МОРДІН ВӦЛӦСЬТУВСА ЛЕСОКРЕСТЬЯНСКӦЙ КОНФЕРЕНЦИЯ

(Кулӧмдін у.)

Апрель 10-ӧд лунӧ Мордін вӧлӧсьтын вӧлі лесокрестьянскӧй конференция. Конференция вылас чукӧрмыліс 45 крестьянин да 6 морт леснӧй стражаысь. Сёрнитісны сэні ёна вӧр йылысь (о лесном хозяйстве): кутшӧм пӧльза вайӧ вӧрыс Сӧвет республикалы да крестьяналы, мыйла да кыдзи колӧ вӧрсӧ видзны, мыйла колӧ весавны вӧр пӧрӧданінъяссӧ. Кутшӧм омӧльтор вайӧ Сӧвет республикаса кӧзяйстволы да крестьяналы кыдзсюрӧ вӧрсӧ кералӧм, пӧжаръяс да тылаяс. Сёрнитӧм бӧрын конференция шуис: 1) ёнджыка висьтавлыны крестьянаыслы вӧр видзӧм йылысь; 2) леснӧй стражалы ёнджыка видзӧдны, а велӧдчӧм йӧзлы висьтавлыны, мед эськӧ крестьянаыс кыдзсюрӧсӧ эз керавны вӧрсӧ, 3) вӧр кераланінъяс весалӧмсӧ шуисны колӧмӧн, 4) сортовка лэдзигӧн вермасьны пуяс прӧста лӧсышталӧмкӧд да тшупӧмкӧд, зэв кузя мыръяс кольӧмкӧд.

Та бӧрын сёрнитісны крестьяналы льготаӧн да дон босьттӧг вӧр сетӧм йылысь. Сэки ёна крестьяна шуасисны леснӧй комиссия да лесничество вылӧ: зэв пӧ дыр оз сетны разрешенньӧсӧ да билетсӧ льготаа да бесплатнӧй керйыс вылӧ. Та йылысь сёрнитӧм бӧрын шуисны: 1) разрешенньӧсӧ да билетсӧ сэтшӧмторъяс вылас сетавны арсяньыс, мед крестьяна удитасны керсӧ вайны бокыса уджъяс вылӧ мунтӧдз, 2) корны леснӧй комиссиялысь, мед лесничествоыс ачыс вермис сетавны разрешенньӧсӧ да билетсӧ, 3) мед леснӧй стража вӧчалас делянкаяс, кытысь позьӧ вайны кер, пес, потш да майӧг. Вӧр политика удж нуӧдӧмсӧ Сӧвет власьтлысь крестьяна шуӧны бурӧн да корӧны водзӧ сідз жӧ нуӧдны.

А. Тюрнин.