АНГЛИЯСА РАБОЧӦЙЯСӦС ДУГӦДІСНЫ БАСТУЙТӦМЫСЬ

Англияын рабочӧйяслӧн бастуйтчӧм вывті ёна паськавлі. Бастуйтӧны вӧлі 5 миллион гӧгӧр рабочӧйяс. Капиталистъяс из шом перйысь рабочӧйясӧс кутісны дзескӧдны да, англияса рабочӧйяс ставныс ӧтвылысь сувтісны найӧс дай асьнысӧ капиталистъясысь мездӧм кузя.

Англияса рабочӧйяс вывті ӧтвылысь, кужӧмӧн пыр нуӧдісны забастовкасӧ, сӧмын профсоюзъяса юръясыс вузалісны рабочӧйяссӧ, бара отсалісны капиталистъяслы рабочӧйясӧс венны, унджык забастовка нуӧдысь йӧзыс веськаліны капиталистъяс дор мунысь йӧз пиысь.

Забастовка заводитчӧмсяньыс англияса рабочӧй партияысь да профсоюзъяссьыс юралысьясыс — Макдональд, Томас, Гендерсон да мукӧд сэтшӧм йӧз — пыр тільсисны кыдзкӧ-мыйкӧ воштыны рабочӧйясӧс капиталистъяскӧд ӧти кывйӧ, дугӧдны кыдзкӧ забастовка. На дор мунысь йӧзыс профсоюзъясын уджалысь пиын пыр ньӧжйӧникӧн соді. Забастовка нуӧдысьясыс повзисны забастовкасьыс, сэтшӧма сійӧ паськалі. Найӧ повзисны, уджалан дон вӧсна пӧ водзсасьӧмыс пӧ сэсся пӧрӧ государствоса оласног вежӧм вӧсна косясьӧмӧ. Найӧ повзисны сэтысь да кутісны быд ногыс ещӧ нин зільны дугӧдны забастовка.

Миян СССР-ын дай мукӧд государствоясын рабочӧйяс чукӧртлісны англияса рабочӧйяслы отсӧг вылӧ сьӧм да ыстылісны англияса Генеральнӧй Сӧветлы. Англияса Генеральнӧй Сӧвет эз босьт сійӧ сьӧмсӧ, мед англияса правительствоыс оз чайт англияса рабочӧйясӧн революция вылӧ косясьӧм. Макдональд, Томас да мукӧд сэтшӧм юръясыс асьныс правительствосьыс ёнджыка полӧны революциясьыс. Найӧ велалӧмаӧсь вӧчны сӧмын мый правительствоыс тшӧктӧ.

Сэсся правительствоыс шуис тайӧ забастовкасӧ не закон серти уджӧн дай содтӧд сылы кутісны сёрнитны, правительствоыс пӧ кӧсйӧ банкъяссьыс арестуйтавны став профсоюзса сьӧмсӧ. Тайӧяс ещӧ нин отсалісны профсоюзса юръяслы ӧдйӧнджык заводитны сёрни правительствокӧд да капиталистъяскӧд забастовка дугӧдӧм йылысь. Май 12-ӧд лунӧ Генеральнӧй Сӧветыс тшӧктӧма дугӧдны англияса рабочӧйяслысь забастовка. Бастуйтны кольӧмаӧсь сӧмын горнорабочӧйяс.

Ӧні ёна сьӧкыд лоӧ англияса из шом перйысь рабочӧйяслы водзсасьны капиталистъяскӧд уджалан дон чинтӧм вӧсна. Мый став англияса рабочӧйяс бастуйтігӧн позьӧ вӧлі вӧчны кымынкӧ лунӧн, ӧні англияса из шом перйысь рабочӧйяслы лоӧ косясьны уна тӧлысь. Капиталистъяс важ мозыс на колины ӧтувйӧсь, а рабочӧйяссӧ ставсӧ юръясыс торйӧдісны разі-пели.

Дерт, мыйкӧ дыра кежлӧ из шом перйысь рабочӧйяслы вермасны кольны важ уджалан дон, правительствоыс капиталистъяслы ещӧ на мыйкӧ дыра вермас сетны сьӧм, сӧмын коркӧ татчӧ бара воасны, бара ковмас рабочӧйяслы паныд сувтны капиталистъяслы.

Англияса рабочӧйяслӧн забастовка эштіс, сӧмын рабочӧйяслы тайӧ забастовкаыс прӧста оз коль. Рабочӧйяс аддзисны, коді кытчӧ мунӧ, велаліны капиталистъяскӧд косясьны. Рабочӧйяс да капиталистъяс кост косьыс тайӧн оз дугды, оз кус.

Н.—Уль.