ЫБСА (СЫКТЫВ У.) ВКП(б) ЯЧЕЙКАЛӦН УДЖ

Колян во помас ячейкаын уджыс зэв омӧля вӧлі мунӧ. Шленъяслӧн ас костас сӧглас эз вӧв, пыр вӧлі зычитӧны, вензьӧны мӧда-мӧд костын. Тадзикӧн уджыс муніс декабр тӧлысь помасьтӧдз. Обкомлӧн инструкторъяс да О.К.К.-лӧн представительяс ячейка уджӧн тӧдмасьӧм бӧрын сетісны туйдӧдъяс.

Ячейка водзын сувтісны сэтшӧм уджъяс: 1) дзикӧдз бырӧдны шленъяс костысь мӧда-мӧд кост вензьӧм-зычитӧмъяс, 2) ёнмӧдны ячейкасӧ, кыскыны выль шленъясӧс, заводитны уджавны план серти да сетны быд шленлы удж, 3) заводитны тӧвся велӧдчӧм (политучёба), тӧдмавны вӧлӧсьтса водзынджык мунысь йӧзӧс, газет-нига разӧдны йӧз пӧвстын, комсомол удж нуӧдны да сідз водзӧ.

Бӧръя куим тӧлысьнас (январ, февраль, март) ячейка вӧчис сэтшӧм удж:

Кык собранньӧ вылын вӧлі сёрнитӧма шленъяс кост оласног йылысь, ӧткымын шлен уджалӧм йылысь, 14 партия съезд йылысь. Тайӧ сёрнияс бӧрын шленъяс кост зычитӧмъяс, вензьӧмъяс ячейкаын бырины. Став вӧлӧсьтувса учрежденньӧяскӧд, организацияяскӧд удж мунӧ мӧда-мӧдлы отсасьӧмӧн. Вӧлӧсьтувса учрежденньӧясӧ бӧрйӧма тӧлка йӧзӧс. Крестьяна ячейкалысь удж ошкӧны. Ячейка ӧні индалӧ сӧвет удж вылӧ тӧлкаджык водзӧ мунысь крестьянаӧс.

Быд учрежденньӧясӧ партиясянь индӧма представительясӧс. Найӧ ячейкаса собранньӧ вылын висьтавлӧны аслас учрежденньӧса удж мунӧм йылысь. Собранньӧ вывъясас налы сетсьӧ водзӧ уджавны туйдӧд.

Собранньӧяс вылын сёрнитӧны унджыксӧ крестьяналы коланторъяс йылысь: кооператив удж йылысь, мӧда-мӧдлы отсасян комитет удж йылысь, видз-му юкӧм йылысь да сідз водзӧ. Ячейкалӧн лыдыс соді дай ёнмис ячейкаыс. Тайӧ каднас ячейкаӧ босьтӧма 10 мортӧс, сӧмын укомыс утвердитіс 7.

Комсомолечьяс пиысь ячейкаӧ босьтӧма 5 мортӧс, крестьяна пӧвстысь 5 мортӧс. Ӧні ячейкаас 25 морт, на пиысь 6 мортӧс Обком эз на утвердит.

Удж сетӧма быд шленлы. Тайӧ каднас сиктъясын вӧчӧма вит собранньӧӧн. Ячейкаын пытшкӧсса олӧм пуктӧма бура. Собранньӧяс вылӧ волывлӧны лючки. Заводитчӧма удж нуӧдны видз-му юкӧд кузя да гӧль крестьянаӧс ӧтувтӧм кузя.

Ячейкаса секретар Горчаков.