ВӦР СОТӦМЪЯСКӦД ВЕРМАСЬӦМ ЙЫЛЫСЬ
Вӧрсянь став олӧмыс — видзӧй вӧр!
Коми обласьт пасьта лыддьыссьӧ 30 миллион десятина вӧр. Вӧр вайӧ Коми обласьтлы ыджыд доход, джын доходыс местнӧй бюджетӧ воӧ кер лэдзӧмысь, сідзжӧ вӧр сетӧ коми йӧзлы бур нажӧтка. Сӧмын ми огӧ на кужӧ вӧрсӧ видзны. Быд гожӧм уна десятина вӧр сотчӧ миян. Кад нин эськӧ думыштны миянлы вӧр йылысь, кад нин босьтчыны бура видзны вӧр, видзчысьны пӧжаръясысь да ковтӧм кералӧмысь дугдыны.
Сӧвет власьт ёна тӧждысьӧ вӧр йылысь. Коми Обисполком быд во лэдзӧ шуӧмъяс да индӧдъяс вӧр видзӧм йылысь да вӧр сотчӧмъяскӧд вермасьӧм йылысь. «Югыд туй» газетын 93 номерын йӧзӧдӧма Обисполкомлӧн шуӧм. Обисполком тшӧктӧ чорыда босьтчыны вӧр видзӧм удж бердӧ да индӧ туйяс видзчысьны да вермасьны пӧжаръясысь.
Пӧжаръяс дырйи уна вӧр сотчӧ, уна бур мича вӧр пӧжаръяс бӧрын сісьмыны заводитӧ, сы вӧсна Коми обласьтлӧн вермас ёна чинны доход, а коми крестьяналӧн нажӧтка. Коми Обисполком шуис: вӧр пӧжаръяскӧд пӧ вермасьӧм — став йӧзлӧн удж. Волисполкомъяс, сельсӧветъяс (10 верстысь кӧ ылынджыкӧсь волисполкомъяссянь) вермӧны чукӧртны пӧжар кусӧдӧм вылӧ став уджалысь вермысь йӧзсӧ (трудовая мобилизация).
Мед кокньыдджыка да регыдджык чукӧртны йӧзсӧ, став вӧрсӧ ковмас юклыны сиктъяс костын пӧжаръяс дырйи кусӧдчӧм вылӧ. Пӧжар кӧ лоӧ 15 верст гӧгӧр сиктсянь, йӧзыслы лоӧ кусӧдны сійӧс дон босьттӧг (бесплатно), ылынджык кӧ — мынтыссьӧ 70 урӧн 8 часся уджалӧмысь.
Крестьяна пӧвстын унаӧн шуасьӧны, важ кусӧдчӧмъяссьыс дон налы абу мынтылӧмаӧсь; ӧні Обисполком тшӧктӧ кусӧдчӧмысь сьӧмсӧ мынтыны куим тӧлысь тыртӧдз пӧжар лунсяньыс.
Сэсся шуӧмас гижӧма: гожӧмын вӧр керавны, кер лэдзны некодлы оз позь; сідзжӧ оз позь юнь 1-ӧд лунсянь арся кӧдзыдъясӧдз дьӧгӧдь да сир перйыны вӧрын. Гожӧм чӧж оз позь вӧрын биасьны, кӧстеръяс сотны, сӧмын биасьны позяс юяс, ключьяс дінын. Тылаяс лӧсьӧдны да сотны некыдзи абу лэдзӧма.
Со мыйяс шуӧ вӧчны Обисполком вӧр видзӧм вӧсна. Сідзжӧ сэсся Обисполком шуис судӧ сетны йӧзсӧ, оз кӧ найӧ кутны видзны вӧр. Бура кӧ да пӧжартӧг сиктъяс гӧгӧр мунас гожӧм, сэтшӧм сиктъяслы видз-му юкӧд вӧр сеталігӧн кутас сетны кокньӧдъяс (унджык, бурджык да донтӧмджык вӧр сеталӧмӧн).
Коми крестьяна, видзӧй вӧр! Волисполкомъяс, сельсӧветъяс, висьталӧй крестьяналы вӧр видзӧм йылысь. Вӧрсянь сӧмын миян, коми йӧзлӧн, став олӧмыс, колӧ ёна тӧждысьны вӧр вӧсна.
Н. К.
