ЭТША ЧУКӦРТӦМАӦСЬ

Медбӧръя срок видз-му вот мынтӧмлы коли май 1-ӧд лунын. Тайӧ лун кежлӧ колӧ вӧлі чукӧртны став вотсӧ 212.254 шайт. Вӧлӧстнӧй кассаясӧ чукӧрмӧма 184.436 шайт, 87% став вотсьыс. Недоимкаӧ кольӧма 27.818 шайт.

Таво колян во серти вот чукӧртӧм муніс лёка. Колян во урожайыс эськӧ эз зэв бур вӧв да, видз-му вотыс чукӧрмис бурджыка. Май 1-ӧд лун кежлас сэки чукӧрмыліс вӧлӧстнӧй кассаясас 247.062 шайт, тавося серти унджык 62.626 шайтӧн. Медбӧръя срок кежлас (юнь 1-ӧд лун кежлӧ) тыртӧма вӧлі кольӧм воӧ 90 прӧчент.

Волисполком кӧ омӧля чукӧртіс вотсӧ, сійӧ войдӧр асьсӧ дойдіс: вӧлӧсьтувса бюджетас кассаыс лоӧ тыртӧм; сідзкӧ, волисполкомыс оз вермы став кӧзяйственнӧй план кузяыс уджсӧ вӧчны. Колӧ пыр жӧ вот чукӧртан уджсӧ волисполкомъяслы справитны; недоимщикъяссӧ ставсӧ торъя список вылӧ босьтны дай перйыны вотсӧ. Кыдзи перйыны — сы йылысь финансӧвӧй юкӧдсянь да фининспекторсянь уна нин висьталӧма вӧлі. Сӧмын чорыдджыка колӧ кутчысьны тайӧ удж дінӧ: уджтӧг нинӧм оз артмы.

Селькоръяслы колӧ гижны Коми Сиктӧ — кыдзи мунӧ недоимка перйӧм, дышджык волисполкомъясӧс ёнджыка чуйдыны.