ПОМЕЩИКЪЯСЛӦН КРЕСТЬЯНА ВЫЛЫН НАРТИТЧӦМ

Рытыввыв Францияын бастуйтӧны арендаӧ видз-му босьтысь крестьяна. Крестьяналы сэні зэв сьӧкыд овныс. Ыджыдалӧны крестьяна вылын помещикъяс. Найӧ асьныс оз уджавны муяссӧ, а сетӧны мутӧм крестьяналы арендаӧ. Арендаас сетӧм муяссьыс помещикъяс босьтӧны крестьяналысь вывті уна. Со ӧткымын кывкутӧмъясыс крестьяналы кутшӧмӧсь.

Крестьяналы оз позь кыйсьыны ружйӧӧн. Помещик кӧ кутас лыйсьыны (окотничайтны) ылын гортсяньыс, крестьяналы лоӧ вердны помещиксӧ лыйсигчӧжыс.

Крестьяналы колӧ быть судзӧдны (ваявны) гортас помещиклы чипанпиян, окорокъяс, вотӧс, куканьяс, ыжъяс да мукӧдтор. Уна-ӧ колӧ вайнысӧ помещикыслы, быдтор — став йывсьыс лючки урчитӧма кывкутӧмас.

Бастуйтысь крестьяна корӧны мездыны тайӧ кывкутӧмъяссьыс. Сэсся найӧ корӧны, мед найӧс лэдзасны велӧдны ассьыныс челядьсӧ асланыс колан школаясын. Сідзкӧ ӧні налы весиг оз позь челядьсӧ велӧдны кӧні налы колӧ.