгӧ на ӧд воӧй!
Детинка сотыштіс сійӧс ӧчки сайсяньыс лӧглунӧн тырӧм синъяснас:
— Сорси тай тӧдлытӧгыд.
Приёмникын Женяӧс рӧднӧйӧс моз примитісны:
— О-о! Кодӧс, мися, и вайӧдӧны? А тайӧ вӧлӧма миян радейтана Женюкным! Лок пыр, шань пи, пыр, важӧн нин виччысям, гаж бырӧма!..
Комиын март тӧлысь. Евлогий Дмитриевичлӧн уджыд Женя Павловтӧг тырмымӧн, и сійӧ кыдзкӧ велаліс нин, мый Женя ӧні абу, во-мӧд кежлӧ сійӧс йӧршитӧма спецучилищеӧ. Мед сэтчӧс воспитательяс детинасӧ велӧдӧны, а Веждін районын мукӧд посни жуликыскӧд колӧ мырсьыны.
Милицияын сӧвещанньӧ, быд тӧлысь помын район пасьталаысь став сотрудникыс чукӧртчывлӧны отделӧ: велӧдчӧны, тӧдмасьӧны выль приказъясӧн, лыйсьӧны пистолетысь да автоматысь, сдайтӧны зачётъяс, босьтӧны удждон да бӧр разӧдчӧны быдӧн аслас сиктъясӧ.
Прошкин чолӧмасигас бара на и вайис Лыюровлы «бур юӧр»:
— Павлов пӧ тані. Ме ачым эг на аддзыв сійӧс, но йӧзыс висьталісны, зэв бур паськӧмӧн пӧ воӧма, дзик пижон кодь!
Дерт, кыськӧ локтігмозыс коммерческӧй киоск грабанитіс.
— Молодеч жӧ сійӧ миян! Районлӧн «краса и гордосьт», некор пикӧ оз во... Ачым ог эшты, мӧдӧдла Кругловӧс, мед кутас тайӧ бандитсӧ да вайӧдас, бара ӧд ковмас лэччӧдны карӧдзыд.
Круглов — ИДН-са выль инспектор, Евлогий Дмитриевичкӧд ӧтлаын уджалӧ. Сійӧ кайис Кушашорӧ Прошкинкӧд тшӧтш, мед кыйны Женя Павловӧс.
Мӧд луннас пажын бӧрын Лыюров звӧнитіс Кушашорӧ участкӧвӧй кабинет номер кузя, трубкасӧ босьтіс Круглов.
— Но мый, Круглов ёрт, Павловтӧ кутін?
— Эг на...
— Ме чайті, тэ Веждінлань нин матыстчан Женяыскӧд тшӧтш. Мый нӧ ӧні, сідзкӧ, кабинетас бронвидзан?
— Гачӧс косьта.
— ...Гач косьтан?!
— Да...
Лыюров недыр кежлӧ ланьтліс, веськӧдліс юр вемсьыс чукыль-мукыльяссӧ и некыдз эз вермы гӧгӧрвоны, мый эськӧ сэтшӧмыс вермис лоны Кушашорас, мед Круглов кӧтӧдіс гачсӧ?
— Кушашорад шӧр туй вылӧ мыйӧн петі, пыр и паныдаси ме Павловыдкӧд, горӧді, мед сувтлас, а сійӧ, мыйӧн менӧ казяліс, кыдз тай ӧдӧбтіс пышйыны! Ме сы бӧрся! Керкаяс сайтіыс шелӧтитіс помӧй кисьталанінті. Ставыс сэті йизьӧма, а вылысыс шонді водзад сылыштӧма, век жӧ ывлавылад март сулалӧ, вильыд. Женя кыськӧ гусялӧм бур импортнӧй берцынад сэті кокниа ризӧдіс, а ме сӧветскӧй шыльыд пыдӧса ботинкиа, вильсниті да кыдз тай помӧй вылад качлӧмӧн став сьӧлӧмсянь шляпкыси! Чеччи, видзӧдлі ас вылӧ: гачӧй шогмытӧм няйт, кутшӧм нин та бӧрын Павлов бӧрся вӧтлысьӧм! Участкӧвӧй кабинетас гачӧс ваӧн кӧтӧдӧмӧн щӧткаӧн нирті да нирті! Кыз няйтсӧ эськӧ весалі, но ӧні гачӧй ӧшалӧ да косьмӧ... Аскиӧдз, гашкӧ, тӧлалас. Ачым Прошкинлӧн пызан саяс трусик кежысь пукала, «
— Кабинетас кӧть шоныд? Мед он жӧ кынмы да висьмы сэні! Сідзкӧ, аски водз асывнас Прошкиныскӧд тшӧтш Павловъясас мунӧй да вольпасьсьыс лэптӧй, мӧд ногӧн сійӧс этша кутан. Но, ладнӧ, сідзкӧ. Ныртӧ эн ӧшӧд, косьтысь водзӧ!
Мӧд лунас Женя конвой улын воис Веждінӧ. Сэні Лыюров наручникаліс сылысь кияссӧ. Найӧ Кругловкӧд кыкӧн рейсӧвӧй автобусӧн гурӧдісны Женяӧс карӧдз. Чеччисны автовокзал дорӧ, сэні Павлов шыӧдчис:
— Евлогий Дмитриевич, пӧжалуйста, неуна личӧдыштӧй наручниксӧ, вывті топӧдӧма, да киясӧй зэв ёна доймӧны...
— Но, муртсатӧ позьӧ, — и Лыюров ӧти тшупӧд вылӧ вештыштіс стопорсӧ. — Виччысьлӧй ывлаас, ме пырала да рытъя рейс вылас билетъяс ньӧба, карас ӧд огӧ узьмӧдчӧй.
Евлог пырис автовокзалӧ, сулыштіс недыр ӧчередын, ньӧбис билетъяс да бӧр петіс ывлаӧ. Видзӧдліс ӧтарӧ, дзоркнитліс мӧдарӧ, Круглов да Павлов некӧні эз тыдавны. Кытчӧкӧ вешйисны али мый? Ветліс вокзал сайӧ, сэні абуӧсь жӧ, сӧмын кык том ныв кузь сигаретъяс ломзьӧдӧмаӧсь да аминь чӧскыда шпуткӧны. Бӧр локтіс вокзал водзӧ да шемӧс сувтіс. Мый нӧ тайӧ?! Код грекас вошисны?! Виччысигкостіыс сылӧмаӧсь!
Минут дас мысти мыччысисны. Круглов скӧрмӧмысла пуӧ, пӧсялӧма, чужӧмыс би кодь гӧрд, наручникӧдыс кутӧмӧн кыскӧ Женяӧс шуйга киӧдыс, а веськыд киыс мыйлакӧ прӧст. То ӧд, жаль лои мортыс, да личӧдыштіс наручниклысь черлысӧ небыд сьӧлӧма Евлогий Дмитриевичыд, а Павловлы тайӧ и колӧ, вермӧма кыдзкӧ прӧстмӧдны ӧтар кисӧ и уськӧдчӧма пышйыны.
— Пока вӧтчи тайӧ бандюганыс бӧрся, куимысь усьлі, вильыд. Да ладнӧ, пырӧма военкоматкӧд орччӧн сулалысь гараж йӧрӧ. Бур, мый талун, вӧскресенньӧнад, оз уджавны, да усьлӧм лым вылас кок туйясыс лӧсьыда тӧдчӧны. На кузя туялі и аддзи: пырӧма машина улӧ да сэтысянь гусьӧникӧн кыйкъялӧ ме вылӧ. Ноко, мися, пет сэтысь! А сійӧ меным: ог пӧ пет, и ставыс! Ковмис кок пӧлӧдыс кыскыны, кымыныськӧ тай чужйис жӧ меным-а, — помаліс висьтасьӧмсӧ Круглов.
Выльысь, ӧні топыда нин, шлочкис Евлог наручниксӧ Женялы килутшас, мед сэсся оз вермы шедӧдны ассьыс вӧсни кисӧ. Автобусын приёмниклань тюригӧн йӧз водзас Павлов мӧвпыштіс петкӧдлыны эпилептическӧй припадок. Со сійӧ быттьӧ сайдсӧ воштӧма, сулавнысӧ оз вермы, кок вывсьыс усьӧ... Но Круглов усьӧмсьыс кутігмоз нетшыштіс сійӧс наручникӧдыс, мӧдыслӧн, тыдалӧ, киясыс доймисны. Женялы тайӧ эз кажитчы, скӧрмис да чеччыштлӧмӧн кыдз тай колскӧбтіс юрнас Кругловлы тшӧка лыас! Лӧсьыда, буракӧ, веськаліс.
— Вот ӧні лӧсышта ныр-вомад, сэк гӧгӧрвоан, кыдзи колӧ асьтӧ кутны гырысьяскӧд! — лӧсьӧдліс нин кабырсӧ Круглов, быттьӧ збыль вот дзик ӧні швачкӧбтас детинкаыслы, но Евлогий Дмитриевич лӧньӧдіс сійӧс, мед тані, автобус пытшкад, уна свидетель дырйиыд оз нин лякӧссьы тайӧ дзоля бандитас.
Вайӧдісны ПРН*-ӧ, колисны сэтчӧ надеяӧн, мый та бӧрын мынасны сыысь, оз нин ковмы Женяӧс корсьысьны, кутны, выльысь нуӧдны карӧ, мед детинасӧ воспитывайтӧны спецучилищеас, мед вӧчӧны сыысь мортӧс.
* ПРН —
Но весьшӧрӧ лоӧма налӧн надейтчӧмыс... Недыр мысти Павлов бара нин мыччысис Кушашорын.
И заводитчис... Муртса на нуӧдасны Женяӧс приёмникӧдз, а тӧлысь, уна вылӧ кык тӧлысь мысти сійӧ бара нин гортас «отпускалӧ». Кык во чӧж татшӧм «челночнӧй дипломатияыс» кыссис. Медбӧрын курсант Евгений Павловӧс вӧтлісны спецучилищеысь некутшӧм дипломтӧг, кыдз ачыс шуис, «
Воис Женя чужан муас, да зіль мортыд, дерт, прӧстӧ овны эз вермы. Сійӧ кадӧ Кушашорын буретш уджаліс «Комиэнерголӧн» бригада, сикт пасьтала вежлалісны би сюръяяс. Электрикъяслӧн оланінӧ рытнас пырисны Павлов да бӧж моз сы бӧрся вӧтлысьысь ёртыс — Расков. Колӧ ӧд асьтӧ петкӧдлыны йӧз водзад! Сиктсаясыд найӧс бура тӧдӧны, а бокысь локтӧмъясыд оз на. И Лыюровлы бара на ковмис аддзӧдчывны Павловкӧд.
А заводитчис тадзи:
— Евлогий Дмитриевич, на тэныд тыр арлыдтӧмаяс кузя делӧ, — милицияса начальник Горский мыччис еджыд мышка картон папка. — Следовательяс миян оз тырмыны, уджыс налӧн юр выв тырыс, преступникъяс зільӧсь, оз водлыны, ланьтлытӧг мырсьӧны, налы вой кӧть лун, ӧткодь... Подозреваемӧйясыс тэныд бура нин тӧдсаӧсь, ӧтиыс — Евгений Павлов. Сэні миян оперативнӧй группа Эжва катыдысь буретш вӧлі лэччӧ, накӧд йитчим, тшӧктім тайӧ Павловсӧ кутны да Веждінӧдз вайӧдны, ӧні дежуркаын тэнӧ виччысьӧ, задержитан сійӧс пока куим сутки кежлӧ, вайӧдан тайӧ делӧсӧ помӧдз да мӧдӧдан судӧ. Мӧдыс — Расков, сы кузя уголовнӧй преследованиесӧ дугӧдан УПК**-лӧн кӧкъямысӧд статья кузя, постановлениесӧ КпДН-ӧ ыстан, колӧкӧ, мортӧн на лоас. Ставыс.
** УПК —
— Но ИДН-лӧн ӧд уджыс — профилактика, а абу следствие нуӧдӧм. Да ме и следовательлысь уджсӧ ог тӧд.
— Вот ӧтырышъя и тӧдмасян! Татшӧм делӧяссӧ расследуйтӧмыс тшӧтш профилактика — мукӧд посни ышмысьясыс пыр жӧ лӧньыштӧны.
Евлогий Дмитриевич петіс Горский дорысь, гыжйыштіс кушмысь юрсӧ да восьтіс кокньыдик еджыд папкасӧ. Сэні вӧлі сӧмын ӧти бумага лист — РОВД-са оперативнӧй дежурнӧйлӧн пасйӧд, мый Кушашорын тыр арлыдтӧмаяс гусялӧмаӧсь командировочнӧй бригадасаяслысь паськӧм. Ставыс гӧгӧрвоана.
Лэччис дежуркаӧ. Сэні ставыс важ мозыс. Генерал моз пукалӧ, муртса абу водӧма, лабич бӧр вылас валитчӧмӧн Женя Павлов. Быдмӧма, сӧвмӧма, ӧти кывйӧн кӧ: натуральнӧй яндысьтӧм синмӧн лоӧма!
— Лок мӧдарас пыралам, — довкнитіс юрнас Лыюров.
— Колӧ кӧ, пыралам, — Женя дышиника кыпӧдчис пуклӧс вывсьыс да кокъяссӧ кыскӧмӧн лажмыда вӧтчис Евлог бӧрся.
Лыюров судзӧдіс объяснение бланок, гижаліс Павловлысь ов-ним-вич да мукӧдторсӧ — ставыс ӧд найӧ юрас, эз на вунӧд.
— Но, ошйысь, кыдзи тэ электрикъясыслысь гусясин?
— Ме тэкӧд адвокаттӧг сёрнитны ог кут! — зэв вылісянь чӧвтіс Женя.
— Он кӧ, и эн!
Евлогий Дмитриевич лист вылӧ гижис торъя тшӧктӧм да сетіс дежурнӧйлы:
— Лэччӧдӧй клиентсӧ ИВС*-ӧ.
* ИВС —
Ачыс сюртыштіс кутшӧмсюрӧ уджъяс, кодъясӧс помавтӧг кольны эз позь, да мӧд асывнас автобусӧн кайис Кушашорӧ, кӧні карысь воӧм электрикъясӧс чукӧртіс участкӧвӧй кабинетӧ. Прошкин буретш вӧлі отпускын, кытчӧкӧ лызьӧн мортыд шутёвтӧма ылі вӧрӧ кыйсьыны, мед кодлыкӧ кӧ ковмас, некод сійӧс оз аддзы. Тӧдӧ ӧд, кор участкӧвӧй гортын, йӧзыд быть тэ дорӧ котӧртӧны, оз видзӧдны, отпускын тэ али абу. Со и лоӧ мортыдлы «шифруйтчыны», вӧрсьыд этша корсян!
Медводз сёрнисӧ Лыюров заводитіс бригадирыскӧд.
— Висьталӧй, пӧжалуйста, кыдзи вӧлі делӧыс?
Бригадирнас вӧлі зумыд тэчаса ар нелямына айлов.
— Войдӧрлун тайӧ вӧлі, вит час рытын... Ми шойччим нин удж бӧрын. Луныд ӧні зэв дженьыд, югыднас сӧмын мый вермам ноксьыштам. И пырисны миян дорӧ Кушашорса партизанъяс, Павлов да Расков, кыкнанныс код юраӧсь.
— Таӧдз ті накӧд тӧдсаӧсь вӧлінныд?
— Но кыдз тӧдсаӧсь? Ов да ним кузяыс. Нӧшта тӧдам, мый найӧ асьнысӧ лыддьӧны сиктса кӧзяинъясӧн. Гоз-мӧдысь уджалігӧн весиг матыстчывлісны дӧсадитчыны. Но, пырисны, да Женяыс и шуӧ:
— Тіян ЗИЛ-ыдлӧн кӧлесаыс лэдзӧ.
Чепӧсйим ывлаӧ, видзӧдам да, збыль камерасьыс чушкӧ-петӧ воздухыс, а кӧлесаыс син водзын пуксьӧ. Юалі:
— Тайӧ ті розьӧдінныд?
А Павлов:
— Колантор! Кутам тай кӧлесаяс розьӧдлыны! — а ачыс том уж моз гӧрдлӧ.
На вӧсна тӧрыт ковмис лунтыр кӧлесаӧн ноксьыны, а тӧвся луннад муртса кежлӧ сӧмын шондіыд мыччысьлӧ, со кыдзи найӧ миянӧс пӧгубитісны! Талун вот на вӧсна жӧ мӧд лун воштам!..
— Но ме таысь абу мыжа, — нюммуніс Евлогий Дмитриевич.
— Ме тіянӧс ог и мыжды, ставыс тайӧ том йӧз вӧснаыс.
— Водзӧ мый вӧлі?
— Код юра кортӧм гӧсьтъясыд, кыдз ме казьтыштлі нин, мырдӧн сёрниӧ пырӧны, юасьӧны, висьтасьӧны, ошйысьӧны, петкӧдлӧны мый вынсьыныс, кутшӧм найӧ «крутӧйӧсь», сиктсӧ дзоньнас асланыс чорыд кабырын кутӧны, некод налы паныд кыв оз лысьт шуны. Миян мужикъяс пиысь то ӧтилы, то мӧдлы вӧзйӧны «один на один» петавны... Дерт, ми, сизим ён мужикыд, кокниа вермим эськӧ найӧс нӧшалыштны, эз вӧв сьӧкыд тадзи велӧдны, а бӧрас вӧтлыны, мед мунӧны кытчӧ гажыс. Но сэки ӧд код на тӧдас, кыдзи эськӧ водзӧ делӧыс гартчис? Вермисны милицияӧ шыӧдчыны, вот пӧ миянӧс тайӧ кыськӧ локтӧм электрикъясыд нӧйтісны, сэки ми лоам первой подозреваемӧйясӧн, бӧрынджык обвиняемӧйясӧн, а кык дуракыс пострадавшӧйясӧн. Тайӧ миянлы колӧ? Дерт жӧ, оз... А та бӧрын мунасны кӧ отсӧгла, ас коддьӧмыс жӧ вежӧртӧм том йӧзӧс кыпӧдасны да ыджыд котырӧн локтасны миянлысь водзӧс перйыны, оланінысь ӧшиньяс кисьтны? Тайӧ вариантыс миянлы ньӧти жӧ оз нюмъяв, ми Кушашорӧ воим уджавны, а эг тыр арлыдтӧм кутюпиянкӧд корполитчыны. Дерт, миян томджыкъяс пиысь кодсюрӧлы эз терпитсьы налы тшӧка лыас сеталыштны да пув юмсӧ лэдзны, но ме сувтӧді — кутыштӧй, мися, асьнытӧ, эн сетчӧй провокация вылас. Та вӧсна Павлов да Расков недыр нӧшта дӧсадитчыштісны на да и довгисны кытчӧкӧ водзӧ.
А асывнас кватитчим да, кодсюрӧлӧн паськӧмъясыс оз тырмыны, найӧ ӧшалісны ортсы кӧдзыд жыръяс. Вошисны медся бур да медся донаторъясыс: ыж ку пась, унты, анича куысь шапка, нӧшта на мыйсюрӧ посниторъяс. Тані нин некытчӧ он воштысь, ковмис тіян дорӧ шыӧдчыны отсӧгла.
Вель уна кад Лыюровлысь сёйис сизим морттӧ допроситӧмыд, луныс тэрыб чикыш ӧдъя сідзи и шутёвтіс, сӧмын бӧж йывсӧ петкӧдліс. Бара нин то пемыд рыт пуксьӧма — сиктын сюръяяс вылын пӧнаръяс ломзисны. Кытчӧдз дзикӧдз эз пемды, колӧ ветлыны Расковъяс ордӧ, Павловлӧн ыджыд мамыс дорӧ, ставыскӧд сьӧлӧмсяньыс варовитыштны. Сӧмын кыдзи примитас Елена Васильевнаыд, восьтас али оз Евлогий Дмитриевичлы ӧдзӧссӧ коркӧя комиссия вылад пузьылӧм бӧрад? Али бара уськӧдчас чужӧмсӧ чашйыны? Но ӧд сэксянь мыйта ва нин визувтіс, позьӧ и вунӧдны...
Елена Васильевна куим вонад пӧрысьмыштӧма, унджык чукыр нин серлӧдлӧма чужӧмбанъяссӧ да плешсӧ, да и ветлӧдлігас муланьӧ ёнджык гӧрбыльтчӧ. Век жӧ кортӧм гӧсьттӧ тӧдіс:
— А-а, Евлогий Дмитриевич, вот кодӧс тарыт эг куж виччысьны!.. Но лок пыр, миянӧ кӧ воин, гӧститӧдыштны, дерт, нинӧмӧн ог вермы-а. Тэ, кӧнкӧ, он миян моз прӧстӧ сідз шӧйт, а могӧн?
— Збыль, суис неыджыд мог.
— Бара гижасьыштны кутан?
— Дерт, гижасьышттӧг тіян дорысь, Елена Васильевна, ог пет.
— То, нимӧс на весиг абу вунӧдӧмыд. Но, личӧдчышт да пуксьы татчӧ лабич вылас, — ветьӧкӧн весиг чышкаліс пызан вывсӧ Лыюровлы. — Ставсӧ висьтала, нинӧм ог дзеб. Ме чайті, кодъясӧскӧ мӧдъясӧс ыстасны, а тэнӧ аддзисны. Но и бур, важ тӧдсаыдкӧд кокниджык сёрнитнытӧ лоӧ. Пикӧ вои ме, Евлогий Дмитриевич, аслам внуккӧд. Кыдз воис спецучилищесьыд, йыллавек* на ме вылын ыждаліс. Кузь мужик нин, а уджавны некӧн оз кӧсйы, сы пуд куим мында сёйӧ да витлы воча юӧ. Меным оз жӧ отсась. Быд лун кӧнкӧ вӧлӧсьтын шӧйтӧ, гортӧ рытнас сӧмын и локтӧ, и век код юра. Ӧтчыд кутшӧмкӧ нывкаӧс тшӧтш кыскӧма, мырдӧнавны кӧсйӧ. Ме и пинясьны куті, лэдз, мися, нывсӧ, эн ӧбӧдит! Кутчыси, торйӧдны кӧсйи Женя бердысь, мед нылыс пышйыны вермас, а Женяыд тай кыдзи менӧ тойыштіс, кытчӧ пӧ тэ сюйсян?! Ён мужик ӧд, ме татчӧ пызан дорӧ лёкногӧн джоджас гатшаси, Енмыд видзӧма да, абу жӧ тай некыті чегӧма-а... Сэсся эг нин лысьт матыстчывны, вежӧс сайӧ пыри да сэні кузяла бӧрді. Гӧбӧч вылын сідзи и мырдӧналіс нывкатӧ, эг гӧгӧрво весиг, кодлӧн сійӧ лоӧ, том йӧзтӧ ӧд он тӧдав.
* Йыллавек (диал.) — пыр.
— Важӧн нин тайӧ вӧлі?
— Тӧлысь куим-ӧ-нёль сайын. А тӧрыт асывнас, Женя узьӧ на вӧлі, милицияыд локтіс. Гашкӧ, витӧн ӧтпырйӧ пырисны да, керка тыр тай вӧліны-а. Женяӧс садьмӧдісны, пасьтась пӧ, да Веждінӧ гурӧдісны.
— Да-а, — ышловзис Евлогий Дмитриевич. — А гортад Женя йӧзлысь некутшӧм паськӧм эз вайлы?
— Ме тай нинӧм эг тӧдлы-а, эз кӧ сарайӧ дзеблав. Войдӧрлун рытнас локтіс да дыркодь керкаӧ эз пыр, мыйкӧ сэні гольӧдчис.
— Вай жӧ, Елена Васильевна, петалам да видзӧдлам, ті кӧ абу паныд.
— А-абу, кутшӧм нин паныд, лок видзӧдлам.
Сійӧ пасьтасис да Лыюровкӧд тшӧтш петіс сарайӧ. Эз дыр и ков корсьысьны, аддзысисны мукӧд кӧлуйӧн сайӧдлӧм ыж ку пасьыд, унтыыд, шапкаыд, ӧти кывйӧн кӧ, ставыс, мый вошліс электрикъяслӧн оланінысь. Ставсӧ Женя аслыс босьтӧма, Расковыдлы нинӧм абу вичмӧдӧма.
Евлогий Дмитриевич бура дыр пукаліс пызан сайын да оформитіс допрослысь протокол, ывлавылысь сувтӧдліс да пыртліс понятӧйяс пыдди кык аньӧс, и гижис ас кӧсйӧм серти бӧр сетӧм кӧлуй вылӧ протокол, мед ставыс лоӧ закон серти.
— Лыддьӧй, Елена Васильевна.
— Ачыд гораа лыддьы, а ме бӧрас кырымала.
— Ме, Елена Васильевна, тані нинӧм эг гарышт нывкасӧ мырдӧналӧм кузя. Тӧда ӧд, ті бӧрыннас шуанныд, ме пӧ Лыюровыдлы нинӧм татшӧмторсӧ эг висьтавлы.
Пӧрысь ань шпыньмуніс:
— Сідзи ӧд и эм.
— Но, извинитӧй дӧсадитчӧмсьыс, аддзысьлытӧдз, Елена Васильевна! Меным колӧ водзӧ уджавны...
Эз тай весиг ӧти кывйӧн гарыштлы КпДН-ад зыксьылӧм кузяыд-а, и Лыюров киняулас сарайысь сюрӧм паськӧмсӧ топӧдӧмӧн муніс электрикъяс дорӧ да расписка улӧ сеталіс кӧзяинъясыслы.
Зэв бур. Ставсӧ, мый кӧсйыліс, Евлогий Дмитриевич удитіс вӧчны, весиг эз сёрмы рытъя автобус вылас, гортас нин узис.
Аскинас Лыюров пукаліс ИВС-са допросъяс нуӧдан жырйын Женя Павловкӧд да сы бердӧ индӧм адвокат Скворцовакӧд. Тайӧ вӧлі томиник, вӧсньыдик чужӧмбана ар кызь вита ныв, ачыс кыськӧ карысь. Допрос дырйиыс некутшӧм мытшӧдъяс эз лоны, Евлогий Дмитриевич юасис Павловлысь, мӧдыс вочавидзаліс. Допрос помас сӧмын, кор Лыюров тшӧктіс кырымасьны, Женя бергӧдчис адвокатыслань:
— Кырымася?
— Да, кырымась, — вочавидзис мӧдыс.
Мыйӧн Павловӧс нуӧдісны камераас, Скворцова тадзи гӧгрӧстіс сёрнисӧ:
— Ме шыӧдча прокурор дорӧ, мед Женяӧс судӧдзыс лэдзасны вӧля вылӧ. Сылы дас кӧкъямыс арӧсыс эз на тыр, юридическӧй кывйӧн кӧ, сійӧ лыддьыссьӧ кагаӧн на.
— Тӧда, вель нин кузя быдмӧма, юны да гусясьны кужӧ, но пыр на кага, — нюммуніс Лыюров.
Рытланьыс звӧнитіс прокурор Морозов:
— Евлогий Дмитриевич, аски ӧкмыс час асылын Павлов вылӧ уголовнӧй делӧыс мед куйліс менам пызан вылын.
— Гӧгӧрвои, Иван Степанович!
Сьӧкыд али мый Лыюровлы? Колӧ кӧ, ваяс урчитӧм кад кежлас.
И сэки пыр жӧ сыкӧд йитчис следственнӧй отделениеса начальник Сергей Владимирович Порошкин:
— Лыюров, пырав ме дорӧ Павловлӧн делӧнад.
Мый нӧ тайӧ?! То ӧтилы, то мӧдлы ковмӧма ӧти и сійӧ жӧ делӧыс! Но корӧны кӧ, лоӧ пыравны.
Порошкинлӧн кабинетыс сідз нин тырӧма табак тшынӧн, сідзи горшад и сатшӧ, но кӧзяиныс нӧшта на весьт кузя сигарет вомас топӧдӧма да зэв чӧскыда шпуткӧ. Кыдзи сӧмын сійӧ тані вермӧ уджавнысӧ?
— Евлогий Дмитриевич, коль меным делӧтӧ, видзӧдла, мый тэ сэні гудралін.
— Сергей Владимирович, тайӧ делӧсӧ ӧд аски ӧкмыс час кежлӧ менсьым корис прокурор, — вежавидзӧмӧн вочавидзис Лыюров да мыччис папкасӧ Порошкинлы.
— Делӧнас медводз колӧ меным тӧдмасьны да став тышкас-мышкасъястӧ лӧсьӧдавны, он ӧд, буракӧ, тэнсьыд некытчӧ шогмытӧм пасйӧдъястӧ прокурорыдлы ныр улас шняпкы. Но сійӧс ме аски видзӧдла, талун уджалан луныс эштіс нин.
— Но ӧкмыс час кежлад аскитӧ он удитӧй... Колӧ, сідзкӧ, талун видлавны.
— Ме бурджыка тӧда, мый вӧчны!
Нинӧм он вӧч, начальстволы тыдалӧджык. Сідзкӧ, аски Сергей Владимирович водзджык лӧсьӧдчӧ петны удж вылас, мед удитны тӧдмасьны делӧнас.
Но водзджык удж вылӧ петны Порошкинлӧн планъясын абу вӧлӧма. Ӧкмыс часын сійӧ сӧмын на пуксис прӧверитны Лыюровлысь уджсӧ. Медводз пестіс выль чигарка да тшынасигмоз тэрмасьтӧг лыддис дзоньнас делӧсӧ, быд букваӧ сибдылӧмӧн: индаліс нелючкияс, но медбӧрын эштӧдіс жӧ да вештіс Лыюровлань сылысь трудсӧ:
— На, катӧд прокурорыдлы.
Лыюров котӧрӧн чепӧсйис прокуратуралань, сідз нин ӧд сёрмис, и друг клуб весьтын видзчысьтӧг паныдасис... Женя Павловкӧд, коді тэрмасьтӧг, кыдзи и век, став тушанас лайкъялігтырйи кытчӧкӧ тапкис. Аддзис Евлогий Дмитриевичӧс да пыр жӧ маршрутсӧ вежис, кыдз тай чепӧсйис дзик мӧдарӧ! Недыр мысти и саяліс пошта сайӧ. Лыюров сідзи и колис калькалӧм вомӧн. Тайӧ мый?! Пукалігкостіыс пышйӧма?! А кыдзи сійӧ вермис?! ИВС-ад ӧд гӧгӧр сигнализация, кузь пиня скӧр понъяс шаркйысьӧны йӧрӧдыс, некымын видзысь? Эз жӧ ӧд ставнысӧ виав?
Но сулавны тані оз позь, прокурорыд виччысьӧ, и он вӧтчы Павлов бӧрсяыс ни... Ковмас Морозов дорӧ кайны.
Юрси йылӧдзыс пӧсялӧма, ньылӧмыс плеш кузяыс шлювгӧ, сувтіс прокурор водзӧ:
— Здрасьте!
Но Морозовлӧн чужӧмыс нинӧм бурсӧ эз петкӧдлы:
— Здрасьте-здрасьте! Лыюров ёрт, кымын час кежлӧ ме кори вайны Павлов кузя делӧтӧ?!
— Ӧкмыс кежлӧ, Иван Степанович.
— А мыйла ті сӧмын ӧні вайинныд, кадыс то дас час нин?
— Да Порошкин менсьым делӧсӧ босьтіс прӧверка вылӧ и сӧмын ӧні на бӧр сетіс! Висьтавлі сылы, мый ті коринныд менӧ делӧнас ӧкмыс кежлӧ, а сійӧ эз весиг кивылькер!
— Менӧ оз интересуйт, кивылькерис Порошкин али эз! Ме тіянлы шулі, мый ӧкмыс часын Павлов вылӧ став документыс мед вӧлі куйлӧ менам пызан вылын! Тадзи вӧлі али эз?
— Тадзи, Иван Степанович.
— Тадзи! Ӧкмыс часын конвоиръяс ме дорӧ вайӧдісны Павловӧс. Адвокат Скворцова корӧ, мед ме лэдза Павловӧс вӧля вылӧ, сійӧ пӧ кага на, ИВС-ас сылӧн психикаыс вывті ёна страдайтны кутас, нинӧм детинаыс лёксӧ оз вӧч, гортас кӧ овны кутас «
Лыюров сулаліс прокурор водзын юрсӧ ӧшӧдӧмӧн. Со тай, кыдзи делӧыс вӧлӧма! Абу, вӧлӧмкӧ, пышйӧма Женяыд стража увсьыд, и некодӧс абу виӧма, артисталыштӧма сӧмын. Аддзис Лыюровӧс да ӧдйӧджык дзебсис, быттьӧкӧ збыль пышйӧма ИВС-сьыд. Мед пӧ инспекторыд ме бӧрся котралыштас, видлас кутны, а ме сералышта сы вылын... Но и Женя!
Евлогий Дмитриевич лючки бура помаліс уголовнӧй делӧсӧ да мӧдӧдіс судӧ. Женя тайӧ кадас гуляйтіс Кушашорын, юис-кодаліс да быд паныдасьысьлы ошйысис, мый сійӧ кага на, пуксьӧдны сійӧс некыдзи оз позь, психикаыс торксяс...
Суд вылын некутшӧм мытшӧдъяс эз лоны, шуисны «кагаыдлы» кык во пукавны бытшкасьысь сутуга сайын, но во мысти лэдзисны асьсӧ бура кутӧм вӧсна.
Евлогий Дмитриевичлӧн да Женя Павловлӧн выльысь аддзысьлӧм артмис во мысти ИВС-ын, кытчӧ Лыюров РОВД-ын дежуритігӧн лэччис оправка* вылӧ. Пукалысьяслысь списоксӧ видзӧдлігӧн нин син улас уси тӧдса овыс. Женя, вӧлӧмкӧ, бара нин «мӧд гортас» локтӧма.
* Оправка — пукалысьясӧс камераысь мыссьыны-весасьны да асмогасьны петкӧдлӧм.
— О-о! Тэ тай, Павлов, ён мужикӧн нин лоӧмыд! Но, здравствуй, здравствуй!
— Здравствуйта, мый сэсся тон тані вӧчны? — пӧлӧса нюммуніс мортыд. — Нинӧм вылӧ эськӧ эз вермыны кутны, но Расков повзис, эз куж соссьынысӧ, тшӧтш и менӧ аскӧдыс кыскис. Квайт магазин Кушашор гӧгӧрса грездъясысь пыркниті, бӧръяяссӧ дзик нин наглӧя, нинӧмысь видзчысьтӧг лӧмӧн томансӧ бертыштӧмӧн пыравлі!
— Сідзкӧ, бара на кодкӧ мӧд мыжаыс, мый тэ татчӧ веськалін?
— Ӧтнамӧн кӧ вӧлі, нинӧм вылӧ эз вермыны аддзыны, коді магазинъяссӧ бомбитӧ, э-эз! Ме ассьым кок туйястӧ эг коляв!
— Но, молодеч тай, бура менам воспитайтсьӧма, — серӧктыштіс Евлогий Дмитриевич да гораа крапкис Женя бӧрын камера ӧдзӧссӧ.
Лыюров бӧръяысь паныдасьліс Женякӧд, кор вӧлі нин пенсия вылын да пыраліс больничаӧ видлыны нёрпалысь внуксӧ. Коридорын деда-внукалӧн сёрнитігӧн на дінті муніс ыджыд тушаа ён том мужичӧй, код вылӧ Лыюров весиг эз видзӧдлы. Недыр мысти мортыд муніс мӧдарӧ да сувтовкерис:
— Евлогий Дмитриевич?
— Да, — чуймӧмӧн кыпӧдіс юрсӧ сійӧ.
— Эн тӧдӧй?
— Э-эг.
— Павлов.
Мортыс тушанас Лыюров судта жӧ, паськыд пельпомъяса, грӧмилӧ кодь ён, да, кыдзи и войдӧр, ӧчкиыслӧн шуйга стеклӧыс потӧма.
— Висьтасин, да вӧлисти тӧді. Мый нӧ тані, висьмин?
— Да, праздник дырйи, йӧйыд, спирт коснас юи да чигарка ӧзті, спиртыдлӧн паръясыс пытшкам ыпнитісны, биыс тыясӧдз пырис да сэті сотіс...
— Грамотнӧй морт быттьӧкӧ ачыд, а тадзи прӧступитін?
— Сэк мӧдтор йылысь думайтан...
— Но, бурдӧдчы, сідзкӧ.
— Ладнӧ, аддзысьлытӧдз! — и Женя мӧдіс аслас палаталань.
— Деда, тайӧ коді? — индіс коридорті восьлалысь Павлов вылӧ Сеня внукыс.
— Бандит.
— У-у! — полігтырйи синъяснас колльӧдіс «бандитӧс» Сеня. — А ме сыкӧд ӧти жырйын куйла...
— Эн пов, ӧні сійӧ абу нин важкодьыс, ёна вежсьӧма, — такӧдіс детинкаӧс Евлог.
Некымын лун мысти больничаӧ мӧдысь пыралігӧн Сеня гусьӧникӧн юӧртіс:
— Бандиттӧ лэдзисны.
Женя Павловкӧд Лыюровлӧн тайӧ вӧлі бӧръя аддзысьлӧм...
ӦНІЯ КАД
— А-а, паськыда тӧдса Женя Павловыд? Сійӧ дыр на тані дӧсадитчис! — вочавидзис Михаил Прокопьевич. — Некымынысь пукавліс. Сы кості, дерт, ыджыд мамыс куліс, да сылӧн керкаын оліс ӧтнасӧн. Быд лун код юра сикт кузя довъяліс. Вельмис да магазин дорын лунтыръясӧн вешйывлытӧг дежуритіс, вина ньӧбысьясӧс кыйӧдіс. Сувтӧдас магазинысь петігас олӧма аньтӧ, кӧзяин моз сумкаас пырас, водка дозтӧ сэтысь судзӧдас, зепсьыс стопка перъяс, ставсӧ ӧд сылӧн водзвыв дасьтӧма, сэтчӧ кисьтас водкатӧ, юас, пробкасӧ гартас и бӧр сюяс сумкаас джынъялӧм дозтӧ. Культурнӧя аттьӧалас да бабтӧ горт дорӧдзыс колльӧдас, мед пӧ некод оз грабит, сиктыс быдсяма лёк йӧзнас ӧні тырӧма да, и бара магазин бокын кыйӧдчыны босьтчас, «вот перйыны»... Дерт, и тышкасьліс тшӧкыда, унаӧс зульӧдліс, сэки ён нин вӧлі.
Но кыдзкӧ ӧтчыд тӧвся пемыд рытын паныдасяс Женя куим мужиккӧд... Ӧти сылы тӧдлытӧг зорйӧн балябӧжас клёнӧбтас, кок вывсьыс усьмӧн лоӧма... Мед некодӧс оз тӧд, чужӧмъяссӧ маскаясӧн тупкӧмаӧсь, нинӧм шутӧг, кыв лэдзлытӧг вель дыр чужъялӧмаӧсь да сідз жӧ чӧла эновтӧмаӧсь. Кыдзкӧ гортӧдзыс кыссьӧма да джодж шӧрас и эштӧма. Абу эськӧ, тыдалӧ, кувмӧн кӧсйӧмаӧсь нӧйтны, но сідзи тай артмӧма...
— А полиция следствие нуӧдіс?
— Мыйкӧ тай мода вылас петкӧдлісны йӧзыслы, быттьӧ ёна корсьысьӧны, туялӧны виысьсӧ. Юасялыштісны жӧ-а, но вывті ёнасӧ эз и зільны, ачыс пӧ пезьдӧма. Сиктад, дерт, ставыс гӧгӧрвоӧны да тӧдӧны, но вомъясыс топыд калич сайын. Тадз...