СКӦТ ВИДЗӦМ ЙЫЛЫСЬ СТАВРОССИЯСА СӦВЕЩАННЬӦ
Колӧ вежны видз-му уджалӧмсӧ.
Неважӧн муніс Мӧскуаын скӧт видзӧм йылысь Ставроссияса сӧвещанньӧ. Сӧвещанньӧ вылӧ волісны зэв уна крестьяна да агрономъяс.
Войнаӧдз скӧт видзӧм вӧлі медбӧрын, шуисны делегатъяс сӧвещанньӧ вылын. Крестьяна дай агрономъяс сӧмын вӧлі думайтӧны нянь йылысь — кыдз эськӧ унджык чукӧртны сю, шабді да ид. Ӧні агрономъяс дай крестьяна тшӧтш шуӧны, ӧти нянь вӧдитӧмӧн пӧ крестьяналӧн овмӧс оз кыпты, скӧт видзӧмӧн пӧ позяс босьтны ыджыдджык доход видз-му уджалӧмысь.
Но уна скӧт видзӧмӧн он на босьт ыджыд доход; колӧ кужӧмӧн скӧтсӧ видзны, колӧ кужӧмӧн вердны да юктавны, колӧ лӧсьӧдны шоныд да югыд картаяс. Мед верман куйӧд вӧчан машинаысь мӧстӧ пӧртны ведра йӧла мӧскӧ, мед омӧлик куим пудъя порсь пыдди видзны 20 пудъя, мед дзоляник сиктса вӧв бура видзӧмӧн пӧртны бур-ён вӧлӧ, ковмас став видз-му уджалӧмсӧ вежны, колӧ уна переменаӧн заводитны уджавны видз-му, — шуис сӧвещанньӧ.
Колӧ бурмӧдны скӧт.
Скӧт видзӧм да вердӧм йылысь крестьяна ӧні тӧдӧны нин унатор. Сӧвещанньӧ вылын медыджыд, медгырысь сёрни вӧлі скӧт бурмӧдӧм, скӧт быдтӧм йылысь. Сӧвещанньӧ шуис: — куш бура вердӧм да бура видзӧм оз на тырмы, колӧ бурмӧдны скӧт, колӧ вӧчны, мед эськӧ крестьяналӧн скӧтыс воысь воӧ бурмис. Колӧ ёна бӧрйыны скӧтлысь пиянсӧ быдтӧм вылӧ. Тадзинас, пыр бӧрйӧмӧн, воысь воӧ скӧтыс пыр кутас бурмыны, воысь воӧ вӧвъяс ёнджыкӧсь лоӧны, мӧсъяс йӧладжыкӧсь. Профессор Кулешов сӧвещанньӧ вылын висьталіс: «Миянлы оз ков вайны скӧт заграничаысь, сӧмын колӧ ассьыным скӧтнымӧс бурмӧдны.» Миян асланым скӧтлӧн зэв ыджыд буртор эм, висьталіс профессор, — миян скӧт велалӧма кӧдзыдӧ, заграничаысь вайӧм скӧт оз вермы миянын овны.
Кооперация отсалас крестьяналы.
Кооперациятӧг сьӧкыд лоӧ судзӧдны бур вына кӧрым, он вермы нормаӧн вердны скӧтсӧ — шуис сӧвещанньӧ. Кооператив вермас тшӧтш отсавны крестьянинлы лӧсьӧдны шоныд карта. Кооператив пыр крестьянин вермас судзӧдны видз-му уджалан кӧлуй да машинаяс, кооператив пыр крестьянин вермас кокньыдджыка вузавны крестьянскӧй тӧвар. Кооператив отсалас крестьяналы восьтыны случнӧй пункт, судзӧдны бур ӧшкӧс да лӧсьӧдны прокатнӧй пункт.
Мӧсъяс йылысь.
Сӧвещанньӧ вылын уна сёрни вӧлі мӧсъяс йылысь. Сӧвещанньӧ шуис: колӧ паськӧдны ветеринарнӧй пунктъяс — восьтавны выльясӧс, унджык сьӧм лэдзны крестьяналы уджйӧзӧн скӧт ньӧбӧм вылӧ, чинтыны мӧс вылӧ налогъяс, бурмӧдны видзьяс.
Сэсся, мед мӧсъяс бурджыкӧсь вӧліны, сӧвещанньӧ шуис со мыйяс вӧчны: колӧ пӧ лӧсьӧдны скӧтӧс нормаӧн вердӧм, восьтавны контрольнӧй союзъяс, заптыны вына кӧрымъяс, вӧчавны шоныд картаяс, лӧсьӧдавны тӧвариществояс ӧшъяс видзны да мукӧдтор. Став шуӧмъяссӧ сӧвещанньӧ шуис нуны вит во чӧжӧн.
Порсь видзӧм йылысь.
Сӧвещанньӧ шуис омӧлик крестьяна порсь пыдди паськӧдны гырысь английскӧй порсьясӧс. Кооперативъяс пыр колӧ отсавны крестьяналы случнӧй пунктъяс восьтавны.
Сэсся сӧвещанньӧ сёрнитіс ыжъяс, вӧвъяс йылысь. Сӧвещанньӧ шуис бура видзӧмӧн да ёна бӧрйӧмӧн бурмӧдны вӧвъяс, ыжъяс. Сӧвещанньӧ вылын вӧлі сёрни корны правительстволысь лӧсьӧдны закон омӧлик ужъясӧс не лэдзны вӧвъяс дінӧ.
