ӦТУВТЧАН ЛУН

Май 1-ӧд лун — ставмувывса уджалысьяслӧн праздник. Оз позь шуны, мый талун праздник сӧмын рабочӧйяслӧн. Рабочӧйясыд ӧд мырсьӧны да вермасьӧны капиталистъяскӧд став увтыртӧма йӧз вӧсна. Найӧ корсьӧны долыдлун быд эмбуртӧм да уджалысь мортлы.

Сэсся ӧд рабочӧйясыд ӧтнаныс оз вермыны путкыльтны, шыбитны озыръясыдлысь власьттӧ. Ленин тшӧктіс ӧтувтчыны став рабочӧйяслы да крестьяналы. Тайӧ ӧтувтчӧмнас 1917 воын ми петім озыр йӧз кабыр улысь. Мукӧд мувывса уджалысь йӧз сідзжӧ вермасны капиталистъясӧс сӧмын сэки, кор ставныс сувтасны налы паныд, кор ӧтувтчасны.

Комын сизим во сулалӧ тайӧ праздникыс. Важӧн нин рабочӧйясыд мӧвпыштісны: колӧ пӧ мездысьны ӧтувтчӧмӧн. Воысь воӧ тайӧ лунӧ рабочӧйяс чукӧртчывлӧны, петкӧдлӧны ассьыныс выннысӧ.

Эм сэтшӧм партия, коді шусьӧ меньшевистскӧй. Кывзан кӧ налысь гижӧд да сёрни — тайӧ партияыс сулалӧ дзик рабочӧй дор. Видзӧдлан кӧ налысь уджсӧ, меньшевикъясыд нуӧдӧны мӧдарӧ, ёнмӧдӧны капиталистъясӧс. Вӧлӧмакӧ, пӧръясьлӧны. Мукӧд мувывса рабочӧйясыд абу на быдлаын вывті вежӧраӧсь. Эмӧсь на пиын уна пемыд йӧз. Сы вӧсна рабочӧйясыд ӧнӧдз на кывзӧны меньшевикъяслысь тшӧктӧмъяссӧ.

Сы вӧсна май 1-ӧд луныд оз на мун быдлаын ӧткодь. Мукӧдлаын тайӧ лунас рабочӧйясыд сӧмын чукӧртчыласны да кутасны корны кокньӧд, содтӧд уджалан дон вылӧ. Дерт, татшӧм пемыд рабочӧйясыд этша нин коли. Ӧні быд странаын кыптӧны, паськалӧны коммунист партияяс. Коммунистъяс велӧдӧны, кыдзи колӧ вермасьны озыр йӧзкӧд. Найӧ шуӧны: корӧмнад буртор оз шед. Колӧ ӧтувтчӧмӧн путкыльтны капиталистъяслысь власьт, мырддьыны налысь став пабрик да заводъяссӧ. Сӧмын сэки бырӧ шогсьӧм да бӧрдӧмлӧн кадыд.

Мукӧд мувывса уджалысь йӧз аддзӧны, Рочмувывса рабочӧй да крестьяна пӧ вермисны мездысьны. Ӧні найӧ мӧдӧдчӧны миян туйӧд, лӧсьӧдчӧны сідзжӧ петны озыр йӧз кабыр улысь. Быд лун ми лыддям газетысь, кыдзи косясьӧны рабочӧйяс капиталистъяскӧд. Озыр йӧзыд вывті нин повзьӧмаӧсь. Быд лун найӧ сюялӧны тюрмаясӧ паныд мунысьясӧс, революционеръясӧс.

Рабочӧйяс моз жӧ сувтӧны паныд капиталистъяслы крестьяна. Кыпӧдчӧны Мароккоса, Сирияса, Китайса нартитӧма йӧз. Регыд озыр йӧзлӧн усьӧ лачаыс. Недыр нин найӧ уджалысьяслысь юасны вирсӧ. Талун бара лыбасны вылӧ гӧрд флагъяс, бара эмбуртӧм йӧз матыстчасны коммунист партия бердӧ, бара став му кузя мунас гора шы: «Мувыв эмбуртӧмъяс, ӧтувтчӧй!»

Миян Сӧвет республикаын мӧд оласног. Миян оз нин ков повны капиталистъясысь. Став власьтыс ас киын. Ми дорам, кыпӧдам выль олӧм. Талун ковмас мичаӧ видзӧдлыны: кутшӧма быдмӧ миян овмӧс, кыдзи бырӧдам пемыдлун, мый коли вӧчны водзӧ.

Талун ковмас казьтыштны да сетны отсӧг мукӧд мувывса революционеръяслы. Налы зэв на сьӧкыд вермасьны. Медся сьӧкыд тюрмаын пукалысьяслы. Колӧ чукӧртны унджык сьӧм МОПР-лы. Колӧ быд ячейкаын кыпӧдны уджсӧ.

Коми крестьяна! энӧ вунӧдӧй ассьыныд вокъястӧ!

Ӧтувтчӧй ёнджыка рабочӧйяскӧд! Мунӧй Ленин тшӧктӧм серти!