ӦТУВЪЯ УДЖ ПАСЬКАЛӦ

Луз вожын крестьяна топыда кутчысьӧны ӧтувъя удж бердӧ. Абъячой вӧлӧсьтын крестьяна заводитчӧмаӧсь организуйтны нюр косьтан тӧварищество. Читаёв вӧлӧсьтын куим сиктын лӧсьӧдчӧны организуйтны машиннӧй тӧвариществояс.

Черныш вӧлӧсьтын колян арын помалӧмаӧсь мельнича стрӧитӧм (заводитӧмаӧсь стрӧитны 1923 воын). Мельнича заводитӧма уджавны ноябр 1 лунсянь. Квайт тӧлысьӧн мельнича изӧма 27 сюрс пуд. Быд сутки мельнича вермӧ изны 500 пуд.

Сельскокӧзяйственнӧй тӧварищество заводитчӧ стрӧитны дьӧгӧдь вӧчан завод. Сельхозбанкысь босьтӧмаӧсь уджӧн сьӧм 500 шайт.

Сельскокӧзяйственнӧй да машиннӧй тӧвариществояс уджнысӧ лунысь-лун паськӧдӧны. Кыкнаныслӧн эм морт ӧтик вартан машинаӧн, идзас шыран машинаяс, кӧйдыс весалан машина да мукӧдтор.

Тадзикӧн Лузаын лӧсьӧдӧны ӧтувъя олӧм.