ВОЛИСПОЛКОМСА СЕКЦИЯЯСЛӦН ТУЛЫССЯ УДЖ

Вӧлӧсьтувса сӧветъясын ӧні уджалӧны зэв уна беспартийнӧй крестьяна да сиктса велӧдчӧм йӧз: велӧдысьяс, агрономъяс, докторъяс да мукӧд. Сӧмын волисполкомъяслы колӧ ставнысӧ найӧс кужӧмӧн уджӧдны да найӧ пыр став уджалысь йӧзсӧ кыскыны бурмӧдны, лӧсьӧдны сӧвет удж.

Медвойдӧр колӧ волисполкомъясын лӧсьӧдны секцияясын уджалӧм. Коми обласьтын быд волисполкомын нин восьтӧма видз-му удж нуӧдан, войтырӧс велӧдан, дзоньвидзалун кутан секцияяс. Уна удж лоӧ нуны секцияяслы.

Матыстчӧ кӧдзан кад, видз-му удж нуӧдан секцияяслы ыджыд удж воссьӧ — колӧ лӧсьӧдчыны кӧдзӧм-гӧрӧм кежлӧ. Медвойдӧр лоӧ секцияяслы тӧдмавны кӧйдыс запас да регыдджык судзӧдны, бокысь оз кӧ тырмы кӧйдысыс.

Сэсся секцияяслы ковмас шленъяс пыр висьтавлыны крестьяналы кӧйдыс весалӧм йылысь. Сідзжӧ оз ков вунӧдны ӧні жӧ видлавны му-видз уджалан кӧлуй да машинаяс. Киссьӧм, жугалӧминъяссӧ колӧ пырысьтӧм-пыр лӧсьӧдавны.

Секцияяслы ковмас ёнджыка йитчыны мӧда-мӧдлы отсасян комитетъяскӧд, лӧсьӧдны накӧд ӧтласа сӧвещанньӧ кӧдзӧм-гӧрӧм йылысь. Сӧвещанньӧ вылын ковмас думыштны гӧль-судзсьытӧм крестьяналы да красноармееч семьяяслы отсалӧм йылысь кӧдзан каднас.

Видз-му удж нуӧдан секцияяслӧн уна вӧлӧсьтъясын эм му-видз. Му-видзьяс эмӧсь тшӧтш мӧда-мӧдлы отсасян комитетъяслӧн. Секцияяслы ковмас думыштны тайӧ му-видз уджалӧм йылысь, сӧмын оз ков кыдзисюрӧ кӧдзны-гӧрны. Колӧ агрономкӧд сёрнитны да уна переменаӧн заводитны мусӧ уджавны, сідзжӧ колӧ петкӧдлыны крестьяналы машинаясӧн (кӧдзан машина) уджалӧмсӧ.

Ыджыд да уна удж лоӧ нуны видз-му удж нуӧдан секцияяслы тулысын, сӧмын абу этшаджык уджыс и войтырӧс велӧдан да дзоньвидзалун кутан секциялӧн.

Медвойдӧр секцияыслы ковмас думыштны школаяс йылысь. Воӧ тулыс, воӧ уджалан кад, уна бать-мам оз кутны лэдзны велӧдчысьясӧс школаясӧ: мукӧдыс кӧмкот абутӧм вӧсна, мукӧдыс уджъяс вӧсна. Секцияяслы ковмас ёна тӧждысьны, мед став школьникыс помаліс тавося велӧдчӧмсӧ, мед дугдывтӧг ветліс школаӧ. Гашкӧ, мукӧд школаясын тулыс кежлӧ, рӧспута кежлӧ лоӧ восьтыны общежиттьӧ.

Сэсся сідзжӧ колӧ помӧдзыс нуны гырысьӧс велӧдӧм уджсӧ. Ковмас лӧсьӧдны план изба-читальняса удж йылысь тулыс-гожӧм кежлӧ, медъёна лоӧ лӧсьӧдны видз-му удж нуӧдан кружоклысь удж.

Гожӧм кежлӧ, страда кежлӧ быд вӧлӧсьтын, быд сиктын колӧ восьтыны челядь видзӧминъяс (ясли).

Дзоньвидзалун кутӧм кузя секцияяслы лоӧ тулыснас ёна видзӧдны няйт весалӧм вылӧ уличьясысь, керкаяс гӧгӧр. Сэсся колӧ лӧсьӧдны бур ӧшмӧсъяс (юкмӧсъяс) да заптыны тшӧтш пӧжарнӧй кӧлуй.

Зэв уна мукӧд удж ещӧ лоӧ нуны тулысын волисполкомса секцияяслы.

Н. К.