ЛӦСЬӦДЧӦЙ КӦДЗА КЕЖЛӦ

Матысмӧ гӧран-кӧдзан кад. Колӧ бура лӧсьӧдчыны сэк кежлӧ миянлы кӧйдысъясӧн, видз-му кӧлуйяснаным да мукӧдторйӧн.

Торъя нин колӧ миян обласьтын нянь кӧйдыс лӧсьӧдны, быд во сійӧ оз судзсьы да. Колян во обласьт пасьта вӧлі разӧдӧма уджӧн крестьяналы 41748 пуд ид да 1754 п. зӧр кӧйдыс, ставсӧ тувсов кӧйдыс 43499 пуд. Ыджыд отсӧг тайӧн сетӧма лои вермытӧмджык крестьяналы, сӧмын вӧлі и лёкторъяс, унджык кӧйдысыс вӧлі бокысь вайӧм кӧйдыс да. Мед водзӧ кежлӧ татшӧм лёкыс оз ло, таво бокысь (мукӧд губерняысь) кӧйдыссӧ оз судзӧдны. Сы вӧсна колӧ мый верман крестьяналы аслыс кӧйдыс лӧсьӧдны. Медъёна судзсьытӧмлы кутас на таво сетсьыны кӧйдыс колян вося уджйӧз чукӧртӧм кӧйдысысь.

Кымын уна лоӧ чукӧртӧма уджӧн сетӧм койдыс, сымын унджык лоӧ отсӧг. Крестьяна корӧм серти, таво колян воысь ёна этша колӧ кӧйдыс (колян во серти 21000 пуд гӧгӧр этшаджык обласьт пасьта), сӧмын абу на став важ уджйӧзыс чукӧртӧма. Ставыс кӧ лоӧ чукӧртӧма, сэк кӧйдысыс лоӧ тырмымӧн таво тувсов кӧдза кежлӧ.