ПИНЬ ВИСЬӦМ

Висян пиньсянь висьӧмыс вермас паськавны, он кӧ видзчысь, мукӧдлаӧ: висян пинь пытшкас олысь микробъясыс (вывті посньыдик пиньсӧ жугӧдысь гагъяс) вомсяньыс вермасны веськавны вир пытшкас да висьмӧдны мукӧдлаті.

Ӧткымын мам-батьсянь вуджӧм висьӧмъяс (наследственные) ёна жӧ вермӧны пиньтӧ висьӧдны, жугӧдны найӧс. Медъёнасӧ тшыкӧдӧ пиньтӧ бать-мамсянь вуджӧм лёквисьӧм (сифилис). Сэтшӧм висьысь челядьтӧ колӧ водз заводитны лечитны.

Нӧбасигас кӧ мамыс бурджыка сёйӧ-юӧ, кагаыдлӧн пиньыс ёнджык жӧ лоӧ. Сэсся быдтігас кагатӧ вердӧмын уна жӧ эм: зэв бур, быдмигас кӧ кагатӧ кутан вердлывны пуктасӧн (овощами). Сэтӧні эм уна пиньсӧ быдмигас ёнмӧданторъяс.

Мый вӧсна нӧ висьмӧны пиньясыс?

Быдлаын — ваын, муын, сынӧдын — эмӧсь посньыдик микробъяс. Микробъяс эмӧсь тшӧтш миян пытшкын, медунасӧ вом пытшкын. Микробъясыс олӧны да рӧдмӧны вом пытшкас кольӧм сёянторъяс вылас. Сэсся вомас кольӧм сёянторъясыс дыр олӧм бӧрын сісьмӧны да сісьтӧны тшӧтш пиньястӧ. Сэтчӧ сэсся веськалӧны микробъясыс да дзикӧдз нин жугӧдӧны пиньястӧ.

Пиньястӧ видзӧй сӧстӧма.

Мед пиньыд оз висьмы, вом пытшкӧстӧ колӧ видзны вывті сӧстӧма. Быд сёйӧм бӧрын вом пытшкӧс колӧ пожъявны да пиньястӧ весавны тшӧткаӧн быд вой кежлӧ. Челядьӧс колӧ ичӧтысянь велӧдны пелька овны, пыр тшӧктыны пиньяссӧ весавны.

Челядьыдлӧн кӧ лоӧ сісь пинь, колӧ заводитны сійӧс лечитны пинь лечитысь доктор ордын.

Гырысьяслы пиньяссӧ сӧстӧма видзӧм кындзи колӧ ещӧ коръясӧкӧ, во джынйын кӧть ӧтчыд, петкӧдлыны пиньяссӧ врачлы.