КЫДЗИ ЛӦСЬӦДНЫ СИКТЪЯСЫН ФИЗКУЛЬТУРА КРУЖОКЪЯС

Унаӧн сиктъяссянь юасьлӧны физкультура кружок лӧсьӧдӧм йылысь: эмӧсь пӧ миян том йӧз, кӧсйӧны кутчысьны физкультураӧ, сӧмын пӧ велӧдысьясыс абуӧсь. Ме ичӧтика висьтала, кыдзи да кодкӧд позьӧ физкультура лӧсьӧдны сиктъясын. Унджык вӧлӧсьтъясын ӧні эмӧсь лыддьысян керкаяс, сы дінын восьталӧмаӧсь уна пӧлӧс кружокъяс. Физкультура кружок колӧ сэтчӧ восьтыны мукӧд кружок моз жӧ, ӧти праваӧн. Тайӧ уджсӧ панысьнас колӧ лоны комсомол ячейкалы. Чукӧртчасны кӧ том войтыр, морт 10−15, найӧ вермасны ас костсьыс бӧрйыны старӧстаӧс — удж нуӧдысьӧс. Сэсся лӧсьӧдасны мукӧд кружокъяс моз жӧ аслыныс устав. Бӧрйӧм ёрт сёрнитас избачкӧд, волполитпросветкомкӧд. Найӧ уставнысӧ вынсьӧдасны. Старӧсталы жӧ колӧ гижӧдчыны ас уездувса физкультура Сӧветкӧд. Тадзи позьӧ восьтыны сиктъясын физкультура кружок. Инструктор пыдди кружок аддзас ас сиктсьыс жӧ учительӧс, либӧ избачӧс, либӧ комсомолечӧс, либӧ красноармеечӧс, ӧні найӧс велӧдӧны сы вылӧ, омӧлика физкультура йылысь тӧдысь морт сиктын сюрас.

Колӧ лӧсьӧдны план кружок уджлы. Медводз позьӧ кружоклы велӧдны ветлӧдлыны (маршируйтны), бура сулавны, командаяс тӧдмавны. Сэсся позьӧ кутчысьны ворсӧмъясӧ. Кутшӧм сиктъясын мыйӧнджык ворсӧны, сэтшӧмторъясӧнджык колӧ кружоклы ворсны: каръясьны, мач песны, сяръясьны да мукӧдтор. Ӧні уна лэдзӧны нигаяс ворсӧмъяс йылысь, сэтысь позьӧ босьтавны уна пӧлӧс выль ворсӧмъяс: «куим кок вылын котралӧм», «петукъяслӧн косясьӧм», «пань вылын картупель кутӧмӧн котралӧм», сідз водзӧ. Ворсӧмъяс позьӧ аддзыны зэв уна. Гожӧмын кружоклы колӧ корсьны сикт бердсьыс кос шыльыдін (площадка) да сэні нуӧдны став уджсӧ. Сэні жӧ позьӧ сувтӧдны качай сюръя, потш да ӧшӧдны гез. Сы кузя позьӧ велӧдчыны каттьысьны. Праздник рытъясӧ кружок вермас вӧчны ворсӧмъяс — позьӧ йӧктыны, сьывны. Колӧ татшӧм уджсӧ нуӧдны лӧсьыда, гажа, мед ворсӧны ставныс, некодлы абу гажтӧм.

Корсюрӧ старӧста вермас корлывны пельшӧрӧс висьтавлыны кружоклы бурдӧдӧм-отсалӧм йылысь чуньяс вундысигӧн, кок керыштігӧн, морт вӧйигӧн да сідз водзӧ. Учитель сідзжӧ вермас сёрнитыштны морт йылысь, висьталас, кыдзи колӧ уджавны, шойччыны, велӧдчыны, лолавны да мукӧдтор. Колӧ дугӧдны кружок шленъясӧс куритчӧмысь, вина юӧмысь, косясьӧмысь.

Тадзи надзӧникӧн позьӧ кыпӧдны сиктъясын физкультура. Вермас кӧ кружок чукӧртны деньга, позьӧ судзӧдны нигаяс, футбол да мукӧдтор.

Робур.