КОЛӦ ВЕЛӦДЧЫНЫ

«Велӧдчытӧм морт дзик синтӧм кодь» — тадзи шуӧны йӧз пытшкын. Сійӧ оз вермы отсавны Сӧвет власьтлы выль олӧм лӧсьӧдны. Та вӧсна Сӧвет власьт пуктӧ зэв ыджыд удж гырысь йӧзӧс велӧдӧм кузя.

Таво Коми Обласьтын велӧдчисны 3000 унджык велӧдчытӧм гырысь йӧз. Найӧ кутісны кужны лыддьысьны-гижны. Водзӧ налы оз ков эновтчыны нига-газет дінысь; лыддьысьӧмӧн пыр колӧ содтыны, паськӧдны вежӧртӧ.

Быд вӧлӧсьтын эм лыддьысян керкаяс, сиктъясын — краснӧй уголокъяс. Сэтысь сюрӧ коми и роч гӧгӧрвоана нигаяс. Видз-му уджалӧм йылысь, скӧт видзӧм йылысь лыддьӧм отсаласны овмӧстӧ бурмӧдны.

Босьтам лыддьысян керкаса кружокъяслысь удж. Сэтӧні тӧдмалӧны, разбирайтӧны сёрнияс, кодӧс колӧ тӧдны быд крестьянинлы. Кружок удж вылӧ ветлӧдлӧм кокньӧдас водзӧ велӧдчыны, индас кӧзяйство кыпӧдан туй.

Делегаткаяслӧн чукӧртчылӧм сідзжӧ содтас вежӧртӧ. Сэтысь кывлан, кутшӧм ногӧн олӧны мукӧд государствоясын, кыдзи Россияын перйисны Сӧвет власьт, кыдзи быдмис-крепаммис коммунист партия да сідз водзӧ.

Быд вӧлӧсьтын эм пемыдлун бырӧдан общество (Общество «Долой неграмотность»). Тайӧ общество тӧждысьӧ велӧдчытӧм йӧз вӧсна дай тшӧтш неуна велӧдчӧм йӧз вӧсна. Велӧдчӧм йӧзлы судзӧдӧ газетъяс, лунысь-лун отсалӧ водзӧ югдӧдны вежӧрсӧ.

Тавося велӧдчысьяслы колӧ сибӧдчыны тайӧ общество дінӧ, юасьны налысь, вӧчны найӧ туйдӧдӧм серти. Колӧ отсавны быд мортлы бырӧдны пемыдлун да тшӧтш отсавны неуна велӧдчӧм йӧзлы содтыны, паськӧдны вежӧрсӧ.

Мӧда-мӧдлы отсасьӧмӧн велӧдчытӧм верман бырӧдны кокньыда.