СЕВЕРНӦЙ ПОЛЮС КОРСЬӦНЫ

Норвегияысь ӧти велӧдчӧм морт Амундсен ӧні лэбзис корсьны севернӧй полюс. Севернӧй полюс унаӧн нин заводитлісны корсьны, унаӧн нин ветлісны сэтчӧ быд ногӧн — судноясӧн, аэропланӧн — сӧмын некод эз удайтчывны. Унаӧн вошлісны, кувлісны туй вылас, унаӧн сідз бӧр волісны. Амундсен ветліс жӧ нин корсьны судноӧн ӧтчыд севернӧй полюссӧ, да эз жӧ удайтчы.

Амундсен ёна нин ветлӧдліс кӧдзыдінъясын. Сійӧ жӧ аддзис южнӧй полюс. Сійӧ лӧсьыда нин тӧдӧ, кыдзи лӧсьыдджыка да кокньыдджыка позьӧ воны севернӧй полюсӧ. Сы ногӧн, медлӧсьыд лэбзьыны севернӧй полюс вылӧ дирижабльӧн. Дирижабльнас позьӧ ӧдйӧ мунны, позьӧ вывті ньӧжйӧ мунны, сэсся озджык жугавлы дай унджык лэптӧ. Лэбзьынысӧ Амундсен судзӧдіс Италияысь дирижабль. Сэтчӧ сійӧ босьтіс зэв уна сёян-юан, паськӧм, доддялӧмӧн ветлыны кужысь понъясӧс да ещӧ унатор. Ставыс мунісны морт 10 саяс. Мунігмозыс Амундсен кӧсйӧ ставсӧ мунанінъяссӧ бура лючки тӧдмавны (ӧнӧдз нинӧм на пӧшти оз тӧдны полюсгӧгӧрса местаяс йылысь).

Дирижабльыс Амундсенлӧн лэбзис Ленинград пыр, войдӧр Шпицберген вылӧ, а сэсянь полюслань. Бӧръя юӧръяс сертиыс, Амундсен лэбзьӧма нин полюс вомӧныс дай воӧма нин войвыв Аляска помас (Америкаын).

Амундсен лӧсьӧдчис лэбзьыны зэв нин важӧн. Сы вылӧ видзӧдӧмӧн мукӧдлы тшӧтш лои окота корсьны полюссӧ дай водзджык Амундсен дорысь аддзыны сійӧс. Вӧлі лӧсьӧдчӧны унаӧн петны севернӧй полюс корсьны. Кык америкаса морт, Бэрд да Беннет, кор Амундсенлӧн дирижабльыс вӧлі сӧмын на Ленинградысь петӧма, аэроплан вылын лэбзьӧмаӧсь Шпицберген вывсянь полюс корсьны. Дас вит час мысти найӧ бӧр локтӧмаӧсь Шпицберген вылас да висьталӧмаӧсь: ветлім пӧ полюс дорӧдз, шыбитім пӧ сэтчӧ флаг да ящик документъясӧн. Збыльысь найӧ волӧмаӧсь полюс дінас али абу, оз на тӧдны.

Н-Уль.