ВОСЬТАЛӦЙ ПОСНИ ЧЕЛЯДЬЛЫ ГОЖСЯ САД

Матысмӧ тулыс — шоныд кад. Посни челядь, ар 3−7, кутасны регыд быд пельӧсын котравны, ворсны, видзӧдны, кыдзи олӧны гырысьяс. Гожӧмбыд найӧ ывла вылынӧсь. Котралӧны няйтӧсь, некодӧн видзтӧг, кынӧмныс сюмалӧ, сёйны кор колӧ, пыраласны керкаӧ, бӧр-водз, кватитасны няньтор да, бара нин ывлаӧ котӧртӧны. Челядьӧс видзысьяс миян коми деревняясын сэтшӧм жӧ челядь, неуна гырысьӧсьджык — ар 8−9-ӧсь, либӧ пӧрысь бабаяс, ещӧ ӧд ӧти видзысьыдлӧн унджыксьыс кык кага: ӧтиыс зыбкаын, мӧдыс котралӧ.

Сэтшӧм посни челядь вылас миян коми деревняын омӧля на видзӧдлӧны, оз на кужны найӧс быдтыны. Тайӧ каднас, ар 3−7 челядьтӧ, медъёна колӧ кужны быдтыны. Сэки найӧ став олӧмсӧ гырысьыдлысь видзӧдӧны да велӧдчӧны, быдтор юасьӧны, ставсӧ налы окота тӧдны. Мамъяс оз эштыны некор сёрнитны, оз вермыны челядьӧс быдтыны кыдзи колӧ. «Мед котраласны — ёнджыка узясны». — Со налӧн кутшӧм кывъяс. Быдсяма котралӧмыд ӧд овлӧ челядьыдлӧн дӧзьӧриттӧгыд: ӧти вӧйӧма купайтчигӧн, мӧд доймӧма, коймӧд висьмӧма мыйсюрӧ сёйӧмла.

Колӧ быд коми мамлы дай тшӧтш став организацияяслы думыштны бура быдтыны челядьӧс. Колӧ восьтыны быд вӧлӧсьтӧ челядь площадкаяс. Кӧні вермасны, восьтыны весиг челядь садъяс. Сэні посни коми челядь кутасны ӧтув овны, лоӧны здоровӧсь, дзоньвидзаӧсь.

Волисполкомъяс, кооперативъяс, сетӧ сьӧм площадка вылӧ. Учительяс, комсомолечьяс, коммунистъяс, висьтавлӧ мамъяслы, кыдзи восьтыны площадка. Женотдел, делегаткаяс, чуйдӧдӧй став мамсӧ тайӧ удж вылӧ, асьныд коми мамъяс, тшӧтш сёрнитӧй та йылысь скодъяс вылын, восьталӧй челядь площадкаяс.