ОТСАЛАМӦЙ РЕВОЛЮЦИОНЕРЪЯСЛЫ

Май Первойӧд лун... Став капиталист государствоясын талун уджалысь йӧз чукӧртчасны, тшӧктыны кутасны капиталистъяслы чинтыны уджалан час лыд, содтыны уджалӧмысь дон. Рабочӧйяс да крестьяна тшӧктасны кокньӧдны ассьыныс олӧмсӧ.

Коммунист партияяс чуксаласны талун став уджалысь йӧзсӧ ӧтувтчыны, ӧтув путкыльтны капиталистъясӧс, кыпӧдны Россияын моз уджалысь йӧз революция.

Социал-демократъяс, ставсикас асьнысӧ социалистӧн нимтысь партияяс кутасны тшӧктыны рабочӧйяслы, тшӧтш крестьяналы, мунны бӧрӧ, тшӧктыны не кыпӧдчыны кӧзяинъяслы — капиталистъяслы да помещикъяслы — воча. Озыр йӧзкӧд ӧти воськолӧ тувччысь «социалистъяс» чуксаласны рабочӧйясӧс не ӧтувтчыны ас костаныс, некутшӧм ногӧн не матысмыны да ӧтув мунны рабочӧй коммунистъяскӧд.

Капиталистъяс нюмъялӧмӧн кывзасны социал-демократъяслысь кывъяссӧ. Капиталистъяс сетасны ки социал-демократ партияса нырщикъяслы. Социал-демократъяс бара на нюласны налысь кинысӧ.

Капиталистъяс сюся видзӧдӧны, кодъяс тшӧктӧны рабочӧйясӧс да крестьянаӧс налы паныд кыпӧдчыны. Уна революционерӧс, уна рабочӧйясӧс капиталистъяс ещӧ на талун йӧртасны асланыс тюрмаясӧ, кутасны нӧйтны, тшыгйӧдны.

Сёӧн-сёӧн, сюрсӧн-сюрсӧн пукалӧны революционеръяс капиталист тюрмаясын. Ставыс пукалӧ тюрмаын 117.000 гӧгӧр революционер. Повзисны-ӧ найӧ? Дерт, эз. Дугдасны-ӧ найӧ уджалысь йӧз революция кыпӧдан уджысь? Оз. Найӧ петасны тюрмаясысь да важ дорсьыс збойджыка босьтчасны асланыс уджӧ.

Революционеръяслы тюрмаясын пукавны сьӧкыд. Налы колӧ сетны сьӧлӧм, сетны отсӧг. Коді сетас отсӧгсӧ? Уджалысь йӧз. Сӧмын уджалысь йӧз асланыс МОПР пыр.

Миян Сӧвет Союзын рабочӧй да крестьяна асьныс ас выланыс ыджыдӧсь, асьныс дорӧны выль олӧм. Ми сетам асланым олӧмӧн, уджӧн медыджыд сьӧлӧм капиталист тюрмаын пукалысь революционеръяслы. Ми сетам налы медыджыд отсӧг. Колӧ на ещӧ содтыны тайӧ отсӧгсӧ, колӧ кыдзи мый вермам кокньӧдны налы тюрмаас пукалӧмсӧ.

Миян обласьтувса МОПР-лы сетӧма дӧзьӧритны, отсавны Львов карса (Польшаын) тюрмаын пукалысь революционеръяслы. Накӧд миян мунӧ гижасьӧм, таво вылӧ МОПР-ӧ чукӧртӧма обласьтын 1.322 шайт да 36 ур. Дерт, тайӧ зэв бур отсӧг. Революционеръяслы тадзи пыр колӧ отсавны. Ещӧ содтыны на колӧ.

Миян обласьтын МОПР-ӧ пырӧм йӧзыс 2.650 морт. Кыксё сюрс йӧз письыд та мында МОПР-са шленыд этша на. Медэтша шленыс крестьяна пиысь.

Коми крестьяна! Талун асланым олӧм да уджалӧм вылӧ видзӧдлӧм кындзи колӧ тшӧтш видзӧдлыны капиталист государствояса уджалысь йӧз вылӧ, капиталистъяс тюрмаясын пукалысь революционеръяс вылӧ. Колӧ налы отсавны. Быд лун сетны отсӧг. Колӧ налы отсавны сы вӧсна, медым регыдджык вермисны мездысьны капиталистъяс кипод улысь. Сэки, ставмувывса рабочӧйяс да крестьяна революция бӧрти, кокниа, регыда, гырыся тувччалӧмӧн лӧсьӧдам став мувылын социализма олӧм.

Коми крестьяна! Пырӧй унджыкӧн МОПР-ӧ, тӧдмасьӧй капиталист государствоясын уджалысь йӧзӧн вермасьӧмнас, сетӧй революционеръяслы сьӧлӧм, сетӧй отсӧг. Сійӧн ми, быд уджалысь морт, вӧчам медбурсӧ революция дор сулалысь вокъяслы. Сэтшӧм отсӧгӧн ми матысмам кадсӧ социализм вӧсна ставмувывса революция.

Жугыль.