Мыйся тайӧ кывтӧм пемӧс

Миян каньным — ыръянь Семӧ.

Кытчӧ сӧмын и оз пыр.

Сюйӧ дзик быдлаӧ ныр.

Ворсанторйыд сылы сюрӧ.

Джаджйын быгыльтан со тюрӧ.

Сӧмын юртӧ сыысь видз.

Весиг мен оз сетлы лич.

Серпасасьны лоис немӧн.

Карандашъяс воштіс Семӧ.

Гӧбӧчын-ӧ, нӧшта кӧн?..

Керка тырыс юрлӧс гӧн.

Ичӧт на да, челядь сяма.

Тэ кодь жӧ пӧ, — шуӧ мамӧ.

Кыкнанныдлы колӧ ньӧр.

Керканым мед оз жӧ пӧр.

Узиганыд сӧмын шаньӧсь,

Он тай вид сэк тэнӧ, каньӧс.

Воча Семӧ шуӧ: «Мур!»,

А ме кыла: «Ставыс бур!»