ПЕЗМӦГЫН

Пезмӧгса (Кулӧмдін уезд.) крестьянскӧй конференция вылын вӧлі 34 бӧрйӧм морт, на пиысь 3 нывбаба. Конференция вылын крестьяна ёна сёрнитісны ассьыныс овмӧссӧ кыпӧдӧм йылысь. Конференция шуис лӧсьӧдны племеннӧй ӧшкӧс, ёнджыка тӧдмасьны, кыдзи бурмӧдны видз-му, да корны, мед частӧджык волывласны вӧлӧсьтъясӧ агрономъяс. Крестьяна шуисны ёнмӧдны пӧжарнӧй удж, видзны сотчӧмысь вӧр, частӧджыка чукӧртчывлыны собранньӧяс вылӧ, восьтыны гожӧм кежлӧ посни челядьлы ясли. Исполкомлы конференция шуис ёнджыка тӧдмӧдны йӧзӧс аслас уджӧн, мӧда-мӧдлы отсасян комитетлы шуис корсьны удж гӧль крестьяналы да сетны налы отсӧг сьӧмӧн да уджалӧмӧн.