РАБОЧӦЙЯСЛӦН ДА КРЕСТЬЯНАЛӦН КАПИТАЛИСТЪЯСКӦД ВЕРМАСЬӦМ

— Ёна нин важӧн китайса уджалысь йӧз косясьӧны мукӧд государствоса капиталистъяскӧд, кӧсйӧны мездыны Китайсӧ найӧ кипод улысь. Мукӧд государствоса капиталистъяс аслас сьӧмнаныс бергӧдісны китайса уджалысь йӧз вылӧ революциялы паныд мунысь китайса генералъясӧс. Найӧ мукӧд государствоса капиталистъяс отсӧгӧн уна нин вир кисьтісны китайса уджалысь йӧзлысь.

— Индияын ёна зыкын олӧны да тшӧкыда косясьлӧны мӧда-мӧдныскӧд енлы эскӧм вӧсна магометана да индусъяс. Индияыс Англия кипод улын. Тайӧ зыксӧ магометана да индусъяс костас англияса капиталистъяс нарошнӧ кыпӧдӧны, мед найӧ оз ӧтувтчыны да шыбитны ас вывсьыс ассьыныс нартитысьяссӧ.

— Сирияын сирияса йӧз уна тӧлысь нин косясьӧны францияса капиталистъяскӧд, кӧсйӧны мездысьны найӧс дзескӧдӧмысь.

— Англияса из шом перйысь рабочӧйяс ёна вензьӧны англияса капиталистъяскӧд. Англияса капиталистъяс кӧсйӧны чинтыны уджалысьяслысь уджалан дон. Сӧмын рабочӧйясыс бурӧн оз кӧсйыны сетчыны.

— Мароккоын рифъяс мӧд во нин косясьӧны францияса капиталистъяскӧд асьнысӧ мездӧм кузя. Найӧ зільӧны дзикӧдз торйӧдчыны Францияысь, кӧсйӧны ассьыныс олӧмсӧ лӧсьӧдны асьныс.

— Польшаса уджтӧм йӧз унаысь нин уна сюрсӧн петавлісны улича вылӧ вӧчавны демонстрацияяс удж корӧм понда, сӧмын польшаса капиталистъяс удж пыдди петысь рабочӧйяслы тюрма да пуля сетавлісны — уна рабочӧйясӧс виаліс пӧлича демонстрация вывсьыс, унаӧс тюрмаӧ шыблалісны. Польшаса рабочӧйяс оз дугдыны косясьӧмысь капиталистъяскӧд.