ТЕШКОДЯ ВУЗАСЬӦ

Миян Поёлса (Сыктыв у.) общественнӧй лавкаынкодь бур приказчик оз сюр. Приказчикавны велӧдчис сійӧ важ купеч ордын на. Ӧні общественнӧй лавкаад тӧргуйтнытӧ вывті нин мастер. Апрель 20-ӧд лунӧ вӧчлісны лавкаын 3 тӧлысся учёт да, бур приказчиклӧн лишалӧма 128 шайт сьӧмыс. А воддза учёт бӧрас (январын) сылӧн эз судзсьыв 121 шайт. Эз нин ӧтчыд сылӧн вӧв тадзиыд, кор эз судзсьы, кор лишалӧ. Правленньӧ, оз кӧ судзсьы, сьӧм оз перйы, кольӧдас бӧр приказчикавны кытчӧдзкӧ срокӧн, мед пӧ сэк кежлӧ вӧлі судзсьӧма-а. Оз тай вӧлӧм прӧста бабаяс норасьны приказчикыд вылӧ: пыр пӧ этша тӧвартӧ да сдачатӧ сетӧ; сӧмын правленньӧ да ревизионнӧй комиссия норасьӧмтӧ пыдди эз пуктыны: миянлы пӧ некод эз норасьлы — шуӧны. Правленньӧлы да ревизионнӧй комиссиялы, тыдалӧ, этша кывйӧн норасьӧмыд, сылы колӧ вӧлӧм бумага вылын норасьӧм.

Думайтысь.