ЭКСПЕРТНӦЙ КОМИССИЯЯС

Обласьтувса исполнительнӧй комитетлӧн шуӧм

Воис тулыс, ӧзимъяс петісны лым улысь, заводитчис кӧдзан кад. Сэсся кӧдзаяс, турунъяс кутасны быдмыны да воны. Тӧдмавны, артавны гӧра-кӧдза, турун быдмӧм, нянь да турун воӧм, чукӧртӧм, артавны вогӧгӧрся быдтас-пуктас воӧм, Обисполком шуӧм серти, лоӧ восьтавны вӧлӧсьтувса, уездувса да обласьтувса экспертнӧй комиссияяс.

Экспертнӧй комиссияяс тӧдмалӧм серти позяс артавны локтан урожай. Урожай арталӧм серти Уисполком да Обисполком кужасны пуктыны торъя вӧлӧсьтъясӧ, сиктъясӧ сельхозналог. Со кутшӧм ыджыд удж лоӧ нуны экспертнӧй комиссияяслы. Медсьӧкыд, медтӧдчана уджыс лоӧ вӧлӧсьтувса комиссияяс вылын. Сы вӧсна вӧлӧсьтувса комиссияясӧ ковмас пуктыны бура уджалысь да ёна тӧдысь йӧзӧс. Медым нянь, турун да пуктасъяс воӧм тӧдмалӧм уджыс муніс ӧти туйӧд, ӧти ногӧн, Обисполком шуӧм серти комиссияӧ пырӧны:

Вӧлӧсьтувса комиссияясӧ: 1) волисполкомса председатель, 2) волисполкомса видз-му делӧясӧн заведуйтысь, либӧ участокса агроном, либӧ поводдя тӧдмалан (метеорологическӧй) станцияын, прокатнӧй пунктын заведуйтысь, 3) финанс юкӧдсянь либӧ волисполкомса налогӧвӧй столсянь уджалысь, 4) страхӧвӧй агент, 5) кооперативсянь (потребобществосянь, видз-му кооперативсянь) бӧрйӧм морт, 6) волстатистик либӧ сы пыдди уджалысь морт, 7) комсомол ячейкабердса видз-му кружоксянь бӧрйӧм морт, 8) волисполкомбердса видз-му секцияӧн бӧрйӧм морт, 9) избач.

Вӧлӧсьтувса комиссияын юралысьнас лоӧ волисполкомса председатель, секретарнас — волстатистик либӧ сы пыдди уджалысь.

Уездувса комиссияӧ пырӧны ӧти мортӧн: 1) Уисполкомсянь, 2) Уездувса видз-му юкӧдсянь, 3) Укомсянь, 4) Укоммолсянь, 5) фининспектор, 6) страхӧвӧй агент, 7) видз-му кооперациясянь, 8) статбюросянь, 9) потребкооперациясянь.

Обласьтувса комиссияӧ пырӧны: Видз-му управленньӧсянь, Обисполкомсянь, Обкомсянь да мукӧд, ставыс 11 морт.

Комиссия аслас сёрнитігас, тӧлкуйтігас вермӧ корны тӧдысь йӧзӧс. Медым ӧти пӧлӧс йӧз уджсӧ нуӧдісны помӧдзыс, оз ков удж помасьтӧдзыс (арся кӧдзаяс лым улӧ пырӧм бӧрӧдз) комиссияын уджалысьяссӧ вежлавны.

Экспертнӧй комиссияяслы ыджыд удж лоӧ нуны. Волисполкомъяслы ковмас та вылӧ ёнджыка видзӧдлыны, мед эськӧ комиссияяс бура уджалісны, медым государство вермис тӧдны вося урожай да урожай арталӧм серти лӧсьӧдны водзӧ кежлӧ уджсӧ. Бура уджалӧмӧн, бура, пыр ӧтмоза тӧдмалігӧн комиссияяс ыджыд кокньӧд ваясны крестьяналы тшӧтш. Экспертнӧй комиссияяс вермасны Обисполкомлы, Уисполкомлы индыны, уна-ӧ, кытчӧ пуктыны сельхозналог, оз-ӧ ков кытӧнкӧ омӧль урожай вӧсна — шерӧн жугӧдӧм вӧсна, кынмӧм вӧсна — чинтыштны налогсӧ.

Сӧмын кор вӧлӧсьтувса комиссияяс бура босьтчасны уджавны, позяс уездувса да обласьтувса комиссияяслы бура тӧдмавны вося урожай.

Н. К.