ЛОЗУНГЪЯС МАЙ 5-ӧд ЛУН КЕЖЛӦ

1. Мед кыптас, мед ёнмас Коми Автономия!

2. Мукӧд сёрниа уджалысь йӧзкӧд ӧтувтчӧмӧн лӧсьӧдам выль бур олӧм!

3. Октябрса революция мездіс коми уджалысь йӧзӧс увтыртӧмысь, петкӧдіс югыд туй вылӧ!

4. Талун тыри вит во Коми Автономиялы!

5. Ас киӧн, ас мывкыдӧн коми уджалысь войтыр вит во нин вӧчӧны выль оласног.

6. Автономия восьтӧм бӧрын кутіс артмыны коми гижӧд, коми кывлы воссис туй.

7. Вит воӧн этша на лӧсьӧдім коми нига, коми газет, коми школа. Водзӧ вылӧ чорыдджыка кутчысям коми кывъяд: сетам коми йӧзлы унджык нига, бурджык газет, лӧсьӧдам коми школа.

8. Важӧн миянлысь ёна вир юисны саръяс да озыр йӧз. Сӧмын сӧвет власьт да коммунист партия сетісны коми йӧзлы лӧсьӧдны асланыс, ас сямӧн, ас вежӧрӧн олӧм.

9. Автономия кыпӧдіс комилысь овмӧс, восьтіс Коми мулысь озырлун.

10. Уна дона помъяс весьшӧрӧ куйлӧны Коми му пиын. Перъям, лэптам бурторъяссӧ — вӧчалам пабрик-заводъяс.

11. Май витӧд лунӧ чужис коми йӧзлӧн аслас олӧм. Тайӧ лунас коми мортлӧн ыджыд праздник.

12. Петамӧй ывлаӧ, чукӧртчамӧй, гажаджыка нуӧдамӧй ассьыным коми праздник.

13. Автономиялӧн олӧмсӧ, вит вося уджсӧ висьталам талун быдлаын, быд сиктын коми крестьяналы!

14. Кӧрт туйӧн да быдпӧлӧс туй лӧсьӧдӧмӧн ӧтлаӧдам Коми муӧс мукӧд сёрниа йӧзкӧд, югдӧдам электричествоӧн пемыд пармасӧ!

15. Коми крестьяна! Кыпӧдамӧй, бурмӧдамӧй видз-му уджалӧмнымӧс.

16. Коми мулӧн озырлуныс вӧр сайын. Дӧзьӧритамӧй бурджыка сійӧс.

17. Коми уджалысь йӧз, матыстчӧй ставныд сӧветъяс удж бердӧ, уджалӧй сэні, дорӧй выль олӧм.

18. Сӧмын сӧвет власьт коммунист партия чуйдӧдӧмӧн сетӧ посни ас сёрниа йӧзлы ас нога олӧмсӧ лӧсьӧдны. Коми уджалысь йӧз, ёнмӧдӧй ассьыныд сӧвет власьт.

19. Вит во Коми Автономиялы тыран лунӧ ещӧ чорыда йитчамӧй сӧвет власьткӧд, матыстчамӧй коммунист партия бердӧ — уджалысь йӧз вӧсна тӧждысьысь партия бердӧ.

20. Сӧмын коммунист партия чуйдӧдӧмӧн коми уджалысь йӧз ӧтув став мувывса уджалысь йӧзкӧд воасны бур олӧмӧ.

21. Топыда ӧтувтчамӧй, крестьянаяс рабочӧйяскӧд!