КРЕСТЬЯНАӦС КУРОРТӦ МӦДӦДӦМ ЙЫЛЫСЬ

Важ сар дворечьяссӧ Сӧвет власьт сетіс рабочӧйлы да крестьяналы, восьталіс уналаын больничаяс. Ӧні сэтӧні рабочӧй-крестьяна шойччӧны, лечитчӧны.

Тайӧ во кежлӧ Коми обласьтувса крестьяналы сетӧма курортъясӧ 14 места, на пиысь Ливадияӧ — 8 места, Старӧй Руссаӧ — 4 места, и сернӧй минеральнӧй ва вылӧ 2 места. Та кындзи ещӧ Северолес сетӧма 2000 шайт курортъяс вылӧ. Тайӧ сьӧм вылӧ босьтӧма кӧкъямыс места, сэтчӧ ыстасны Северолеслы уджалысь крестьянаӧс.

Крестьянаӧс курорт вылӧ ыстӧм кузя быд вӧлӧсьтын лӧсьӧдӧма комиссия. Сэтчӧ пырӧны представительяс: волисполкомсянь, партия ячейкасянь, мӧда-мӧдлы отсасян комитетсянь да пельшӧр либӧ врач. Тайӧ комиссияыс видлалас висьысь йӧзӧс да пасъялас, кодӧс колӧ ыстыны. Став гижӧдсӧ комиссия ыстӧ уездувса дзоньвидзалун кутан юкӧдӧ. Сэсянь видлалӧм бӧрын гижӧдсӧ мӧдӧдӧны обласьтувса дзоньвидзалун кутан юкӧдӧ. Сэні гижӧдъяс видлалӧм мысти пасъялӧны, кодъясӧс колӧ медвойдӧр курорт вылӧ мӧдӧдны да ыстӧны став гижӧдсӧ бӧр уездувса дзоньвидзалун кутан юкӧдӧ. Сійӧ пасъялӧм йӧзӧс корас уездӧ да вӧчас налы комиссия мӧдысь. Тайӧ комиссия вылын дзикӧдз бӧръясны курорт вылӧ ыстан йӧзӧс. Бӧрйӧм йӧзлы сетӧны кӧрт туй кузя мунан да мукӧд пӧлӧс гижӧдъяс, ӧтик шайтӧн лун вылӧ сьӧм мунігкежлӧ. Бӧр локтігӧн сьӧм да гижӧдъяс сетасны курорт вывсянь.

Гортӧ воӧм мысти став гижӧдъяс колӧ сетны докторлы либӧ дзоньвидзалун кутан юкӧдӧ.

Жеребцов.