МӦДЫСЬ ШЫАСЯМ

Тӧлысь кык сайын нин ми гижлім газетӧ ковтӧм рӧскодъяс бырӧдӧм йылысь. Сэні шулім, мый ӧні Сӧвет власьт чорыда нуӧдӧ сэтшӧм удж, коді шусьӧ «режим экономии». Тайӧ кывъясыс, дерт, абу на быдӧнлы гӧгӧрвоана. Тані шусьӧ сы йылысь, мый колӧ пӧ миянлы видзӧмӧнджык, экономнӧйджыка овны, дугдыны шыблавны тӧв йылӧ казналысь сьӧмсӧ, кутчысьны бура уджавны.

Важӧн, сар дырйи вӧлі крестьяналысь перйӧны вот озыр йӧзлы гажаа олӧм вылӧ. Аслыныс крестьяналы некутшӧм пӧльза сэсь эз вӧв. Сӧвет власьт вӧчӧ сідзи, мед быд ур мунас бур вылӧ, сетас кокньӧд уджалысьяслы. Дерт, эмӧсь на миян уна нелючкиторъяс. Миян сӧветын юралысьясыд оз на кужны видзны сьӧмтӧ. Уна на миян чуньяс пыр весьшӧрӧ киссьӧ сьӧмыд.

Татшӧм лёкторъястӧ колӧ ӧдйӧджык бырӧдны. Сӧвет власьт тшӧктӧ быд уджалысь мортлы кутчысьны отсасьны тайӧ уджас. Мед быд коми морт повтӧг, сьӧлӧмсянь кутас вермасьны ыджыд ковтӧм рӧскодъяскӧд.

Тайӧ уджыс зэв колантор. Колӧ быд учрежденньӧын, быд сӧветын да кооперативын зіляджык нуӧдны экономия. Сиктъясын ӧніӧдз на эз кутчысьлыны сэтчӧ. Босьтам потребительскӧй лавка: сэні вывті ыджыд накладнӧй рӧскодъяс, утечкаяс, растратаяс. Пыр на шленъяслы сеталӧны уджӧн. Сы вӧсна тӧваръяслӧн доныс содӧ.

Сідзжӧ быд сӧветын да сиктса учрежденньӧясын позьӧ ёна на чинтавны ковтӧм рӧскодъяс. Регыд кутасны лӧсьӧдавны выль бюджетъяс. Колӧ бюджетъястӧ вӧчны сідзи, мед унджык сьӧмыс мунас велӧдчӧм да мукӧд буртор вылӧ. Мед крестьяна аддзасны: Сӧвет власьт пӧ ёна тӧждысьӧ уджалысь йӧз вӧсна.

Ӧні колӧ чукӧртны, видзны быд ур. Бокисянь, буржуйяссянь миянлы отсӧг оз ло. Гӧль да пемыдлунысь ми вермам петны сӧмын ас вынӧн, ас мывкыдӧн. Бура чукӧртӧмӧн ми вермам регыдджык сувтӧдны выль пабрик-заводъяс. Сэки олӧм лоӧ кокниджык. Крестьяналы зэв сьӧкыда шедӧ быд грӧш. Колӧ налы аслыныс мичаӧ дӧзьӧритны, мед эськӧ весьшӧрӧ эз шыблавны да лотайтны казеннӧй сьӧмсӧ, мед этшаджык вӧлі служакъяс, мед бырӧдісны, нетшыштісны мукӧд ковтӧм рӧскодъяс.