ЛӦЗЫМЫН

(Сыктыв у.)

Кооперативын 130 шлен, на пиысь 13 нывбаба. Кооператив тӧварла быд вежон лэччылӧ карӧ, куйлан тӧвар ньӧти абу. Приказчикыс ӧні уна сеталӧма уджӧн тӧварсӧ да общӧй собранньӧ вылын шуисны водзӧ уджӧннас 5 шайтысь уна не сетны. Ӧні сэсся кооператив восьтіс лыддьысян керкаӧ кооперативнӧй уголок. Сэтчӧ судзӧдӧ нига, газет да журналъяс.

Мӧда-мӧдлы отсасян комитетын 90 шлен. Комитет уджалӧ бура.

Сьӧмыс комитетлӧн 180 шайт. Удждӧма крестьяналы 172 шайт, му-видз да кӧзяйство кыпӧдан кӧлуй лӧсьӧдӧм вылӧ. Бӧр босьттӧм вылӧ сетӧма 3 шайт. Комитетлӧн эм 60 додюв видз да висъяс. Сійӧясӧс комитетас сеталӧма арендаӧн 189 шайтысь. Комитетыс ӧні шуӧма ньӧбавны плугъяс да сетавны гӧриг-кӧдзигӧн пӧльзуйтчыны крестьяналы. Комитет вайліс кӧйдыс весалан машина. Кӧйдыс весалісны 450 пуд гӧгӧр.

Лыддьысян керкаӧ

йӧз зэв ёна волывлӧ, сӧмын томуловджык. Нига библиотекаын вель уна эм. Лыддьысьысь 75 морт. Лыддьысян керка бердын эм сельскокӧзяйственнӧй кружок. Сэні 21 шлен. Кружок чукӧртчылӧма сӧмын куимысь тӧвбыдӧн.

Скод вылын крестьяна сетісны кружоклы му. Сэтчӧ кӧсйӧны кӧдзны турнепс, бобӧнянь, капуста да мукӧдтор.

Пӧжарнӧй дружина

лӧсьӧдӧма вӧлі колян во. Шленыс вӧлі 13 гӧгӧр. Дружина колян во видлавліс да весавліс пӧжарнӧй кӧлуй. Ӧні некод оз тӧд, кӧнкӧ эм абу дружинаыс.

Комсомол ячейка

организуйтчыліс 24 воын. Шленыс кайліс 16-ӧдз, ӧні сӧмын 12-ӧн. Уджсӧ ячейка ӧнӧдз на оз вермы кок йылас сувтӧдны. Ӧтик-кӧ, удж нуӧдысьыс абу, мӧд-кӧ, шленъяс гортаныс омӧля волӧны, сортовка дінын уджалӧны да. Комсомолечьяс политика удж йылысь омӧля гӧгӧрвоӧны. Тӧвнас велӧдчан удж муніс политчиткаӧн да беседаясӧн. Заводитлісны лэдзны стенӧ ӧшӧдан газет. Кык номер петаліс да дугдіс.

Шеф

Лӧзымлӧн — обласьтувса видз-му удж нуӧдан юкӧдлӧн месткомыс (местком ОЗУ). Шеф воліс тӧвнас витысь туманнӧй картина петкӧдлыны, сэсся праздникъяс кежлӧ воліс докладъясӧн, сетіс няръясян машина, лыддьысян керкаӧ сетӧ карасин, библиотекарлы мынтӧ 5 шайтӧн тӧлысь, судзӧдӧ зэв уна пӧлӧс газетъяс лыддьысян керкаӧ, ньӧбаліс плакатъяс, портретъяс, сеталіс бумага, нигаяс да мукӧдтор; мӧдӧдӧ быд номер ассьыс стенӧ ӧшӧдан газетсӧ; быд тулыс волӧ машинаӧн кӧйдыс весавны. Ӧні племеннӧй ӧшкӧс ньӧбигӧн шеф сетіс уджӧн 60 шайт сьӧм.

Школа стрӧитны

войнаӧдз на ещӧ земство петкӧдліс керсӧ, став вӧрыс нин вӧлі, сӧмын тшупны колӧ вӧлі. Тайӧ керйыс ӧнӧдз на куйлӧ местаас да сідзи сісьмӧ. Крестьяна зэв сьӧлӧмсьыс кӧсйӧны стрӧитны школа ли нардом ли, сӧмын корӧны Обисполкомлысь отсӧг — мастерӧс да техникӧс. Обисполком оз сет керсӧ крестьянаыслы дай ачыс оз стрӧит. Кер сісьмӧ, тьӧсъяс да плакаяс крестьяна новлӧны.

Племеннӧй ӧшкӧс

крестьяна ньӧбисны обществоӧн 100 шайтысь. Ӧшкӧс сетісны крестьянинлы видзны, шуисны кык во вердӧм бӧрын дзикӧдз сетны сылы.

Ӧні мунӧ землеустройство, юксьӧны Паджгасакӧд.

Симаков.