СТАВМУВЫВСА УДЖАЛЫСЬ ЙӦЗЛӦН ӦТУВТЧАН ЛУН

Мукӧд государствоясын рабочӧй да крестьянин олӧны озыръяс кипод улын. Найӧ эз на гӧгӧрвоны лючки ӧтувтчӧмлысь вынсӧ озыръяскӧд косясьны.

Октябрса революция петкӧдліс, кутшӧм ыджыд рабочӧйяслӧн да крестьяналӧн выныс, кор найӧ ӧтвылысь мунӧны капиталистъяскӧд косясьны, кор найӧс чуйдӧдӧ уджалысь йӧз вӧсна тӧждысьысь партия — Коммунист партия.

Россияса рабочӧйяслы да крестьяналы колӧ вӧлі революция. Найӧ ӧтвылысь, коммунист партия чуксалӧм серти, сувтісны капиталистъяслы да помещикъяслы воча — вӧчисны революция. Тані оз ков вунӧдны со мый. Уджалысь йӧз унджыкыс эз пырысьтӧм-пыр мунны коммунист партия бӧрся. Найӧ вель дыр мунісны озыр йӧз дор сулалысь партияяс бӧрысь — меньшевикъяс да эсеръяс бӧрысь.

Татшӧмторсӧ ӧні ми аддзам рытыввывса государствоясын. Сэні ёнӧсь на меньшевик партияяс. Мыйкӧ мында европаса да америкаса рабочӧйяс эскӧны меньшевикъяс ылӧдчӧмӧ. Сӧмын абу став рабочӧйыс ӧткодьӧсь. Вежӧраджык рабочӧйяс гӧгӧрвоӧны меньшевик партиялысь ылӧдчӧмсӧ, эновтчӧны наысь. Рабочӧйяс пыр ӧтарӧ унджыкӧн аддзӧны — ӧтвылысь косясьтӧг, ӧтвылысь паныд сувттӧг капиталистъяс киысь власьт босьтны он вермы. Медым регыдджык шыбитны капиталистъясӧс, рабочӧйяс ӧтувтчӧны, мунӧны коммунист рабочӧйяскӧд ӧтвылысь.

Май 1-ӧд лун — ставмувывса уджалысьяслӧн ӧтувъя праздник. Сардырся война дырйи рабочӧйясӧс вузалысьяс — социал-демократъяс — жугӧдлісны бӧр тайӧ праздниксӧ. Май 1-ӧд лун праздничайтӧм куслі.

Ӧні, Коммунист Интернационал тӧждысьӧм да зільӧм кузя, Май 1-ӧд лун бара кутісны праздничайтны став мувывса уджалысь йӧз, петкӧдлыны ассьыныс выннысӧ.

СССР-са рабочӧйяс да крестьяна асьныс аслыныс лӧсьӧдӧны выль оланногсӧ. Миянкӧд орччӧн рытыввывса государствоясын уджалысьяс капиталист кипод улынӧсь на. Талун найӧ видзӧдӧны миян вылӧ. Найӧ аддзӧны революция вӧчлӧмысь ассьыныс мездлунсӧ. Капиталист государствоясын крестьяна помещикъясӧн личкӧм вӧсна лунысь лунӧ гӧльмӧны, пӧрӧны корысьӧ. Сы вӧсна крестьяна ёнджыка матысмӧны рабочӧйяс бердӧ, ӧтувтчӧны накӧд. Налӧн ӧтувтчӧмыс петкӧдлӧ революциялы матысман лун. Ӧтвылысь рабочӧйяслы да крестьяналы вермасьӧмыс капиталистъяс нартитанлунлы ваяс пом.

Талун став мувывса рабочӧй-крестьяна петкӧдласны капиталистъяслы асланыс ӧтувтчӧмлысь вынсӧ. Миян СССР-ын Май 1-ӧд лун колльӧдӧм петкӧдлас став мувывса рабочӧй-крестьяналы, кыдзи регыдджык вӧчны уджалысь йӧзлы асьнысӧ мездӧм кузя революция став му вылын.

Флеровскӧй.