КОМСОМОЛЛӦН ОЛӦМ

— Май 1-ӧд лунсянь Обкоммол лӧсьӧдӧ инструкторӧс уджавны яранъяс (самоед) том йӧз пӧвстын. Инструкторсӧ гожӧмнас мӧдӧдӧны яранъяс пӧвстӧ Югорскӧй Шарӧ. Ӧні яранъяс пиын 6 комсомолеч.

— Комсомол нима гидроотряд стрӧитӧм вылӧ Коми обласьтувса комсомол сетӧма 200 шайт.

— Быд 10 комсомолеч вылӧ карын да 15−20 комсомолеч вылӧ сиктъясын локтӧ газет — «Комсомольская правда».

— Комсомоллӧн лыдыс лунысь лунӧ содӧ. Обласьт пасьта быд лун содӧ 4−5 морт. Ӧні кежлӧ комсомолын 3.300 морт.

— Коми обласьт пасьта ӧні мунӧны беспартийнӧй том йӧзлӧн конференцияяс да комсомольскӧй ячейкаясӧ выль бюрояс бӧрйӧм. Сэні видлалӧны тӧвся удж да лӧсьӧдалӧны водзӧ уджавны планъяс.

— Коми обласьт пасьта 102 пионер отряд. Сійӧ 102 отрядас ӧтувтчӧны 3,305 пионер. Обласьтувса пионер удж нуӧдысь бюро лӧсьӧдӧма гожӧм кежлӧ пионеръяслы уджалан план. Лоӧны гожӧмнас экскурсияяс мӧда-мӧд отрядъяслысь удж тӧдмалӧм кузя. Сыктывдінкарса пионеръясӧс нуасны лагерӧ.

— Тӧвся велӧдчӧм комсомоллӧн помасьӧ май тӧлысьӧ. Арсяньыс политшколаясын вӧлі велӧдчӧны быд 100 комсомолеч пиысь 85 морт. Сиктъясын тӧвнас велӧдчӧм чиныштіс, комсомолечьясыс мунісны вӧр уджавны да.