УДЖАЛЫСЬ ЙӦЗЛЫСЬ МЕДБӦРЪЯСӦ НЕТШЫШТӦНЫ, ПОМЕЩИКЪЯСӦС ПРӦСТИТӦНЫ

Чехословакияын таво няньыс зэв омӧль воис. Правительствоыс шуис отсавны крестьянаыслы, сетіс налы (сӧмын ӧні бумага вылын на) миллионӧн-джынйӧн шайт сьӧм. Мӧдарсяньыс, налогъяссӧ крестьяналысь зэв чорыда перйӧ. Шатен сиктын ӧти дӧвалы пуктӧмаӧсь налогсӧ 93 шайт. Сійӧ дӧва бабаыд сетӧма жалӧба. Суд вылад шуӧмаӧсь, овмӧсыс пӧ сылӧн зэв бур да налогыс пӧ абу ыджыд. А овмӧсас дӧва бабаыдлӧн кык кӧза да 8 чипан.

Мӧд сиктын ӧти столярлысь налогсӧ перйӧм кузя босьтӧмаӧсь сылысь вӧчӧм гортъяссӧ да кӧсйӧмаӧсь вузавны тӧрг вылын: сӧмын тӧрг вылад гортъястӧ некод абу ньӧбӧма. А сыкӧд орчча помещиклысь шыбитӧмаӧсь став недоимкасӧ (недоимкаыс вӧлӧма миллионӧн-джынйӧн шайт); мӧд помещиклысь шыбитӧмаӧсь недоимкасӧ куим миллион да джын шайт.