РАБФАКЪЯСӦ ПЫРӦМ ЙЫЛЫСЬ

Рабфак лӧсьӧдӧма уджалысь йӧзлы, кодъяс абу вермӧмаӧсь кадын велӧдчыны ВУЗ-ӧ (ыджыд школаӧ) пыртӧдз. Став местаыс рабфакъяссьыс юксьӧ организацияяс да учрежденньӧяс кост (ВКП, Профсоюз, Исполком да мукӧд кост), а найӧ юкӧны губерняса организацияяс кост. Та кындзи эмӧсь нӧшта национальнӧй рабфакъяс. Сэтчӧ босьталӧны сӧмын кутшӧмкӧ ас сёрниа йӧзӧс.

Кымын места миян организацияяслы воас — оз на тӧдны. Сӧмын эм юӧр Перымса рабфакъяссянь. Сэтчӧ коми да пермяклы лӧсьӧдӧма 30 места. Менам арталӧм серти кӧ, колӧ воны обласьтӧ ставыс 30−40 места. Сійӧ воалас обласьтувса организацияяслы, а найӧ юкасны уездувсаяслы. Уездувса организацияяс кутасны мӧдӧдавны асьныс, сӧмын губерняувса да уездувса исполкомъяслы оз шогмы ассяньныс ыстыны: найӧ местаяс сетӧны вӧлӧсьтувса исполкомъясӧ.

Рабфакъясӧ примитӧны уджалысь йӧзӧс, найӧ кӧ медасьӧмӧн уджалӧмаӧсь сьӧд удж бердын: 20 арӧсаяс — 2 во, 25 арӧсаяс — 3 во, 30 арӧсаяс — 5 во.

Крестьяналӧн гортса уджыс, эз кӧ найӧ медӧн уджӧдны йӧзӧс, лыддьыссьӧ меда удж туйӧ жӧ.

Коммунистъяслы колӧ партийнӧй стаж: 20 арӧсӧдз — 1 во, 25 арӧсӧдз — 2 во, 30 арӧсӧдз — 3 во. Комсомолечьяслы колӧ стаж: 20 арӧсӧдз — 2 во, 23 арӧсӧдз — 3 во.

Рабфакӧ пырны позьӧ, арлыдыс кӧ абу 17 арӧсысь ичӧт. Велӧдчыны пырысьяслы колӧ тӧдны нёльнан арифметика действийӧ, лыддьыны да гижны комиӧн и рочӧн, лыддьӧм бӧрын дженьыдика висьтавны ас кывйӧн. Сэсся колӧ тӧдыштны йӧз кост оланног (обществоведение: Сов. вл. Профсоюзы, Хоз.-пол. строй СССР и отличия от строя бурж.-кап. государств, Мировая война, 14−18 г., Февр. рев. и Окт. рев., Гражд. война, Кооперация). Рабфакӧ пыригӧн кутасны юасьны, коді кутшӧма тӧдӧ тайӧторъяссӧ.

Коді оз тӧд, сійӧс оз босьтны. Пырысьяссянь колӧ документъяс: а) командировочнӧй удостоверенньӧ, б) эскӧданпас удж йылысь, в) арлыд йылысь, г) воинскӧй и д) анкета (анкетаыслӧн формаыс газет помас).

Тимушев.