КОЛӦ ЛӦСЬӦДЧЫНЫ ВОДЗӦ КЕЖЛӦ

Котыртчӧм удж эштӧм бӧрын КАПП водзын сувтасны ыджыд уджъяс: а) ас костын велӧдчӧм удж нуӧдны — мыйла колӧ гижӧм, кыдзи да мый йылысь колӧ гижны, кыдзи да мый йылысь гижлывлӧмаӧсь важӧн, кутшӧм гижӧм эм ӧні мукӧд кывъя йӧзлӧн (рочьяслӧн, удмуртъяслӧн да мукӧдлӧн); ас коми гижысьяслысь гижӧдъяс видлалӧмӧн да на йылысь сёрнитӧмӧн велӧдчыны бурджыка, лӧсьыдджыка, коланторджык гижны, коми гижӧм бурмӧдны, водзӧ йӧткыны; б) йӧз костын удж нуӧдны, медым тӧдӧны вӧлі гижӧмлысь могсӧ, коми гижӧмлысь коланлунсӧ да отсасьӧны тшӧтш коми гижӧм паськӧдны — колӧ сёрнитны ыджыд собранньӧяс вылын коми гижӧм йылысь, КАПП йылысь, колӧ лэдзны коми журнал, нигаяс КАПП-сянь, колӧ сиктса газетӧ гижысьяслы отсавны комиӧн гижны велӧдчыны да на пиысь выль коми гижысьясӧс корсьны, колӧ отсавны миян ыджыд школаясын бура пуктыны литература велӧдан удж, отсавны бура пуктыны удж сэтчӧс литература кружокъяслы и с. в.

Медводз миянлы, тӧдӧмысь, ковмас сувтӧдны ас костын велӧдчӧм удж.

Та вӧсна ӧні арӧдзыс колӧ эштӧдны миян Коми обласьт пасьта котыртчан уджсӧ да неуна лӧсьӧдчыштны уджавнысӧ. Ӧнӧдз миян котыртчисны лючкиджык сӧмын на Сыктывдінкарса гижысьяс; мукӧд вожысь КАПП-ӧ пырисны сӧмын торъя мортъяс (уна жӧ эськӧ да) — найӧ торйӧн-торйӧн на.

Миян устав серти, колӧ лӧсьӧдавны быдлаын, кӧні 3−4 коми гижысь эм, ичӧтик чукӧрторъяс КАПП-лысь, медым бурджыка да ёнджыка котыртчӧмӧн вермасны уджавны. Ӧні и колӧ босьтчыны КАПП-лысь тайӧ чукӧрторъяссӧ лӧсьӧдавны — тайӧ колӧ вӧчны КАПП правленньӧ индалӧм серти быд сиктса коми гижысьлы (коді нин пырӧма КАПП-ӧ).

Тайӧ тӧлысьяснас жӧ эськӧ колӧ чукӧртлыны КАПП-лысь медводдза конференция, сідзи КАПП-ӧ котыртны став Коми обласьтса коми гижысьяссӧ, индыны туйяс КАПП-лы водзӧ уджавны, вын сетны КАПП-лы, кыдз став Коми обласьтса котырлы и с. в. Ыджыд надеяяс конференция чукӧртӧм вылӧ абу — КАПП-лӧн та вылӧ некутшӧм сьӧм абу.

Ӧні жӧ сэсся колӧ КАПП-лы (чукӧръясыслы и) лӧсьӧдчыны водзӧ удж кежлӧ — колӧ лӧсьӧдавны планъяс, программаяс, судзӧдавны колан нигаяс, журналъяс, коравны индӧдъяс, индавны уджнас веськӧдлысьясӧс и с. в.

Колӧ тайӧ гожся тӧлысьяснас бурджыка лӧсьӧдчыны — арнад некор лоӧ, сэк ковмас нин уджавны босьтчыны.

А. Ч.