КРЕСТЬЯНА КОНФЕРЕНЦИЯ ВИСЕРЫН

Апрель 18-ӧд лунын вӧлі Висерын (Кулӧмдін у.) беспартийнӧй крестьяна конференция. Конференция вылын крестьяна кывзісны докладъяс районированньӧ йылысь, овмӧс лӧсьӧдӧм йылысь, да волисполком висьталіс аслас удж йылысь.

Районированньӧ йылысь доклад вӧчӧм бӧрын конференция шуис: Коми обласьтлӧн пӧ мукӧд орчча губерняяскӧд овмӧс кыпӧдан туйясыс абу ӧткодьӧсь. Сы вӧсна пӧ колӧ Коми обласьт кольны торъя обласьтӧн, сюйны пӧ Асыв-Вой обласьтӧ сійӧс оз позь.

Сэсся конференция шуӧ, Висерын пӧ йӧзыс эськӧ бура уна, да мукӧд вӧлӧсьтувса йӧзсьыс пӧ найӧ ёна кольччӧмаӧсь велӧдчӧмнас дай овмӧс кыпӧдӧмнас. Велӧдчытӧм йӧзыс Висерын зэв на уна; телеграф ни телефон абу, туйяс ставыс киссьӧма. Висер кузя абу ветеринарнӧй пельшӧр, абу агроном, йӧзлы лечитӧм отсӧг сетӧны омӧля жӧ. Мӧдарсяньыс, Висерын эм вывті уна вӧр. Быд во сэтысь лэдзӧны уна сюрс вӧр заграничаӧ нуӧм вылӧ. Сэсся Висерын крестьяна быд во кыйӧны зэв уна пушнина. Пушнинаыс да вӧрыс обласьтувса бюджетлы сетӧ зэв ыджыд доход. Сы вӧсна конференция тшӧктӧ корны обласьтувса исполкомлысь районированньӧ нуӧдігӧн Висер вожсӧ торйӧдны торъя районӧ.

Сэсся висьталісны конференция вылын волисполком удж йылысь. Выль положенньӧ серти, праваяс сетӧм бӧрын волисполкомлӧн уджыс ёна бурмис. Ӧні волисполком индалӧ уджсӧ нуӧдны став вӧлӧсьтувса учрежденньӧясыслы да организацияясыслы. Сӧмын йӧз водзын волисполком омӧля на висьтавлӧ аслас удж йылысь. Конференция шуис волисполкомлы водзӧ кежлӧ висьтавлыны йӧзлы собранньӧяс вылын аслас удж йылысь быд куим тӧлысьын. Вӧлӧсьтувса учрежденньӧяслы да организацияяслы тшӧктыны жӧ висьтавлыны аслас удж йылысь волисполкомлы. Сэсся конференция тшӧктӧ зільны бурджыка сувтӧдны школаясын велӧдӧм, йӧзӧс югдӧдан удж, лыддьысян керкаясын да краснӧй уголокъясын, дзоньвидзалун кутан удж вӧлӧсьтын да сідз водзӧ. Колӧ пӧ тшӧтш вӧчны ремонт босьтӧм керкаясын (в муниципализированных домах), пӧжарнӧй сарайын да судзӧдны пӧжарнӧй кӧлуй.

Конференция шуӧ, бӧръя каднас пӧ вӧлӧсьтын ёна кутіс паськавны кулиганитӧм; колӧ пӧ волисполкомлы ёна вермасьны такӧд да став мыжаяссӧ сетавны судӧ.

Таво кӧдзаяс позьӧ страхуйтны сӧмын шерӧн жугӧдӧмысь. Конференция шуӧ, миян пӧ вӧлӧсьтын вывті тшӧкыда няньяс кынмавлӧны. Волисполкомлы пӧ колӧ корны Госстрахлысь тшӧтш страхуйтны кӧдзаяс да корны чинтыны страхуйтан дон гырысь скӧт страхуйтӧмысь.

Овмӧс лӧсьӧдӧм йылысь доклад кывзӧм бӧрын конференция шуис: ёна пӧ этша кӧрта тӧвар. Колӧ пӧ ёнджыка вайны крестьяналы колан кӧрта кӧлуй. Сэсся уджалан дон пӧ кер лэдзысьяслӧн зэв на улын, а нянь да тӧвар дон вылын на. Колӧ пӧ ёнджыка видзӧдлыны вӧр лэдзысьяс вылӧ да зільны содтыны налы уджалан донсӧ.

Конференция шуӧ, колӧ пӧ быдпӧлӧс учрежденньӧяслы ёнджыка видзӧдлыны аслас рӧскодъяс вылӧ да чинтыны став ковтӧм лишнӧй рӧскодъяссӧ. Ӧні пӧ сэтшӧм ковтӧм рӧскодъясыс учрежденньӧясын да организацияясын, медсясӧ нин тӧргӧвӧй да вӧр лӧсьӧдан организацияясын, зэв на уна.

Колӧ пӧ таво нуӧдны Сторожевсксянь Нившерӧдз телефон, корны пӧ колӧ Обисполкомлысь восьтыны Шойнатыӧ семилетка.

Сэсся конференция шуис, Сӧветъясӧ бӧрйысьӧм пӧ кӧлӧ нуӧдны август 25-ӧд лунсянь сентябр 10-ӧд лунъясӧдз. Мукӧд кадас пӧ став йӧзыс оз вермы волыны Сӧветас бӧрйысигӧн.