КЫДЗИ СУДЗӦДНЫ РАДИО

Матӧ дас витлаын нин миян обласьтын лӧсьӧдӧмаӧсь радио. Радио водзысь водзӧ пыр паськалӧ коми сиктъясын. Быдлаын чукӧртӧны-корсьӧны сьӧм да кӧсйӧны судзӧдны сійӧ коланторсӧ. Сӧмын оз тӧдны, кытысь да кыдзи судзӧдны. Унаысь овлӧ, радиотӧ судзӧднысӧ судзӧдасны дай сувтӧдасны, сӧмын омӧля сійӧ уджалӧ налӧн. Мукӧдлаын сьӧм бырӧдасны уна, а пӧльзаыс зэв этша. Йӧз увгӧны-видӧны лӧсьӧдысьяссӧ, шуасьӧны: радиосьыд пӧ некутшӧм бур абу. Сэтшӧмторйыд вермас лоны, вузалысьыс ачыс радиосьыс немтор оз тӧд да. Радио сиктъясын лӧсьӧдігӧн колӧ бура водзвыв тӧдны, кытысь да кодсянь сійӧ судзӧдны, мед эськӧ бӧрвылас эз ло лишнӧй ноксьӧм. Водзвыв колӧ тӧдмавны, вылӧ-ӧ доныс сувтас, мед бӧрвылас эз ковмы выль пӧв корсьны сьӧм.

Быд коми сиктын радио лӧсьӧдігӧн колӧ судзӧдны сійӧ обласьтувса радио дор сулалысь йӧз чукӧр пыр (Обл. Совет Общества Друзей Радио Коми Области). Сэні лючкиа тӧдӧны, кутшӧм аппаратъяс миян Коми обласьтын бурджыка уджалӧны, кыдзи донтӧмджыка судзӧдны найӧс, дай гӧгӧрбок велӧдӧмӧн висьталасны, кыдзи уджавнысӧ радио бердас. Сэні жӧ вермасны сетны быд судзӧдысьлы ыджыд кокньӧдъяс — вермасны сетны сьӧм нёль-вит тӧлысьӧдз уджӧн. Некод мукӧд татшӧм кокньӧдъяс оз сет. Сійӧ чукӧрыс (Совет ОДР) судзӧдӧ сӧмын медся бур аппаратъяссӧ дай гӧгӧрбок видлалӧ сиктъясад мӧдӧдігӧн, мед оз нин ло некутшӧм омӧльтор сувтӧдӧм бӧрас. Сэсся и доныс улынджык мукӧд радио судзӧдысь серти. Гора сёрнитысь радио сулалӧ шайт 350−300 гӧгӧр сӧмын. Тайӧ быд сиктын колӧ бура тӧдмавны да не вунӧдны судзӧдігӧн. Регыд Обласьтувса радио дор сулалысь йӧз чукӧрлӧн сӧветыс быд сиктӧ быдӧнлы мӧдӧдас гижӧдъяс, кытӧні лючки лоӧ висьталӧма радио судзӧдӧм йывсьыд ставсӧ.

Ал. Попов.