ВИДЗА ТЭНЫД!..

(1926 вося май 5-ӧд лун кежлӧ)

 

Видза тэныд, Коми автономия,

Видза вит во тыран луныдлы!

Тӧдам: тэнӧ восьтіс коми йӧз

Шогсӧ ассьыс вунӧдны:

 

Чӧвтны сійӧс,

Дорны шуд.

Аддза — мӧлӧт киад...

Чорыдджыка кут!

 

Некодлӧн мед тӧд вывсьыс оз вун —

Талун миян чужан лун!

 

Мича нимъяс пемыд арся войын

Тэныд кызмырдӧнӧн вӧзйисны.

Ассьыд нимтӧ ветьӧк шойӧн

Чышкыны нин кӧсйисны.

 

Ёрліс повтӧг

Уна пӧч —

Кулак... он пӧ ов тэ

Асъя кыаӧдз!

 

Некодлӧн мед тӧд вывсьыс оз вун —

Аддзим кыа, аддзам лун!

 

Паськыд му эз лысьтлы весиг шунысӧ,

Мӧвпавны эз кужлы, гаравны —

Кыдзи коми олӧм мунӧ нин,

Кыдзи коми войтыр варовмӧ.

 

Лои шемӧс —

Коми кыв

(Вӧт али нӧ вемӧс?)

Юргӧ парма выв...

 

Ӧні... шонді, дзирдалӧмӧн пет —

Коми йӧзлы республика сет.

 

Видза тэныд, Коми автономия,

Видза вит во тыран луныдлы!

Тӧдам: тэнӧ восьтіс коми йӧз

Шогсӧ ассьыс вунӧдны:

 

Чӧвтны сійӧс,

Дорны шуд.

Аддза — мӧлӧт киад...

Чорыдджыка кут!

 

Некодлӧн мед тӧд вывсьыс оз вун —

Талун миян чужан лун!