МАЙ 1-ӧд ЛУН КАПИТАЛИСТ ГОСУДАРСТВОЯСЫН

Май 1-ӧд лун — ставмувывса уджалысь йӧзлӧн праздник. Капиталистъяслы тайӧ луныс медковтӧм. Ёна найӧ ас ногыс виччысисны да лӧсьӧдчисны уджалысь йӧз праздник кежлӧ.

Польшаын пӧличаыс Май 1-ӧд лун кежлӧ медалӧма вӧлі ёнджык да ружйӧысь лыйлыны кужысь йӧзӧс рабочӧйясӧс демонстрацияяс вылысь вӧтлалӧм вылӧ. Италияын правительствоыс вӧлі шуӧма Май 1-ӧд лунӧ уджӧдны рабочӧйясӧс пабрик-заводъяс вылын, празднуйтны не лэдзны.

Сӧмын унджык государствоясас пӧлича эз вермы кутны рабочӧйясӧс Май 1-ӧд лун колльӧдӧмысь. Уна государствоясын рабочӧйяс пабрик-заводъясын эз уджавны, вӧчалісны демонстрацияяс. Францияын май 1-ӧд лунӧ эз уджавны 700 сюрс рабочӧй. Демонстрацияясыс сэні муніны зэв лӧсьыда. Пӧличаыс рабочӧйяс дінӧ абу пондылӧма. Варшаваын (Польшаын) коммунист партия чукӧртлӧма демонстрация да, сы вылӧ чукӧрмылӧма 8 сюрс рабочӧй саяс. Пӧлича уськӧдчылӧма демонстрация вылас, лыйлӧма рабочӧйяссӧ гранатаясӧн. Нёль рабочӧйӧс виӧмаӧсь да 30 мортӧс зэв ёна ранитӧмаӧсь. Мӧд польшаса карын бара пӧлича демонстрация вывсьыс рабочӧйяссӧ лыйлӧма да виӧма 1 рабочӧйӧс да унаӧс ранитӧма. Уналаын мукӧд государствоясын май 1-ӧд лунӧ рабочӧйяс косьӧ волӧмаӧсь пӧличакӧд. Уна рабочӧйӧс пӧлича арестуйталӧма да тюрмаӧ сюялӧма.

Сӧмын оз вермыны капиталистъяс тупкыны Май 1-ӧд лун рабочӧйясӧн празднуйтӧмсӧ. Виалӧм да арестуйталӧм ёнджыка ещӧ ӧтувтас рабочӧйясӧс капиталистъяскӧд косясьӧм вылӧ.